Kalan ani fɔrmasiyɔn minnu bɛ kɛ lise kɔfɛ: latigɛli ɲumanw kɛ ka ɲɛsin olu ma

1-2. (a) Funankɛninw ka kan ka sugandili jumɛnw de kɛ? (b) Ni a fɔra ko “kalan walima fɔrmasiyɔn lise kɔfɛ”, o ɲɛsinnen bɛ kalan ni fɔrmasiyɔn sugu jumɛnw de ma? (“Kuma dɔ ɲɛfɔli yɔrɔ” lajɛ).

“E B’A FƐ ka baara sugu jumɛn de kɛ n’i kɔrɔbayara?” N’a y’a sɔrɔ i ye denmisɛnnin ye, siga t’a la ko mɔgɔw delila ka o ɲininkali kɛ i la siɲɛ caman. K’a sugandi ka i ka waati bɛɛ di Jehova ma i ka ɲɛnamaya kɔnɔ, o de ye baaraw bɛɛ la ɲuman ye i bɛ se ka min sugandi. Nka, i ka kan ka baara kɛ fana walisa ka i dahirimɛ sɔrɔ (2 Tes. 3:10). Siga t’a la ko i b’a fɛ ka baara min kɛ kɔfɛ ni i kɔrɔbayara, i miirila o la ka ban.

² Walisa u ka se ka baara sɔrɔ, funankɛnin dɔw b’a sugandi ka kalan walima fɔrmasiyɔn dɔ kɛ lise kɔfɛa. Tuma caman na, u bangebagaw bɛ u dɛmɛ ka o sugandili kɛ. A bɛ se ka kɛ ko i bɛ ka i yɛrɛ ɲininka n’a y’a sɔrɔ i bɛna kalan walima fɔrmasiyɔn dɔ kɛ lise kɔfɛ. N’i b’a fɛ ka o kɛ, i bɛ se ka kalan walima fɔrmasiyɔn sugu jumɛn de kɛ? Nin barokun in bɛna kuma Bibulu sariyakolo dɔw kan minnu bɛ se ka i dɛmɛ i ka sugandili ɲuman kɛ kalanko ta fan fɛ. N’i ye i hakili jagabɔ k’a ɲɛ, o bɛna i dɛmɛ ka latigɛli ɲumanw kɛ. Hali n’a y’a sɔrɔ barokun in ɲɛsinnen bɛ funankɛninw de ma, a bɛ se ka krecɛn bɛɛ kelen-kelen dɛmɛ u ka latigɛli ɲumanw kɛ kalanko ni fɔrmasiyɔn ko ta fan fɛ. A bɛ se ka bangebagaw fana dɛmɛ u ka u denw bilasira ka ɲɛ kalanko ta fan fɛ.

YALA I KA KAN KA KALAN WALIMA FƆRMASIYƆN DƆ KƐ LISE KƆFƐ WA?

3. Kun jumɛnw na krecɛn dɔw b’a sugandi ka kalan walima fɔrmasiyɔn dɔ kɛ lise kɔfɛ?

³ Yɔrɔ dɔw la, mɔgɔ bɛ se ka baara sɔrɔ i bɛ i dahirimɛ sɔrɔ min na k’a sɔrɔ i ma kalan walima fɔrmasiyɔn kɛrɛnkɛrɛnnen fosi kɛ lise kɔfɛ. Nka yɔrɔ wɛrɛw la, fo i ka kalan walima fɔrmasiyɔn dɔ de kɛ lise kɔfɛ walisa i ka se ka baara sɔrɔ min b’a to i ka i dahirimɛ sɔrɔ walima i ka se ka baara sɔrɔ i tɛ lɛrɛ caman kɛ min na. Tiɲɛ don ko, o kalan walima o fɔrmasiyɔn suguw bɛ se ka krecɛnb dɛmɛ a ka baara sɔrɔ min b’a to a ka se ka waati caman kɛ waajulibaara la walima ka baara suguya wɛrɛw kɛ Jehova ye. Nka o kalan ni o fɔrmasiyɔn sugu bɛ se ka krecɛn bila a ka ko nafama dɔw kɛ bolokɔfɛkow ye ani ka gɛlɛya dɔw lase a ma.

