I banbannen ka to alako ta fan fɛ i kɛtɔ ka kalan walima fɔrmasiyɔn dɔ kɛ lise kɔfɛ

1-2. (a) N’a y’a sɔrɔ i y’a latigɛ ka kalan walima fɔrmasiyɔn dɔ kɛ lise kɔfɛ, i ka kan ka ta’a fɛ ka mun de kɛ? (b) N’a fɔra ko “ka taama ka kɛɲɛ n’o ye”, o kɔrɔ ye mun de ye? (Filipekaw 3:16)

JAMANA bɛ kalan hakɛ min wajibiya jamanaden bɛɛ ma, Jehova batobaga dɔw y’a sugandi ka kalan walima fɔrmasiyɔn dɔ kɛ ka fara o kan. Olu bolo, o kalan walima o fɔrmasiyɔn sugu bɛna u dɛmɛ ka baara sɔrɔ min bɛna to u k’u magoɲɛfɛnw sɔrɔ walisa u ka Jehova bato ka ɲɛ. N’i y’a latigɛ ka kalan walima fɔrmasiyɔn dɔ kɛ lise kɔfɛ, mun de bɛna i dɛmɛ walisa i gɛrɛlen ka to Jehova la? (Yak. 4:8a). Siga t’a la ko, i ye kɔrɔbɔli caman sɔrɔ i kɛtɔ ka lakɔli kɛ san tɛmɛnnenw na, wa i y’i jija ka se sɔrɔ o kɔrɔbɔliw kan. Sisan i ka kan ka ta’a fɛ “ka taama ka kɛɲɛ n’o ye”, o kɔrɔ ye ko ka ta’a fɛ ka Jehova bato ni kantigiya ye, iko e tun bɛ deli ka kɛ cogo min na.—Filipekaw 3:16 kalan.

² Daɲɛ min bɛ sɔrɔ Gɛrɛkikan kumasen kɔnɔ min bayɛlɛmana k’a kɛ “ka taama ka kɛɲɛ n’o ye”, baara tun bɛ kɛ n’o ye walisa ka kuma sɔrɔdasiw ka taama cogo kan, n’u bɛɛ bɛ ka taama cogoya kelen na ɲɔgɔn fɛ. N’i y’a latigɛ ka kalan walima fɔrmasiyɔn dɔ kɛ lise kɔfɛ, i ka kan ka ta’a fɛ ka “taama” tiɲɛ sira kan. O kɔrɔ, ka ta’a fɛ ka Jehova bato. I man kan k’i sigi k’i bolo fila da ɲɔgɔn kan wa i man kan ka segi kɔ. Barokun in bɛna kuma Bibulu sariyakolo naani kan minnu bɛ se k’i dɛmɛ k’o kɛ. I tun bɛ o sariyakolow dɔn ka ban wa i tun bɛ u waleya i ka ɲɛnama kɔnɔ ka kɔrɔ. Sisan, i mago b’a la ka ta’a fɛ k’u waleya i ka ɲɛnamaya kɔnɔ i kɛtɔ k’i ka kalan walima fɔrmasiyɔn kɛ ani i tilalen kɔ i ka kalan na.

DELINAKO ƝUMAN MINNU B’I LA ALAKO TA FAN FƐ, KANA OLU DABILA

3. Delinako ɲuman minnu b’i la alako ta fan fɛ, i b’a fɛ ka kalan walima fɔrmasiyɔn min kɛ, o bɛ se ka nɔ jumɛn de bila o la?

³ Mun de bɛ se k’i bali k’o kɛ? I bɛna kalan walima fɔrmasiyɔn min kɛ, siga t’a la ko, o bɛna i ka ɲɛnamaya kɛcogo yɛlɛma ani k’i ka waati caman ta. Ikomi i b’a fɛ ka ɲɛ sɔrɔ i ka kalan walima i ka fɔrmasiyɔn la, o bɛ se k’a to i ka Jehova ka baara kɛ bolokɔfɛ fɛn ye. A bɛ se ka kɛ yɛrɛ k’i b’a daminɛ ka lajɛw, waajulibaara, delili ani i ka Bibulu kalanni kɛ bolokɔfɛ fɛn ye.—Jir. 2:4.

