ƝIninkali Jaabi

◼ Farati jumɛnw b’a la ka to ka kuma mɔgɔ dɔ fɛ, i tɛ min dɔn, intɛrinɛti sira fɛ?

Web site caman dilanna walisa mɔgɔw ka se ka ɲɔgɔn sɔrɔ ka kuma, ani ka lɛtɛrɛw ci ɲɔgɔn ma intɛrinɛti sira fɛ. O Web site caman b’a to mɔgɔ bɛ se ka yɔrɔ dilan a yɛrɛ ye, ka kunnafoniw di a yɛrɛ kan, k’olu sɛbɛn ka bila yen. A fotow ani kunnafoni wɛrɛ minnu ye a yɛrɛ kunkanko ye, a bɛ se ka olu bɛɛ sɛbɛn ka bila yen. Ni mɔgɔ dɔ ye o yɔrɔ dilannen lajɛ, o kɔfɛ, a bɛ se ka o tigi lasɔrɔ. O Web site sugu ka ca kosɛbɛ denmisɛnw fɛ, wa, jɛkulu denmisɛn dɔw ye o Web site kɛ baarakɛminɛn ye ka kumaɲɔgɔnya sira sɔrɔ olu ni mɔgɔw cɛ minnu y’a fɔ ko olu ye Jehowa Seerew ye.

I bɛ mɔgɔ min sɔrɔ intɛrinɛti sira fɛ, a ka nɔgɔn o tigi ka i lafili a yɛrɛ kan, walima a ka Alako kan, walima a ŋaniya jɔnjɔnw kan. (Zab. 26:4) Mɔgɔ min b’a fɔ ko a ye Jehowa Seere ye, i b’a sɔrɔ tiɲɛ na dannabali don, walima mɔgɔ gɛnnen dɔ don ka bɔ jɛkulu la, walima yɛrɛ Jehowa seere kɔrɔ dɔ don min b’a ɲinina sisan ka mɔgɔw bɔ Jehowa kɔ. (Gal. 2:4) A jirala k’a fɔ ko cɛ minnu bɛ jɛnɛya kɛ ni denmisɛnw ye, olu caman bɛ baara kɛ ni o Web site suguw ye walisa ka denmisɛnw sɔrɔ ka kojugu kɛ u la.

Hali ni an dalen b’a la ko anw bɛ lɛtɛrɛw ci mɔgɔ minnu ma intɛrinɛti sira fɛ, tɔgɔ duman bɛ o mɔgɔw la jɛkulu kɔnɔ, ni anw bɛ to ka baro kɛ o sira fɛ, an ka barow bɛ se ka yɛlɛma joona ka kɛ fɛn nɔgɔlen ye. A bɛ ten, bawo an tɛ kɔlɔsili kɛ kosɛbɛ ni an bɛ kuma nin cogo la mɔgɔw fɛ, an ma minnu ye fɔlɔ. U bɛ kumaɲɔgɔnya min kɛ intɛrinɛti sira fɛ, o bɛ se fana ka kɛ fɛn ye min bɛ gundo la u bolo, ani ka miiri ko u mana fɛn o fɛn fɔ, mɔgɔ wɛrɛw tɛna o dɔn, i n’a fɔ u bangebagaw walima maakɔrɔw. Dusukasiko don ko denmisɛn caman minnu bɛ bɔ Kretiɛn duw kɔnɔ, olu binna o jan kɔnɔ, ka u sen sɔrɔ malobaliya kumaw la. (Ef. 5:3, 4; Kol. 3:8) Denmisɛn wɛrɛw ye o yɔrɔ sugu min dilan u yɛrɛ ye ordinatɛri kɔnɔ, u ye u fotow ta cogo la min bɛ cɛnimusoyako nege don mɔgɔ la, ka olu bila yen, walima u ye malobaliya tɔgɔninw da u yɛrɛ la yen, walima u ye wideyo fɔlisen bila yen min bɛ cɛnimusoya ko kan cogo jɛlen na.

An tilara nin ko min ɲɛfɔli la sisan, an b’a ye ko denw bɛ ko minnu kɛ ordinatɛri la, bangebagaw ka kan k’olu sɛgɛsɛgɛ. (Nt, 29:15) A bɛ se ka kɛ farati ye ka mɔgɔ wele ka na an ka so kɔnɔ, an tɛ mɔgɔ min dɔn, walima k’a to o tigi ni an denw dɔrɔn ka to ɲɔgɔn fɛ. O cogo kelen na, ni anw walima an ka denmisɛnw ni mɔgɔw ye teriya don intɛrinɛti fɛ, anw walima an ka denmisɛnw tɛ mɔgɔ minnu dɔn, o bɛ se ka kɛ farati ye anw walima an ka denmisɛnw bolo, hali ni o mɔgɔw b’a fɔ ko u ye Jehowa Seere ye.—Nt. 22:3.