An k’a jira mɔgɔw la ko an bɛ u fɛ: An k’an ka ɲɛfɔliw kɛ ka bɛn u magow ma
1 Ciden Paul kɛra ɲɛjirabaga ɲuman ye bawo a tun bɛ a ka kibaru duman ɲɛfɔ tuma bɛɛ ka bɛn mɔgɔw lamɔcogo ni u miiricogo ma. (1 Kɔr. 9:19-23) An fana ka kan ka an jija ka o ɲɔgɔn kɛ. Ni an bɛ kɔn ka miiri dɔɔnin mɔgɔw mago la, tuma caman na an bɛ se ka hakililaw ta gafeninw jiracogo kan An ka Masaya Cidenyabaara kɔnɔ, ka olu ɲɛfɔcogow kɛ ka bɛn mɔgɔw magow ma an ka waajulikɛyɔrɔ la. Ni an sera so dɔ la, an bɛ se ka fɛn dɔw ye minnu ka di o sokɔnɔmɔgɔ ye. An bɛ se ka kuma o fɛnw kan an ka ɲɛfɔli kɔnɔna na. Nka, o dɔrɔn tɛ. An bɛ se ka kibaru duman ɲɛfɔcogo kɛ ka bɛn mɔgɔw magow ma an ka cidenyabaara la cogoya wɛrɛ la.
2 Kibaru duman ɲɛfɔcogo sinsin i barokɛɲɔgɔn ka kuma fɔlen kan: Ni an bɛ ka kibaru duman fɔ, tuma caman na an bɛ ɲininkali dɔ lawuli min bɛ an barokɛɲɔgɔn bila a ka an jaabi. A bɛ jaabi min di, o b’an bolo cogo di? Yala an b’a tigi fo dɔrɔn a ka jaabi dilen la ten ka tɛmɛ ni an ka ɲɛfɔli labɛnnen ye wa? Walima an bɛ kuma min fɔ, yala o b’a jira ko an ye a ka kuma jate wa? Ni an b’a jira tiɲɛ na ko mɔgɔw bɛ min fɔ, an bɛ o jate, an bɛ se ka ɲininkali wɛrɛw kɛ u la ni gasisigi ye. O cogo la an bɛna a dɔn tigitigi fɛn min bɛ u kɔnɔ. (Nt. 20:5) O la sa, Masaya cikan yɔrɔ minnu bɛ an lamɛnbagaw haminankow kan tigitigi, an bɛ se ka an ka kuma sinsin olu kan.
3 Walisa an ka se ka o kɛ, fo an ka sɔn ka kuma fɛn wɛrɛw kan minnu ni an ka kuma labɛnnen tɛ kelen ye. Ni an ye kuma daminɛ ko dɔ kan min bɔra kibarusɛbɛnw kɔnɔ, nka an barokɛɲɔgɔn ye fɛn wɛrɛ fɔ min kɛra a sigiyɔrɔ la, walima a ye fɛn dɔ fɔ min bɛ a kun kan, ni an b’a fɛ tiɲɛ na k’a dɛmɛ ka kɛnyɛ ni a mago ye, an bɛna an ka baro sinsin ko kan min nafa ka bon kosɛbɛ a bolo.—Fil. 2:4.
4 An ka ɲɛfɔli kɛ ka bɛn mɔgɔw mago ma: K’an to baro la, ni an barokɛɲɔgɔn ye ɲininkali dɔ lawuli, an bɛ se k’a ye ko a ka fisa an ka baro bila kɔfɛ ni an tilara kunnafoni wɛrɛw ɲinini na a ka ɲininkali kan. An bɛ se fana ka sɛbɛnw di a ma minnu bɛ ɲɛfɔli ɲɛnama kɛ a kunko kan. Ni an ye o fɛnw bɛɛ kɛ, o bɛna a jira ko an b’a fɛ tiɲɛ na ka mɔgɔw dɛmɛ u ka Jehowa dɔn.—2 Kɔr. 2:17.