4. Mun de bɛ se k’i dɛmɛ “ka taa ɲɛ Matigi ka baara la tuma bɛɛ”? (1 Kɔrɛntekaw 15:58)

⁴ 1 Kɔrɛntekaw 15:58 kalan. N’i b’a fɛ i ka nɛgɛso ka taa n’i ye fo i ka to k’a pedale. O cogo kelen na, n’i b’a fɛ i banbannen ka to alako ta fan fɛ, fo i k’i cɛsiri Jehova ka baara, o kɔrɔ ka “taa ɲɛ Matigi ka baara la tuma bɛɛ.” Ka to k’i sen don alako baaraw la, o dɔrɔn tɛ boli kɛ, i ka kan ka olu de bila jɔyɔrɔ fɔlɔ la i ka ɲɛnamaya kɔnɔ. A to i hakili la ko fɛn min nafa ka bon i ka ɲɛnamaya kɔnɔ, o ye Jehova batoli de ye, i ka fɔrmasiyɔn tɛ (Mat. 22:37). Balimamuso dɔ min tɔgɔ ko Samantha y’a fɔ ko: “Ne ye layidu ta ne yɛrɛ ye ko, ni ne ka kalan bɛna ne bali ka Jehova bato a ɲɛ ma, ne bɛna ne ka kalan jɔ.”

5. I bɛ se ka mun de kɛ walisa i ka ta’a fɛ ka caman kɛ Jehova ka baara la?

⁵ Sani i k’i ka kalan walima fɔrmasiyɔn daminɛ, i bɛ se ka mun de kɛ? I ka kan ka fɛn minnu bila jɔyɔrɔ fɔlɔ la i ka ɲɛnamaya kɔnɔ, fɔlɔ ka olu sugandi. I yɛrɛ ɲininka: ‘Ne ka kan ka mun de kɛ walisa ne ka ta’a fɛ ka to ka taa lajɛw ani waajulibaara la tuma bɛɛ ani ka to ka ne ka yɛrɛ kalan kɛ?’ (Jos. 1:8; Mat. 28:​19, 20; Heb. 10:25). I tilala kalan min na, i tun bɛ kow ɲɛnabɔ o waati la cogo min na, i hakili jagabɔ o kan. I yɛrɛ ɲininka, ne ye san tɛmɛnen minnu kɛ lakɔli la, yala ne sera ka fɛn nafamaw bila jɔyɔrɔ fɔlɔ la wa? N’i y’a jateminɛ ko, e tun bɛ se ka kow kɛ ka ɲɛ ka tɛmɛ i tun b’a kɛ cogo min na kan, i bɛ se ka yɛlɛma jumɛn de don kow la sisan? I jija walisa i ka ta’a fɛ ka caman kɛ Jehova ka baara la, i kɛtɔ k’i ka kalan walima i ka fɔrmasiyɔn kɛ. I ka kalan ta sɛbɛ la, nka kana a to o ka nɔ bila i ka Ala bato la cogo si la.a—Mat. 6:24.

6. I bɛ se ka ɲininkali jumɛnw de kɛ i yɛrɛ la walisa ka i yɛrɛ sɛgɛsɛgɛ k’a dɔn n’i bɛ ka Jehova ka baara bila jɔyɔrɔ fɔlɔ la i ka ɲɛnamaya kɔnɔ? (Ja fana lajɛ).

⁶ I mana i ka fɔrmasiyɔn daminɛ, to ka i yɛrɛ sɛgɛsɛgɛ, kalo o kalo ni o bɛ se ka kɛ. I yɛrɛ ɲininka: ‘Yala ne bɛ ka Jehova bila jɔyɔrɔ fɔlɔ la ne ka ɲɛnamaya kɔnɔ hali bi wa?’ Taamashyɛn ninnu bɛ se ka i dɛmɛ ka o jaabi sɔrɔ. Misali la, yala sisan i bɛ to ka lajɛ dɔw jɛ walima ka to ka na k’a sɔrɔ lajɛw daminɛna wa? Baara minnu kalifara i la i ka fɔrmasiyɔn kɔnɔna na, k’i to lajɛ la, yala i hakili bɛ to ka taa olu de kan wa? Walima sisan, i bɛ to ka lajɛw kɛ wideyokonferansi dɔrɔn de kan wa? A lajɛ n’i ka deliliw, i ka Bibulu kalan ani i ka waajulibaara ma kɛ dagabɔndalako ye, o kɔrɔ ka to ka taa waajuli la ka d’a kan dɔrɔn i ka kan ka o kɛ. N’i ye nin ko dɔ la kelen jateminɛ i yɛrɛ la, yɛlɛma don kow la joona. Kana a to i ka kalan walima i ka fɔrmasiyɔn k’i bali ka Jehova ka baara bila jɔyɔrɔ fɔlɔ la i ka ɲɛnamaya kɔnɔ.

