Munna an bɛ segin ka taa bɔ mɔgɔw ye
1. Mɔgɔ bɛ se ka ɲininkali jumɛn lawuli an ka waajuli baara ko la?
1 Yɔrɔ caman na, an bɛ segin ka taa bɔ mɔgɔw ye u ka so siɲɛ caman-caman, wa an tɛ o dabila, hali n’an barokɛɲɔgɔn y’a fɔ an ye ko kibaru duman man di a ye. Munna an bɛ segin ka taa bɔ mɔgɔw ye minnu y’a jira kaban ko kibaru duman man di u ye?
2. An b’an jija cidenyabaara la ka taa a fɛ kun bɛɛ la belebele min kosɔn, o ye jumɛn ye?
2 An bɛ Jehowa ani an mɔgɔɲɔgɔnw kanu: N’an b’an jija cidenyabaara la ka taa a fɛ, a kun bɛɛ la belebele ye ko an bɛ Jehowa kanu. An dusukun b’an bila ka taa a fɛ waajuli la mɔgɔw fɛ an ka Alaba kan. (Luka 6:45) Jehowa kanuya b’an wajibiya ka a ka ci fɔlenw mara ani ka mɔgɔ wɛrɛw dɛmɛ u ka o ɲɔgɔn kɛ. (Nt. 27:11; 1 Yuh. 5:3) N’an bɛ taa a fɛ cidenyabaara la, ani ko an bɛ sɔn ka kow bɛɛ kun, o dulonnen tɛ mɔgɔw ka lamɛnni walima u ka lamɛnbaliya la. Hali ni san kɛmɛ fɔlɔ Kretiɛnw tɔɔrɔla, u taara a fɛ waajuli la, u ma o “dabila.” (Kɛw. 5:42) Ni mɔgɔw bɛ ban ka an lamɛn, an t’a to o k’an dusu faga, nka an bɛ to kantigiya la. An b’a jira o cogo la, an bɛ Jehowa kanu fo ka se hakɛ min ma, ani an y’an yɛrɛ di a ma fana fo ka se hakɛ min na.
3. Mɔgɔw kanuya b’an dɛmɛ ka taa a fɛ waajuli la cogo di?
3 N’an b’an jija cidenyabaara la ka taa a fɛ, o ye fana ko an bɛ an mɔgɔɲɔgɔn kanu. (Luka 10:27) Jehowa t’a fɛ mɔgɔ si ka halaki. (2 Pi. 3:9) Hali waajulikɛyɔrɔ la min baarala kosɛbɛ, o yɔrɔ la an bɛ mɔgɔw sɔrɔ halibi minnu b’a fɛ ka baara kɛ Jehowa ye. Misali la, ni i ye Gadelupe jamana mɔgɔ hakɛ bɛɛ lajɛlen ta, ni olu la i ye mɔgɔ 56 jate, i b’a ye ko o mɔgɔ 56 la, 1 ye Jehowa Seere ye. Salon, mɔgɔ 214 batisera yen, wa, mɔgɔ 20.000 ɲɔgɔn nana Hakilijigin na. Ni i ye Gadelupe jamana mɔgɔ hakɛ bɛɛ lajɛlen ta, ni olu la fana i ye mɔgɔ 22 jate, i b’a ye ko o mɔgɔ 22 la, mɔgɔ 1 ɲɔgɔn nana Hakilijigin na.
4. An bɛ min sɔrɔ waajulikɛyɔrɔ la, o bɛ yɛlɛma cogo di?
4 Yɛlɛma minnu bɛ kɛ waajulikɛyɔrɔ la: I tɛ mɔgɔ kelenw sɔrɔ tuma bɛɛ waajulikɛyɔrɔ la. Ni i seginna ka na so dɔ la, kibaru duman ma diya i barokɛɲɔgɔn ye yɔrɔ min na, a bɛ se ka kɛ ko denbaya kɔnɔmɔgɔ wɛrɛ—laala mɔgɔ dɔ min ma deli ka an ka cikan mɛn—o bɛ dayɛlɛ an ye, ka an lamɛn. Walima i bɛ se ka mɔgɔ wɛrɛw sɔrɔ minnu yɛlɛmana o so kɔnɔ, kibaru duman ka di minnu ye. Denmisɛn minnu bangebagaw ma sɔn tiɲɛ la, olu bɛ kɔrɔbaya, ka so bila. O mɔgɔ suguw bɛ se ka sɔn ka Masaya cikan mɛn.
5. Mun bɛ se ka mɔgɔw bila u ka sɔn kibaru duman ma?
5 Mɔgɔw bɛ yɛlɛma fana. Waati dɔ la, ciden Paul tun ye Alatɔgɔtiɲɛbaga ni ‘mɔgɔw tɔɔrɔbaga ni mɔgɔ farinma ye.’ (1 Tim. 1:13) O cogo kelen na, mɔgɔ minnu bɛ baara kɛ Jehowa ye bi, u caman tun ma sɔn tiɲɛ la waati dɔ la. I b’a sɔrɔ waati dɔ kɛra, u dɔw yɛrɛ ye kibaru duman kɛlɛ. Ikomi diɲɛ cogoyaw bɛ yɛlɛma-yɛlɛma, mɔgɔ minnu tun bɛ kibaru duman kɛlɛ, walima kibaru duman tun man di minnu ye, olu bɛ se ka sɔn k’a lamɛn. Dɔ wɛrɛw sɔn ka di kibaru duman ma olu yɛrɛ kɛlen kɔ ka gɛlɛya sɔrɔ u ka ɲɛnamaya kɔnɔ, i n’a fɔ saya dɔ kɛlen u ka du kɔnɔ, walima u bilalen ka bɔ baara la, walima wariko gɛlɛya walima banako.
6. Munna an ka kan ka waajuli kɛ ni nisɔndiya ye ka taa a fɛ?
6 Nin diɲɛ bɛ ka se a bantuma na, nka an ka waajuli baara ni mɔgɔw kalanni baara bɛ ka taa ɲɛ teliya la. (Esa. 60:22) O la sa, an bɛ taa a fɛ waajuli la ni nisɔndiya ye, wa, an b’an jija ka hakili ɲuman to an na. An bɛna kuma mɔgɔ nata min fɛ, laala o bɛna an lamɛn. An ka kan ka taa a fɛ waajuli la. O kɛli fɛ, an na an ‘yɛrɛ kisi ka an lamɛnbagaw fana kisi.’—1 Tim. 4:16.