Kalan min bɛ ɲɛnamaya lase mɔgɔw ma
1 Ni an ɲɛ bɛ mɔgɔw ka nisɔndiya la, tuma min na u ye tiɲɛ dɔn Ala ka kuma kɔnɔ, o bɛ an yɛrɛ nisɔndiya kosɛbɛ. Ka Ala dɔnniya lase mɔgɔw ma, ani k’a fɔ u ye Ala bɛna min kɛ hadamadenw ye, o bɛ nisɔndiya lase an ma, bawo o dɔnniya bɛ se ka ɲɛnamaya banbali lase o mɔgɔw ma.—Yuh. 17:3.
2 Mun na kalan min bɛ bɔ Ala yɔrɔ, o ka fisa ni kalan tɔw bɛɛ ye: Kalan cogoya caman bɛ diɲɛ na ani fɛn minnu bɛ kalan, olu suguya ka ca. An bɛ se ka dɔnniya sɔrɔ bi diɲɛ kɔnɔ, hali an tɛ se ka miiri u yɛrɛ bɛɛ la. (Ekl. 12:14) Nka, o dɔnniya nafa tɛ se ka suma ni “Ala ka kobaw” ye. (Kɛw. 2:11) Yala kalan min bɛ sɔrɔ diɲɛ kɔnɔ, o bɛ se ka hadamadenw gɛrɛ hali dɔɔnin dɔrɔn an Dabaga la, ani k’u dɛmɛ k’a sagonata dɔn wa? Yala o kalan sera ka mɔgɔw dɛmɛ k’a dɔn mun bɛ kɛ ni an sara wa, walima mun na tɔɔrɔ caman bɛ yen? Yala a sera ka jigiya di mɔgɔw ma wa? Yala a sera ka mɔgɔw dɛmɛ u k’u ka denbaya kɛcogo ɲɛ ka t’a fɛ wa? Ayi. Kalan min bɛ sɔrɔ diɲɛ kɔnɔ, o ma se ka nin si kelen kɛ. Kalan min bɛ bɔ Ala yɔrɔ, o kelenpe dɔrɔn de bɛ se ka mɔgɔw dɛmɛ ka jaabi sɔrɔ ɲininkalibaw la diɲɛlatigɛ kow kan.
3 Kalan min bɛ bɔ Ala yɔrɔ, o bɛ fɛn dɔ fana di an ma min tɛ sɔrɔ bi diɲɛ kɔnɔ—a bɛ kalanden jogo ɲɛ ka t’a fɛ. Bi, mɔgɔw tɛ mɔgɔ wɛrɛw fɛ minnu ni u tɛ siya kelen ye, walima minnu ni u tɛ kabila kelen mɔgɔw ye, walima minnu faso ni u faso tɛ kelen ye. Nka, mɔgɔ minnu bɛ sɔn Ala ka kalansiraw la ani ka tugu olu kɔ, Ala ka Kuma bɛ o koniya sugu bɛɛ bɔ pewu o mɔgɔw dusukun na. (Heb. 4:12) Kalan min bɛ bɔ Ala yɔrɔ, o bɛ mɔgɔw bila fana ka ban farinya sugu bɛɛ ma ka ‘jogo kura don u la, n’o ye mɔgɔ kura ye.’ (Kol. 3:9-11; Mi. 4:1-3) Ka fara o kan, kalan min bɛ bɔ Ala yɔrɔ, o ye mɔgɔ miliyɔn caman dɛmɛ ka fanga sɔrɔ ka se ka kɛcogow ni jogojuguw bila minnu ka go Ala ye, o minnu bilali tun ka gɛlɛn kosɛbɛ o mɔgɔw bolo.—1 Kɔr. 6:9-11.
4 Mun na kɔrɔtɔko don sisan: An Karamɔgɔba bɛ an lasɔmi walisa an k’a dɔn an bɛ waati sugu min na. A ye kiri minnu kofɔ a ka kirayakuma kɔnɔ, kunnafoni bɛ olu kɔnɔ minnu bɛ an ka waati kan. O kunnafoni ka kan ka fɔ dugukolo yɔrɔ bɛɛ la. (Jir. 14:6, 7) Ikomi Krista bɛ ka mara kɛ sankolo la, diinɛw bɛɛ lajɛlen minnu bɛ diɲɛ kɔnɔ, ni olu tɛ tiɲɛ ye, a bɛna olu bɛɛ halaki sɔɔni. Ala ka Masaya bɛna wuli dugukolo kan gofɛrɛnamanw bɛɛ halakili la. (Dan. 2:44; Jir. 11:15; 17:16) O kosɔn, kɔrɔtɔko don mɔgɔw ka sɔn Ala ka Masakɛ la min bɛ ka mara kɛ sisan. Kɔrɔtɔko don fana u ka bɔ Babilonɛba kɔnɔ, ani u ka Ala tɔgɔ wele ni dannaya ye. (Zab. 2:11, 12; Rom. 10:13; Jir. 18:4) An k’an seko bɛɛ kɛ ka kalan lase mɔgɔw ma, kalan min bɛ ɲɛnamaya lase u ma.