“KO SƐNSƐNI HAKILI MARA”

7. I bɛ ka kalan walima fɔrmasiyɔn min kɛ, o bɛ se ka nɔ jumɛn de bila i miiricogo la?

⁷ Mun de bɛ se k’i bali k’o kɛ? Nin diɲɛ “hakilitigiya kalan ni lafili kuma fu” bɛ se ka nɔ bila i la i kɛtɔ k’i ka kalan walima i ka fɔrmasiyɔn kɛ. Kalan min b’a fɔ ko Ala tɛ yen ani ko fɛnw nana yɛlɛma-yɛlɛmali de fɛ, o kalan sen b’o la (Kol. 2:8). O bɛ se k’a to, i k’i jigi da i yɛrɛ kan sani i k’i jigi da Jehova kan. Balimakɛ funankɛnin dɔ y’a fɔ ko: “Ne hakili b’a la ko, u tun tɛ dan dɔrɔn k’an dege an ka baara la, nka u tun b’an miiricogo yɛrɛ de yɛlɛma, wa tuma caman o miiricogo ni Jehova ta tɛ bɛn. Misali la, u tun b’an kalan ko an bɛ ɲɛtaa sɔrɔ an yɛrɛ ka cɛsiri dɔrɔn de la walima an yɛrɛ dɔrɔn ka barika la. O ye ne bila ka miiri ko ne mago tɛ Jehova la ne ka ɲɛnamaya kɔnɔ. O la, a tun man nɔgɔn ne bolo ne ka ne jigi da Jehova kan.”

8. Mun na a nafa ka bon an ka “ko sɛnsɛni hakili mara”? (Ntalenw 5:​1, 2)

⁸ Ntalenw 5:​1, 2 kalan. Bibulu b’an lasɔmi ko an ka kan ka “ko sɛnsɛni hakili mara”, o kɔrɔ, ka se ka kow sɛgɛsɛgɛ walisa k’u faranfasiya ka bɔ ɲɔgɔn na. N’a fɔra ko an ka fɛn dɔ mara ka ɲɛ, o b’a jira ko ni an m’an janto an yɛrɛ la, dɔ bɛ se k’a bɔsi an na walima k’a tiɲɛ. An ka ko sɛnsɛni hakili fana bɛ o cogo de la. Sitanɛ n’a ka diɲɛ b’a fɛ k’o minɛ an na (1 Pi. 5:8). Nin diɲɛ hakilinaw bɛ se k’an jogow tiɲɛ ani ka to an bɛ sigasiga ni Ala de ye nin diɲɛ na kɔnɔnafɛnw da walima yɛrɛ ni Ala bɛ yen. Lakɔli karamɔgɔ ni mɔgɔ wɛrɛw bɛ se k’i bila k’a miiri ko olu bɛ min miiri o ko kan, o de ye “hakilitigiya” ye, nka hakilitigiya tɛ. Nka tiɲɛ yɛrɛ la, “nin diɲɛ ka hakilitigiya ye nalonmaya ye Ala ɲɛ na.”—1 Kɔr. 3:​18-20.