4. Ni krecɛn dɔ b’a fɛ ka kalan walima fɔrmasiyɔn dɔ kɛ lise kɔfɛ, jɔn de ka kan ka latigɛli kɛ a ye? (Duguma sɛbɛni fana lajɛ).

⁴ Bibulu b’a fɔ ko “bɛɛ kelen-kelen na a yɛrɛ ka doni ta.” (Gal. 6:5). O la, krecɛn minnu ye balikuw ye, olu bɛɛ kelen-kelen de ka kan ka a sugandi u yɛrɛ ye, n’a y’a sɔrɔ u b’a fɛ ka kalan walima fɔrmasiyɔn kɛrɛnkɛrɛnnen dɔ kɛ.c Bangebagaw de ka kan ka latigɛliw kɛ ka ɲɛsin u denw ka kalanko ma (Efe. 6:1). Bangebagaw ka laadilikanw bɛ se ka u denw dɛmɛ ka latigɛli ɲumanw kɛ u ka kalan ni u ka fɔrmasiyɔn ko ta fan fɛ ni u kɔrɔbayara—Nt. 22:6.

5. Tuma jumɛn na i ka kan ka i miiri n’a y’a sɔrɔ i ka kan ka kalan walima fɔrmasiyɔn dɔ kɛ lise kɔfɛ ani mun na i ka kan ka i hakili jagabɔ o kan? (Ja min bɛ ɲɛ fɔlɔ kan, o fana lajɛ.)

⁵ N’i b’a fɛ ka kalan walima fɔrmasiyɔn dɔ kɛ lise kɔfɛ, i bɛ se ka kɔn ka o latigɛli kɛ sani i ka tila kalan na. Nka sani i ka o latigɛli sugu kɛ, i ka kan ka kɔn ka kuma i bangebagaw fɛ o ko kan. O la, i bangebagaw bɛna waati caman sɔrɔ ka u hakili jagabɔ ani ka ɲininiw kɛ o ko kan. U bɛ se fana k’i dɛmɛ ka kalan dɔ walima baara dɔ sugandi i bɛ se ka min kɛ kɔfɛ. Nka yala a waajibiyalen don bangebagaw ka latigɛli kɛ nin ko ninnu bɛɛ kan sani u den ka tila kalan na lise la wa? Ayi, o tɛ waajibi ye (Nt. 21:5). Ni funankɛnin dɔw tilala kalan na lise la, u b’a sugandi ka baara dɔ ɲini fɔlɔ ani ka kɛ tutigɛbagaw ye. O kɔfɛ de, u b’a jateminɛ ni u bɛna kalan walima fɔrmasiyɔn dɔ kɛ walima ni u tɛna o kɛ. Dɔw yɛrɛ bɛ yen, minnu bɛ nin latigɛli suguw kɛ k’a sɔrɔ u tɛ denmisɛnw ye tun.

6. Mun de bɛ se ka i dɛmɛ ka latigɛli ɲuman kɛ kalan walima fɔrmasiyɔn ko ta fan fɛ lise kɔfɛ?

⁶ Mun de bɛ se ka i dɛmɛ ka latigɛli ɲuman kɛ kalan ni fɔrmasiyɔn ko ta fan fɛ lise kɔfɛ? Jehova deli o ko la (Yak. 1:5). O kɔ, nin ko fila ninnu kɛ. Fɔlɔ, i yɛrɛ ɲininka kun min na i b’a fɛ ka kalan walima fɔrmasiyɔn dɔ kɛ lise kɔfɛ (Zab. 26:2). Filanan, i b’a fɛ ka kalan walima fɔrmasiyɔn sugu min kɛ, nafa ni kɔlɔlɔ minnu bɛ se ka kɛ o la, i hakili jagabɔ olu kan kosɛbɛ (Nt. 14:15). Sisan, an ka kuma o ko fila kan.

