An ka dɔ fara ɲɔgɔn barika kan ka t’a fɛ
1 Ciden Paul tun bɛ a seko damayira kɛ walisa ka dɔ fara a kerecɛnɲɔgɔn barika kan. (Kɛw. 14:19-22) O cogo kelen na ni an balimaw bɛ gɛlɛyaw kɔnɔ, an fana ka kan ka hami ni u ye, ka a ŋaniya ka u dɛmɛ. Bibulu b’a jira ko maakɔrɔw dɔrɔn man kan ka u mago don tɔw la, an kelen-kelen bɛɛ ka kan ka an mago don ɲɔgɔn na. (Rom. 15:1, 2) An ka sira fila lajɛ, minnu fɛ an bɛ se ka tugu cogo min na nin laadilikan na min kɛra ni kanuya ye: ‘An ka ɲɔgɔn dusu saalo, ka dɔ fara ɲɔgɔn barika kan.’—1 Tes. 5:11.
2 Mɔgɔ wɛrɛw mago bɛ fɛn minnu na, an ka o dɔn: Ala ka Kuma b’a jira ko Dɔrkasi ‘tun bɛ kɛwale ɲuman caman kɛ, ka hinɛ mɔgɔw la k’u sɔn.’ (Kɛw. 9:36, 39) Sɛgɛn tun bɛ mɔgɔ minnu na, a ye olu jateminɛ. A tun bɛ se ka min fana kɛ walisa ka o mɔgɔw dɛmɛ, a ye o kɛ. A kɛra misali ɲuman ye an bolo dɛ! An fana bɛ se k’a mɛn ko mɔgɔkɔrɔba dɔ mago bɛ bolifɛn na walisa ka se ka taa lajɛ la. Walima a bɛ se ka kɛ ko tutigɛbaga dɔ bɛ yen, mɔgɔ tɛ min bolo walisa u ka waajuli kɛ ɲɔgɔn fɛ baarakɛdonw wuladafɛlaw la. Ni i y’a ye ko mɔgɔ bɛ yen, min mago bɛ o dɛmɛ sugu la, n’i ye o dɛmɛ kɛrɛnkɛrɛnnen lase a ma, e ka miiri o bɛna dusu don o tigi kɔnɔ cogo min na!
3 Baro minnu ɲɛsinnen bɛ alakow ma: An ka kuma fɛ fana, an bɛ se ka dɔ fara mɔgɔ wɛrɛw barika kan. (Efɛ. 4:29) Maakɔrɔ kodɔnna dɔ ye nin jateminɛ kɛ: “Ni i b’a fɛ ka dusu don mɔgɔ kɔnɔ, kuma alakow kan. Walisa ka baro daminɛ min bɛ dɔ fara mɔgɔ wɛrɛ barika kan, i bɛ se ka ɲininkali gansan dɔ kɛ i n’a fɔ nin: ‘E ye tiɲɛ dɔn cogo di?’ ” A jira ko i b’i mago don tiɲɛ na denmisɛnw na minnu bɛ jɛkulu kɔnɔ. Mɔgɔ minnu dusu tiɲɛnen don ani minnu bɛ maloya, a jira fana ko i bɛ hami ni u ye. (Nt. 12:25) I kana a to diɲɛ ɲɛnajɛkow kuma ka waati ta, ka i bali i ka waati sɔrɔ ka baro dumanw kɛ i kerecɛnɲɔgɔnw fɛ alakow kan.—Rom. 1:11, 12.
4 An dun bɛ se k’a mun fɔ walisa ka dɔ fara mɔgɔ wɛrɛw barika kan? Kɔsa in na, yala i ka Bibulu kalan na ani i ka yɛrɛkalan na, i ye sariyakolo dɔ sɔrɔ min ye dɔ fara i ka kanuya ni i ka waleɲumandɔn kan Jehowa fan fɛ wa? Yala i ye fɛn dɔ mɛn foroba jɛmu na walima La Tour de Garde kalan na min ye dusu don i kɔnɔ wa? Yala ko dɔ kɛra min ye i dusukun minɛ, ni a bɛ mɔgɔ ka dannaya kologɛlɛya wa? Ni i bɛ nafaba don o ko suguw la minnu ɲɛsinnen bɛ alakow ma, i bɛna fɛn dɔ sɔrɔ k’a fɔ tuma bɛɛ min bɛna dusu don mɔgɔ wɛrɛw kɔnɔ.—Nt. 2:1; Luk. 6:45.
5 An ka mɔgɔ wɛrɛw dɛmɛ cogow la minnu bɛ nafa lase u ma, ka hakilitigiya baara kɛ ni an nɛnkun ye, walisa an ka se o cogo la ka ɲɔgɔn barika bonya.—Nt. 12:18.