9. I bɛ se ka mun de kɛ walisa k’i ka ko sɛnsɛni hakili mara?

⁹ Sani i ka kalan walima i ka fɔrmasiyɔn daminɛ, i bɛ se ka mun de kɛ? Ni b’a fɛ k’i ka ko sɛnsɛni hakili mara, i ka dannaya min sinsinnen bɛ Bibulu kan, i jija ka o kologɛlɛya sani i ka kalan walima fɔrmasiyɔn daminɛ. Ɲininkali ninnu kɛ i yɛrɛ la: ‘Mun na ne dalen bɛ Ala la? Mun de b’a jira ne la ko Bibulu ye Ala ka kuma ye? Mun na ne dalen b’a la ko Bibulu bɛ min fɔ jogo ko ta fan fɛ, o ka fisa ni diɲɛ mɔgɔw ka hakilinata ye?’ I tilala kalan min na, i tun bɛ kow ɲɛnabɔ cogo min na o waati la, i hakili jagabɔ o kan. Siga t’a la ko i ye san tɛmɛnnen minnu kɛ lakɔli la, i tun mago b’a la ka diɲɛ miiricogo kɛlɛ tuma bɛɛ. Ikomi dɔw tun dalen b’a la ko fɛnw nana yɛlɛma-yɛlɛmali de fɛ, yala o ye dɔ bɔ i ka dannaya barika la wa? Yala i kalanden ɲɔgɔnw tun bɛ ko lankolon minnu kɛ, olu nege tun bɛ i minɛ wa? Ni y’a jateminɛ ko i tun bɛ se ka kow kɛ ka ɲɛ ka tɛmɛ i tun b’a kɛ cogo min na o waati la, i bɛ se ka mun de kɛ walisa k’i ka dannaya barika bonya kabini sisan? I jija walisa k’i ka ko sɛnsɛni hakili mara i kɛtɔ k’i ka kalan walima i ka fɔrmasiyɔn kɛ.—2 Tim. 2:​16-18.b

10. I bɛ se ka ta’a fɛ cogo di k’i ka ko sɛnsɛni hakili mara?

¹⁰ I mana i ka kalan walima i ka fɔrmasiyɔn daminɛ, to k’i yɛrɛ sɛgɛsɛgɛ tuma bɛɛ. I yɛrɛ ɲininka: ‘Mɔgɔ minnu bɛ ne lamini, olu ka ɲɛnamaya kɛcogo min ni Ala ka sariyakolow tɛ bɛn, yala o bɛ ka nɔ bila ne la wa? Yala ne bɛ se ka nin diɲɛ in ka hakilitigiya kalan fu faranfasiya wa? Yala ne dalen b’a la ko Ala ka masaya kelenpe de bɛ se ka hadamadenw ka gɛlɛyaw ɲɛnabɔ wa?’ Ni b’a fɛ ka ko sɛnsɛni hakili mara, ta’a fɛ ka to ka Ala ka kuma kalan kosɛbɛ. N’i bɛ to ka Bibulu kalan ka ɲɛ ani k’i hakili jagabɔ a kan, o bɛna i dɛmɛ k’a da a la ko i bɛ tiɲɛ sira kan.—1 Tim. 4:15.

WAATI MIN B’I BOLO, BAARA KƐ N’O YE NI HAKILITIGIYA YE

11. Waati min b’i bolo, mun na a bɛ se ka gɛlɛya i ma ka baara kɛ n’o ye ni hakilitigiya ye i kɛtɔ k’i ka kalan walima i ka fɔrmasiyɔn kɛ?

¹¹ Mun de bɛ se k’i bali k’o kɛ? Kalan walima fɔrmasiyɔn lise kɔfɛ bɛ se ka waati caman ɲini i fɛ, kɛrɛnkɛrɛnnenya la examen waati la walima ni baara dɔ kalifara i ma. Waati min b’i bolo, n’i ma baara kɛ n’o ye ka ɲɛ, i hakili bɛ se ka ɲagami. I bɛ se ka laban ka bana dɔ sɔrɔ min tɔgɔ ye ko burnout, o min b’a to i fari bɛ faga i kan kosɛbɛ sɛgɛn kojugu kosɔn. O de kama i ka kan k’i janto i ka kɛnɛya la ani ka basigi sɔrɔ.