KUN MIN NA I B’A FƐ KA KALAN WALIMA FƆRMASIOYƆN DƆ KƐ LISE KƆFƐ, I HAKILI JAGABƆ O KAN

7. Krecɛn ka kan ka a hakili jagabɔ mun de kan ni a b’a fɛ ka kalan walima fɔrmasiyɔn dɔ kɛ lise kɔfɛ?

⁷ N’i b’a fɛ ka kalan walima fɔrmasiyɔn dɔ kɛ lise kɔfɛ, a nafa ka bon kosɛbɛ i ka i yɛrɛ ɲininka ko: ‘Mun de la ne b’a fɛ ka o kɛ?’ Mɔgɔ caman b’a fɛ ka kalan walima fɔrmasiyɔn dɔ kɛ, ka d’a kan u b’a fɛ ka baara dɔ sɔrɔ min ka di u ye walima min sara ka ca. Yala o ye kojugu ye wa? Ayi (1 Tim. 5:8). Nka, Bibulu bɛ an laadi ko, an kana wari bila jɔyɔrɔ fɔlɔ la an ka ɲɛnamaya kɔnɔ ani ko, an kana a miiri ko wari dɔrɔn de bɛ se ka an lakana (Nt. 23:​4, 5; 1 Tim. 6:​8-10; 1 Yuh. 2:17). N’i b’a fɛ ka kalan walima fɔrmasiyɔn dɔ kɛ walisa i ka kɛ nafolotigi walima tɔgɔtigi ye, i tɛna nisɔndiya sɔrɔ o la, wa i ni Jehova ka teriya bɛ se ka tiɲɛ fana.

8-9. (a) Krecɛn ka kan ka kalanko jate cogo jumɛn na? (Matiyu 6:33) (b) I bɛ se ka kalan jumɛn de sɔrɔ ka bɔ Josefina, Morine, ani Iris ka kumaw la?

⁸ An ka kan ka o fɔrmasiyɔn suguw kɛli jate cogo di? Jehova batoli de ka kan ka kɛ fɛnw bɛɛ la nafamaba ye an bolo (Mat. 22:​37, 38; Fil. 3:8). O la, a to i hakili la ko kalan walima fɔrmasiyɔn kɛli ye sababu dɔ dɔrɔn de ye min b’a to i ka se ka baara sɔrɔ i bɛ se ka i dahirimɛ sɔrɔ min na ani ka i dɛmɛ k’i seko bɛɛ kɛ Jehova batoli la.—Matiyu 6:33 kalan.

⁹ Mun de ye funankɛnin dɔw dɛmɛ u ka o kalan walima o fɔrmasiyɔn suguw jate i n’a fɔ Jehova bɛ u jate cogo min na? Balimamuso Josefina, min bɛ bɔ Chili jamana na, o y’a fɔ ko: “Ne y’a sugandi ka fɔrmasiyɔn dɔ kɛ walisa ka baara sɔrɔ min b’a to ne ka n’seko bɛɛ kɛ Jehova ka baara la. Ne y’a to ne hakili la ko, fɛn min nafa ka bon ne ka ɲɛnamaya kɔnɔ, o tɛ ne ka fɔrmasiyɔn ye, nka o ye ne ni Jehova ka teriya de ye. Balimamuso dɔ, min tɔgɔ ye ko Morine, o y’a sugandi ka fɔrmasiyɔn dɔ kɛ san kelen kɔnɔna na walisa ka kɛ kundilana ye. Mun na? A ko: “Ne ka laɲini tun ye ka taa waajuli kɛ yɔrɔ la mɔgɔw mago bɛ dɛmɛ na yɔrɔ min na. O de kosɔn, ne y’a ɲini ka fɔrmasiyɔn dɔ kɛ min b’a to ne ka se ka o kuntilenna dafa. Ne ka fɔrmasiyɔn bannen kɔfɛ, ne ye mɔgɔw kun dilan ani ka wari dɔnni mara walisa, mɔgɔw mago bɛ dɛmɛ na waajulibaara la yɔrɔ min na, ne ka se ka yɛlɛma yen. Ne yɛlɛmalen o yɔrɔ la, ne ye fɔrmasiyɔn min kɛ, o ye ne dɛmɛ ka baara sɔrɔ.” Iris fana ye balimamuso dɔ ye, min ye kalan jan dɔ kɛ lise kɔfɛ walisa ka kɛ ɲin furakɛla ye. Ale ko: Ka kalan walima fɔrmasiyɔn dɔ kɛ lise kɔfɛ, o bɛ se ka an nafa nka a tɛ se ka hɛrɛ lakika lase an ma. Nka ni an ye Jehova bila jɔyɔrɔ fɔlɔ la an ka ɲɛnamaya kɔnɔ, a bɛna cogoya bɛɛ kɛ walisa an nisɔndiyalen ka to ani an ka an dahirimɛ sɔrɔ. Jɛɲɔgɔnya ɲuman min bɛ an ni Jehova cɛ, ni an ye o bila jɔyɔrɔ fɔlɔ la an ka ɲɛnamaya kɔnɔ, o bɛ an dɛmɛ ka latigɛli ɲumanw kɛ minnu bɛ hɛrɛ lase an ma fo abada.