12. Ni b’a fɛ “ka waati kunmabɔ” ka ɲɛ, i ka kan k’i hakili to fɛn jumɛnw de la? (Efesekaw 5:​15, 16).

¹² Efesekaw 5:​15, 16 kalan. Ka to “ka waati kunmabɔ”, o man nɔgɔn. O la, an ka kan ka fɛn minnu bɛɛ kɛ, fo an ka waati tila u ni ɲɔgɔn cɛ k’u bɛrɛ bɛn. Misali la, hali n’i ka kan k’i sɛbɛ don i ka kalan na, i ka kan ka waati ta fana walisa ka jɛɲɔgɔnya ɲuman kɛ ni balima krecɛnw ni somɔgɔw ye (Zab. 133:1; Nt. 18:1). Wa a to i hakili la fana ko, i ka kan ka fɛn minnu kɛ walisa ka gɛrɛ Ala la, olu kɛli nafa ka bon ka tɛmɛ fɛn bɛɛ kan (Mat. 6:33). A bɛ se ka kɛ ko i ka kan k’i janto i ka denbaya la ani k’i ka baara kɛ fana. Ka fara o kan, i ka kan k’i janto i ka kɛnɛya ko la, i kɛtɔ k’i lafiya ka ɲɛ ani k’i farikolo ɲɛnajɛ (Waaj. 4:6; 1 Tim. 4:8). Walisa an ka se ka o kow bɛɛ kɛ, fo an ka to k’an ka waati boloda ka ɲɛ.

13. I bɛ se ka waati kunmabɔ cogo di?

¹³ Sani i k’i ka kalan walima fɔrmasiyɔn daminɛ, i bɛ se ka mun de kɛ? Bibulu b’a fɔ ko mɔgɔ min bɛ a ka kow boloda ka ɲɛ, a ka ko latigɛlenw bɛɛ bɛna ɲɛ a bolo (Nt. 21:5). O la porogaramu ɲuman sigi i yɛrɛ ye sani i k’i ka kalan walima i ka fɔrmasiyɔn daminɛ. Walisa i ka se k’o kɛ, i yɛrɛ ɲininka: Ne ye san tɛmɛnen minnu kɛ lakɔli la, yala ne tun bɛ ka waati boloda ka ɲɛ wa? N’i y’a jateminɛ ko e tun bɛ se ka kow kɛ ka ɲɛ ka tɛmɛ i tun b’a kɛ cogo min na kan, a ɲini ka yɛlɛma don kow la kabini sisan. I jija ka to k’i ka waati boloda ka ɲɛ walisa waati kana taa ka ic bolo dan.

14. Ɲininkali sugu jumɛnw de bɛ se k’i dɛmɛ k’i yɛrɛ sɛgɛsɛgɛ?

¹⁴ I mana i ka kalan walima i ka fɔrmasiyɔn daminɛ, to k’i yɛrɛ sɛgɛsɛgɛ tuma bɛɛ. Ɲininkali ninnu kɛ i yɛrɛ la: ‘Yala ne ka waati boloda cogo bɛ ne dɛmɛ ka waati sɔrɔ ka ne yɛrɛ lafiya ani ka ne farikolo ɲɛnajɛ wa? Yala ne bɛ waati sɔrɔ ka to ka ne ɲɛnajɛ ni ne ka jɛkulu kɔnɔ mɔgɔw ye wa? Lakɔli karamɔgɔw bɛ baara minnu kalifa ne ma, yala ne bɛ ka olu kɛ ka bɛn n’u waati ye wa? N’i ka jaabi ye ayi ye o ɲininkaliw la, i yɛrɛ ɲininka: Yala ne ka baara ka ca ne yɛrɛ ma kojugu de wa, walima ne de tɛ k’u kɛ u waati la wa? Yala ne teriw ni ne somɔgɔw bolo, ne ka kan ka ne ka waati boloda cogo jateminɛ wa?’ A mana kɛ ko i ka kan k’i ka waati boloda cogo jateminɛ walima i ka kan k’i yɛrɛ kolo walisa ka kow kɛ u waati bɛnnen na, i jija ka yɛlɛma don kow la joona. I dɔnbaga minnu bɛ to k’u ka waati boloda ka ɲɛ, i bɛ se ka dɛmɛ ɲini olu fɛ.—Nt. 11:14.

TA’A FƐ “KA TAAMA HAKILITIGIW FƐ”