I B’A FƐ KA KALAN WALIMA FƆRMASIYƆN MIN KƐ, I HAKILI JAGABƆ O KAN

10. Sariyakolo min bɛ sɔrɔ Dutɛrɔnɔmɛ 32:29 kɔnɔ, o bɛ se ka i dɛmɛ cogo di ni i b’a fɛ ka a latigɛ ka kalan walima fɔrmasiyɔn dɔ kɛ lise kɔfɛ?

¹⁰ A bɛ se ka kɛ ko i b’a fɛ ka baara sugu min kɛ, o bɛ i hakili la ka ban. Nka kana ɲinɛ ka i hakili jagabɔ baara suguya wɛrɛw kan, baara min bɛ i hakili la, a bɛ se ka kɛ o baara sugu ye walima baara sugu wɛrɛ (O hakilina sanga ni Ntalenw 18:17 ye). Bi bi in na, fɔrmasiyɔn suguya caman bɛ yen minnu tun tɛ yen fɔlɔ. Nka sisan i bɛ se ka olu dɔw kɛ hali intɛrinɛti kan. Kana ɲinɛ fana ka i hakili jagabɔ n’a y’a sɔrɔ i bɛ se ka i dahirimɛ sɔrɔ k’a sɔrɔ i ma kalan walima fɔrmasiyɔn fosi kɛ lise kɔfɛ. Misali la, Johanna, min bɛ bɔ Finlande jamana na, ale ma kalan walima fɔrmasiyɔn fosi kɛ lise kɔfɛ. A ko: “Ne tilalen kɔ lakɔli la, ne ye baara dɔ daminɛ min tɛ waati caman ta ani ka tutigɛbagaya baara fana daminɛ. Ne ye baara suguya caman kɛ. O ye ne dɛmɛ k’a faamu ko Jehova bɛ a ka layidu tiimɛ tuma bɛɛ. A bɛ an magoɲɛfɛnw di an ma”. A to i hakili la ko i bɛ latigɛli minnu kɛ ka ɲɛsin kalan ko walima fɔrmasiyɔn ko ma lise kɔfɛ, olu bɛ se ka nafa walima kɔlɔlɔ lase i ma. O la, i yɛrɛ ɲininka: Ne b’a fɛ ka kalan walima fɔrmasiyɔn min kɛ yala o nafaw ka ca ka tɛmɛn a kɔlɔlɔw kan wa? (Dutɛrɔnɔmɛ 32:29 kalan; 1 Kɔr. 10:23) An ka kuma fɛn nafaman dɔw kan minnu bɛna i dɛmɛ ka nin ɲininkali jaabi.

11. Mun na a nafa ka bon i bɛna waati hakɛ min kɛ kalan walima fɔrmasiyɔn kɛli la lise kɔfɛ, i ka i hakili jagabɔ o kan? (Jaw fana lajɛ).