15. I kalanden ɲɔgɔnw bɛ se ka mun de ɲini fɛ ani mun na i ka kan k’i janto i yɛrɛ la?

¹⁵ Mun de bɛ se k’i bali ka o kɛ? I kɛtɔ k’i ka kalan walima i ka fɔrmasiyɔn kɛ, i kalanden ɲɔgɔnw bɛ se k’a ɲini i fɛ i ka fara u kan u ka ɲɛnajɛ kow la. A bɛ se ka kɛ ko ka tugu u kɔ, o nege bɛ i minɛ, ka d’a kan aw si hakɛ ye kelen ye, aw diyanye fɛnw ye kelen ye wa aw bɛ waati caman kɛ ɲɔgɔn fɛ kalasi kɔnɔ. A bɛ se ka kɛ i b’a miiri ko, i ni olu ka ko yecogo ye kelen ye ka tɛmɛ i balima dɔw kan jɛkulu kɔnɔ. Nka i ka kan k’i janto i yɛrɛ la. Hali ni aw bɛ kalasi kelen kɔnɔ, a to i hakili la ko tiɲɛ ye min ye, o ye ko aw ka kow yecogo tɛ kelen ye, ka d’a kan e b’a fɛ ka kodiya Jehova ye. N’i tora ka waati caman kɛ n’u ye, u ka kow yecogo bɛna nɔ bila i la (1 Kɔr. 15:33). Michael, min ye san naani kɛ kuran baara kalan na, ale y’a jateminɛ ko, o kuma ye tiɲɛ ye. A ko: “Ne tun bɛ lɛrɛ 40 ɲɔgɔn de kɛ ni ne kalanden ɲɔgɔnw ye dɔgɔkun o dɔgɔkun. U tun bɛ kuma nɔgɔlenw fɔ, ka dɔnkiliw lamɛn minnu bɛnnen tɛ Jehova Seerew ma ani u tun tɛ musow bonya. O y’a to u ka kow yecogo y’a daminɛ ka nɔ bila ne la.”

16. Ka “taama hakilitigiw fɛ” o kɔrɔ ye mun de ye? (Ntalenw 13:20).

¹⁶ Ntalenw 13:20 kalan. Bibulu b’an lasɔmi ko ka taama ni jɛɲɔgɔn juguw ye, o bɛ tɔɔrɔ lase an ma. Nka, “mɔgɔ min bɛ taama hakilitigiw fɛ, o na kɛ hakilitigi ye.” O kuma kɔrɔ jɛlen don: An b’a sugandi ka waati caman kɛ ni mɔgɔ minnu ye, olu bɛ nɔ bila an na, a bɛ se ka kɛ nɔ ɲuman walima nɔ jugu ye. O la, mɔgɔ minnu bɛ i ka hɛrɛ ɲini, teriya kɛ ni olu ye, o kɔrɔ, mɔgɔ minnu bɛ Jehova kanu ani k’a bato n’u dusu bɛɛ ye, i ko e yɛrɛ.—Zab. 101:​6, 7; 119:63.

17. An bɛ se ka mun de kɛ walisa an kana taama ni jɛɲɔgɔn juguw ye?

¹⁷ Sani i k’i ka kalan walima fɔrmasiyɔn daminɛ, i bɛ se ka mun de kɛ? I bɛ se ka dan min sigi i n’i kalanden ɲɔgɔnw ka jɛɲɔgɔnya la, o latigɛ. Jehova seere dɔ min tɔgɔ ye ko Trenton y’a fɔ ko: “Ne bɛ to ka ɲumanya jira ne kalanden ɲɔgɔn bɛɛ la, nka ne tɛ jɛɲɔgɔnya si kɛ n’u ye n’an jiginna ka bɔ lakɔli la. Ne bolo, ne kalanden ɲɔgɔnw dɔrɔn de don, ne teriw tɛ.” E dun, i bɛna dan jumɛn de sigi i ni kalanden ɲɔgɔnw ka jɛɲɔgɔnya la? Nin ɲininkali ninnu bɛ se k’i dɛmɛ k’o jaabi sɔrɔ: I ye san tɛmɛnnen minnu kɛ lakɔli la, i miiri o la. E tun ye dan jumɛn de sigi i ni kalanden ɲɔgɔnw ka jɛɲɔgɔnya la? N’i y’a jateminɛ ko e tun bɛ se ka kow kɛ ka ɲɛ ka tɛmɛ i tun b’a kɛ cogo min na kan, i bɛ se ka yɛlɛma jumɛn de don kow la sisan? I jija ka ta’a fɛ ka “taama hakilitigiw fɛ” ani ka ban ka jɛɲɔgɔnya kɛ ni mɔgɔw ye minnu tɛ Jehova kanu.d

18. I ka kan ka ɲininkali jumɛnw de kɛ i yɛrɛ la? (Ja fana lajɛ).

¹⁸ I mana i ka kalan walima i ka fɔrmasiyɔn daminɛ, to ka i yɛrɛ sɛgɛsɛgɛ tuma bɛɛ. Ɲininkali ninnu kɛ i yɛrɛ la: ‘Yala ne nin n’kalanden ɲɔgɔnw ka surun ɲɔgɔnna kojugu wa? Yala u kumacogo, u ka kɛwalew ani u delina kow bɛ ka nɔ bila ne kumacogo ani ne miiricogo la wa? Jehova bɛ mun de miiri ne ni ne kalanden ɲɔgɔnw ka jɛɲɔgɔnya la?’ (Zab. 1:1). N’i y’a jateminɛ ko i ka kan ka yɛlɛma don kow la, o kɛ joona. I jija walisa i teri sɛbɛw ka kɛ mɔgɔw ye, minnu bɛ Jehova kanu iko e yɛrɛ, wa to k’i ka dannaya kofɔ i kalanden ɲɔgɔnw ye, ka d’a kan e kelenpe de bɛ se k’u dɛmɛ ka tiɲɛ dɔn.

I LABƐN KABINI SISAN

19. Gɛlɛya minnu bɛ se k’i sɔrɔ, i kɛtɔ ka kalan walima ka fɔrmasiyɔn dɔ kɛ, i bɛ se k’i labɛn olu kama cogo di? Misali dɔ fɔ.

¹⁹ Ni mɔgɔ hakilitigi dɔ b’a fɛ ka taa yaala kungokolon dɔ kɔnɔ, a bɛ fɔlɔ k’i labɛn ka ɲɛ. Misali la, a b’a yɛrɛ ɲininka ni a ka kɛnɛ walisa ka o taama jan kɛ, ni fini bɛnnen b’a bolo ka taa o yɔrɔ la ani n’a bɛ o sira dɔn ka ɲɛ. O cogo la, fɛn minnu bɛ se k’a sɔrɔ o sira kan, hali ni a tɛ olu bɛɛ dɔn, a bɛ se k’i labɛn ka ɲɛ sani a ka taa. O cogo kelen na, sani i k’i ka kalan walima i ka fɔrmasiyɔn daminɛ, i jija k’i ka dannaya kologɛlɛya. “Ala ka kɛlɛkɛ minɛnw bɛɛ ta” fana, wa a to i hakili la ko i ka kuntilenna tɛ ka wari caman sɔrɔ walima ka kɛ mɔgɔba dɔ ye nin diɲɛ in kɔnɔ. I b’a fɛ i ka ko kɛtaw bɛɛ ka nɔɔrɔ da Jehova kan.—Efe. 6:​11-13; 1 Kɔr. 9:​26, 27; 10:31.

20. I bɛ se ka ta’a fɛ k’i yɛrɛ sɛgɛsɛgɛ cogo di walisa k’a dɔn n’i bɛ dannaya sira kan?

²⁰ Bibulu bɛ nin de ɲini an fɛ: “A’ ye aw yɛrɛw sɛgɛsɛgɛ ka aw yɛrɛw kɔrɔbɔ k’a filɛ yala ni aw bɛ dannaya sira kan.” (2 Kɔr. 13:5). Tugu o laadilikanw kɔ i kɛtɔ k’i ka kalan walima i ka fɔrmasiyɔn kɛ. Barokun in kumana fɛn naani minnu kan, to k’i yɛrɛ sɛgɛsɛgɛ olu kan tuma bɛɛ. I ka delina kow alako ta fan fɛ, yala i bɛ ka ta’a fɛ ka olu kɛ wa? Mɔgɔw bɛ min wele hakilitigiya nin diɲɛ in kɔnɔ, yala i bɛ ka i yɛrɛ tanga o ma wa? Yala i bɛ ka hakilitigiya jira i ka waati boloda cogo la wa? Yala i bɛ ka i teriw sugandi i balima krecɛnw cɛma ani k’i ban ka taama ni jɛɲɔgɔn juguw ye wa? I ka kan k’o ɲininkaliw kɛ i yɛrɛ la, i mana kɛ lakɔli la, baara kɛyɔrɔ la walima yɔrɔ wɛrɛ la. I jija walisa i ka dannaya kologɛlɛyalen ka to i ka ko cogoya mana kɛ fɛn o fɛn ye. Da a la ko i bɛ cɛsiri minnu kɛ walisa ka ta’a fɛ ka gɛrɛ Jehova la, a bɛna duba i ye olu kosɔn.—Nt. 3:​5, 6.