¹¹ I bɛna waati min kɛ o kalan walima fɔrmasiyɔn na, o jateminɛ. I bɛna waati hakɛ min kɛ o kalan walima fɔrmasiyɔn kɛli la dɔgɔkun o dɔgɔkun ani i ka karamɔgɔw bɛna baara wɛrɛ minnu di i ma k’a kɛ so, i hakili jagabɔ olu kan. Yala i bɛna se ka waati sɔrɔ i ka alako baaraw kama ani ka i mago don i ka denbaya la wa? (Fil. 1:10). Yala i ka o kalan walima o fɔrmasiyɔn bɛ se k’a to i bɛ sɛgɛn kojugu fo i tɛ se ka lajɛw labɛn ani k’i ka yɛrɛ kalan kɛ wa? O ɲɔgɔn de ye Jeroz sɔrɔ, min bɛ bɔ Ɛndi. A ko: “A tun ka gɛlɛn ne ma ne ka n’sinsin n’ka alako baaraw kan. Tuma dɔw la, ne tun tɛ taa lajɛw la yɛrɛ. Kɔfɛ, ne kɛlen ka n’hakili jagabɔ, ne y’a ye ko ne ye n’fanga ani ne ka waati caman tiɲɛ nin fɔrmasiyɔn kɛli la. Kalan dɔw bɛ yen minnu tɛ waati caman ta. Wa dɔ wɛrɛw fana bɛ yen minnu t’a ɲini i fɛ i ka lakɔli baara caman kɛ so. Misali la, Rabeca, min bɛ bɔ Mozambiki jamana na, ale nisɔndiyara a ka latigɛli la kalan ko ta fan fɛ. A ko: “Ne ye fɔrmasiyɔn min kɛ, o tun tɛ tɛmɛn lɛrɛ fila kan tile kɔnɔ. O y’a to ne sera ka ta’a fɛ ka tutigɛbagaya baara kɛ.”

12. Walisa ka baara kɛ ni i ka waati ye ka ɲɛ, i ka kan ka i yɛrɛ ɲininka mun de la? (Waajulikɛla 12:1)

¹² Kalan walima fɔrmasiyɔn janya. I bɛna kalo hakɛ walima san hakɛ min kɛ o kalan walima o fɔrmasiyɔn kɛli la, i hakili jagabɔ o kan. Yala kalan walima fɔrmasiyɔn in kɛli bɛna a jira ko i bɛ ka baara kɛ ni i ka waati ye ka ɲɛ wa? (Efe. 5:​15-17) N’i ye funankɛnin ye, yala kalan walima fɔrmasiyɔn in b’a to i ka i seko bɛɛ kɛ Jehova ka baara la i ka denmisɛnya waati la wa? Misali la, yala i bɛ se k’i ka waati bɛɛ kɛ alako baaraw la wa? (Waajulikɛla 12:1 kalan). I b’a fɛ ka kalan walima fɔrmasiyɔn min kɛ, yala o ɲɔgɔn wɛrɛw bɛ yen minnu tɛ waati jan ta wa? Misali la, baara yɔrɔ dɔw la, i bɛ se ka baara dege k’a sɔrɔ i ma waati caman ta ani i ma wari caman sara i n’a fɔ a bɛ kɛ inivɛrsite la cogo min na. Mario, min bɛ bɔ Chili jamana na, ale ko: “Ne ye fɔrmasiyɔn dɔ sugandi min bɛ kɛ san fila kɔnɔ wa a sɔngɔ tun ka nɔgɔn ka tɛmɛn inivɛrsite ta kan. Ne tun bɛ fɔrmasiyɔn kɛ siɲɛ naani dɔgɔkun kɔnɔ. O y’a to ne sera ka ta’a fɛ ka n’ka tutigɛbagaya baara kɛ o fɔrmasiyɔn sen fɛ.”

13. Kalan walima fɔrmasiyɔn minnu bɛ kɛ lise kɔfɛ, ni olu kɛyɔrɔ ka jan i ka yɔrɔ la, o bɛ se ka na ni gɛlɛya jumɛnw ye?

¹³ Kalan walima fɔrmasiyɔn kɛyɔrɔ. I bɛ se ka kalan walima fɔrmasiyɔn kɛyɔrɔ sɔrɔ min ka surun i ka yɔrɔ la. Nka n’i ka kan ka taa o kɛ dugu wɛrɛ la dun? Walima ni o kɛli b’a to i ka taa yɛlɛma lakɔliso dɔ la dun? N’i b’a fɛ ka taa kalan walima fɔrmasiyɔn kɛ yɔrɔ dɔ la i ka denbaya tɛ yɔrɔ min na, o bɛ se ka gɛlɛya dɔw lase i ma alako ta fan fɛ, kɛrɛnkɛrɛnenya la n’i bɛ si ni mɔgɔw ye minnu tɛ Jehova bato. (Nt. 22:3; 1 Kɔr. 15:33) Matias ka bɔ Mozambiki, ale tilala san kelen dɔrɔn fɔrmasiyɔn dɔ la min sɔngɔ tun man ca. Nka a nimisara o kɛli la. Mun na? A ko: “Ne tun labanna ka n’ka waati bɛɛ kɛ lakɔliso la ka d’a kan, o yɔrɔ tun ka jan ne ka dugu la. Don o don, kojugu kɛli nege tun bɛ ne minɛ. Ne bolo, ka kalan walima fɔrmasiyɔn dɔ kɛ min tɛna i mabɔ i ka sokɔnɔ mɔgɔw la, o de ka fisa.” An balimamuso dɔ min bɛ bɔ Risi jamana na, o ko: “N’i taara to lakɔliso la, gɛlɛya ni kɔrɔbɔli minnu bɛ sɔrɔ o la, ne ye n’yɛrɛ tanga olu ma ka d’a kan ne y’a latigɛ ka fɔrmasiyɔn kɛ n’bangebagaw kɛrɛfɛ.” A bɛ se ka kɛ yɛrɛ ko i bɛ se ka kalan walima fɔrmasiyɔn dɔ sɔrɔ min bɛ kɛ intɛrinɛti fɛ.

14. Ni i bɛ ka i hakili jagabɔ kalan walima fɔrmasiyɔn ko kan lise kɔfɛ, Bibulu sariyakolo min bɛ Luka 14:28 kɔnɔ, o bɛ se ka i dɛmɛ cogo di?

¹⁴ Kalan walima fɔrmasiyɔn sɔngɔ. Kalan walima fɔrmasiyɔn dɔw sɔngɔ man ca, wa gɔfɛrɛnaman yɛrɛ bɛ u dɔw sara. Ni a bɛ o cogo la, ka kalan walima ka fɔrmasiyɔn dɔ kɛ lise kɔfɛ, o bɛ se ka kɛ cogoya nɔgɔnman ye min b’a to i bɛ dɔnniya sɔrɔ walisa ka baara dɔ sɔrɔ. Nka tuma caman na, ka kalan walima ka fɔrmasiyɔn dɔ kɛ lise kɔfɛ, o sɔngɔ ka ca kosɛbɛ. Wa musaka wɛrɛw bɛ se ka kɛ yen i sigilen tɛ ni minnu ye i n’a fɔ ka lakɔli karamɔgɔ dɔ sara walisa o ka i dɛmɛ. Wa, kalan walima fɔrmasiyɔn dɔw sɔngɔ ka ca kosɛbɛ fo kalandenw bɛ laban ka san caman kɛ o wari sarali la. Adilson ka bɔ Mozambiki jamana na, o ye latigɛli min kɛ kalan ko ta fan fɛ, a nimisara o la. A ko: “Ne somɔgɔw ye ne ka san naani kalan sarali min kɛ, o kɛra sababu ye u tun tɛ dumuni ni u magoɲɛfɛnw sɔrɔ ka ɲɛ yɛrɛ.” N’i bɛ ka i hakili jagabɔ kalan walima fɔrmasiyɔn dɔ kan, i yɛrɛ ɲininka: ‘O kalan walima o fɔrmasiyɔn sɔngɔ ye joli de ye? Yala ne somɔgɔw bɛna se ka o wari sara wa? Yala kalan walima fɔrmasiyɔn wɛrɛ bɛ yen min sɔngɔ ka nɔgɔn wa?’ (Luka 14:28 kalan). ‘Ni ne ye juru ta, ne bɛna waati jɔli de kɛ o sarali la? Ne bɛna baara min sɔrɔ, yala o bɛna se ka ne dɛmɛ ka n’magoɲɛfɛnw sɔrɔ ani ka o juru sara wa?’—Nt. 22:7.

15. I bɛna se ka baara min sɔrɔ, mun na i ka kan ka o jateminɛ sani i k’a sugandi ka kalan walima fɔrmasiyɔn dɔ kɛ?

¹⁵ I bɛna se ka baara min sɔrɔ. Mɔgɔw bɛ se ka i ta ka baara sugu minnu kɛ aw ka yɔrɔ la walima i b’a fɛ ka taa sigi yɔrɔ min na, i hakili jagabɔ o kan. I b’a fɛ ka kalan walima fɔrmasiyɔn min kɛ, yala o bɛna i dɛmɛ ka baara sɔrɔ wa? Kalan dɔw bɛ yen minnu tɛ mɔgɔ dege baara kɛcogo la ka ɲɛ. O kalanw sinsinnen bɛ ka mɔgɔw kalan baara kɛcogo la papiye dɔrɔn de kan. Nka, o kalanw tɛ i dege baara kɛcogo yɛrɛ-yɛrɛ la walasa i ka se ka baara sɔrɔ (Kol. 2:8). O de kosɔn an balimamuso dɔ ka bɔ Ɛndi jamana na, o y’a fo ko: “Minnu bɛ baara di mɔgɔw ma, olu b’a fɛ u ka baarakɛlaw ka dɔnniya sugu min sɔrɔ, ne ka fɔrmasiyɔn ma se ka ne dɛmɛ ka o sɔrɔ. O kɛra sababu ye, ne ye kalan min kɛ ne ma se ka o baara sɔrɔ.” Kalan walima fɔrmasiyɔn dɔw fana bɛ yen, minnu tɛ i dɛmɛ ka baara sɔrɔ yɔrɔ caman na. Sublime, min bɛ bɔ Centrafrique jamana na, ale ye klimatisɛri dilan kalan. O bɛɛ n’a ta, a ko: “Ne bɛ yɔrɔ min na, mɔgɔ caman bɛ u ka fɛnw dilan u yɛrɛw ye. O kosɔn, baara sɔrɔli ka gɛlɛn ne bolo.”

16. Mun na a nafa ka bon ka jateminɛ kɛ walisa k’a dɔn, o kalan walima fɔrmasiyɔn bɛna i bila ka baara sugu min kɛ?

¹⁶ N’i tilala kalan walima fɔrmasiyɔn na, i bɛna baara sugu min kɛ, i hakili jagabɔ o kan. Yala o baara sugu bɛna diya i ye wa? (Waaj. 3:​12, 13) O baara kɛyɔrɔ bɛ cogo di? Yala mɔgɔw bolo, o baarayɔrɔ ye faratima yɔrɔ ye wa? I bɛna baara kɛ ni mɔgɔ minnu ye, yala mɔgɔw don ɲɔgɔn dan ka di minnu ye wa? Ani yala mɔgɔw bolo o baara bɛ mɔgɔ sɛgɛn kojugu wa? U bɛ deli ka mɔgɔw sara joli o baara sugu la? Yala o sara bɛ se ka kɛ sababu ye i ka se i yɛrɛ kɔrɔ wa? Yala i waajibiyalen don ka ta’a fɛ ka kalan walima fɔrmasiyɔn wɛrɛ kɛ walisa i ka to o baara la wa? Min nafa ka bon kosɛbɛ o ye ko: Yala o baara bɛ se ka kɛ sababu ye i ka Ala ka masaya bila jɔyɔrɔ fɔlɔ la wa? (Waaj. 12:15.) Ni baara sɔrɔli ka gɛlɛn aw ka yɔrɔ la, i kana baara woloma. Nka i bɛ kalan walima fɔrmasiyɔn min sugandi, o bɛ se ka i ka baara sɔrɔli nɔgɔya walima k’a gɛlɛya. Tabitha, min bɛ bɔ Ɛndi, ale ye finikala fɔrmasiyɔn dege kalo wɔɔrɔ kɔnɔ. A ko: “Ne y’a ye ko ka kɛ finikalala ye o bɛ se ka ne dɛmɛ ka kɛ tutigɛbaga ye. Finikala ye baara ye min sɔrɔli ka nɔgɔn, wa ne yɛrɛ de b’a sugandi ne bɛ baara kɛ waati min na. Ani ne mago tɛ wari caman na walisa ka o baara daminɛ.” O fɔrmasiyɔn ye Tabitha dɛmɛ walisa a ka ta’a fɛ ka kɛ tutigɛbaga ye.

17. (a) Cogo jumɛn na, krecɛn bɛ se ka kunnafoni sɔrɔ walisa ka latigɛli ɲuman kɛ kalan walima fɔrmasiyɔn ko ta fan fɛ? (b) Bibulu sariyakolo jumɛnw bɛ se ka an dɛmɛ ka latigɛli ɲuman kɛ? (Yɔrɔ koorilen fana lajɛ “I hakili jagabɔ nin Bibulu sariyakolo ninnu kan”)

¹⁷ An kumana fɛn nafaman caman kan, an ka kan ka minnu to an hakili la kalan ani fɔrmasiyɔn ko la. I mago bɛ kunnafoni minnu na walisa ka sugandili ɲuman kɛ, i bɛ se ka olu sɔrɔ cogo di? I b’a fɛ ka kalan walima fɔrmasiyɔn min kɛ, i bɛ se ka taa o kɛyɔrɔ la walima ka taa u ka siti kan walasa ka kunnafoniw sɔrɔ. A jateminɛ kosɛbɛ n’a y’a sɔrɔ o bɛ se ka i dɛmɛ ka baara sɔrɔ teliya la. Minnu ye o kalan walima o fɔrmasiyɔn ɲɔgɔn kɛ walima ka o baara kɛ, i bɛ se ka olu fana ɲininka (Nt. 13:10). U ɲininka u ye nafa walima gɛlɛya minnu sɔrɔ o fɔrmasiyɔn walima o baara kɛli la. Balimaw minnu bɛ ka Jehova bato nisɔndiya la, kuma olu fana fɛ (Nt. 15:22). Olu hakilinata ye mun de ye fɔrmasiyɔn ni baara ko la? A bɛ se ka kɛ ko u bɛ laadilikanw di i ma baara dɔ ko la i yɛrɛ ma miiri min na.

18. Mun de bɛ se ka nisɔndiya lakika di an ma?

¹⁸ Iko an y’a ye cogo min na, kalan walima fɔrmasiyɔn minnu bɛ kɛ lise kɔfɛ, nafaw b’u la nka gɛlɛyaw fana b’u la. O la, delili kɛ ani i hakili jagabɔ o kow kan. A to i hakili la ko, kalan walima fɔrmasiyɔn minnu bɛ kɛ lise kɔfɛ, olu bɛ se k’i dɛmɛ ka i magoɲɛfɛnw sɔrɔ nɔgɔya la. Nka teriya ɲuman min bɛ an ni Jehova cɛ, o dɔrɔn de bɛ se ka nisɔndiya lakika lase an ma (Zab. 16:​9, 11). Jehova b’a janto a ka mɔgɔw la tuma bɛɛ, u ka kalan mana kɛ fɛn o fɛn ye (Heb. 13:5). N’i y’a latigɛ ka kalan walima fɔrmasiyɔn dɔ kɛ lise kɔfɛ dun? Mun de bɛ se ka i dɛmɛ i gɛrɛlen ka to Jehova la o waati kɔnɔna na? Barokun nata bɛna kuma o de kan.