Aw ka koɲuman kɛ, ka tɔw sɔn
1 Dɔrkasi ‘tun bɛ kɛwale ɲuman caman kɛ, a ka hinɛ tun bɛ a bila ka mɔgɔw sɔn ka caya.’ (Kɛw. 9:36, 39) Bololabila min tun b’a la, o y’a to a ko diyara a dɔnbagaw ni Jehowa Ala ye. Heburuw 13:16 ko: “Ka koɲuman kɛ, ka dɔ bɔ aw bolofɛnw na ka o di, aw kana ɲinɛ o kɔ katuguni o bɔɲɔgɔnko sarakaw ka di Ala ye.” An bɛ se cogo di bi ka koɲuman kɛ, ka tɔw sɔn?
2 A cogo dɔ ye ka tɔw sɔn an ‘bolofɛn nafamaw na.’ (Nt. 3:9) An bɛ bolomafara minnu kɛ diɲɛ baara kama, o y’a to Masaya Sow, Jamalajɛ kɛyɔrɔw, ani Tɔn bolofara ka sow sera ka jɔ diɲɛ yɔrɔ bɛɛ la. An ka bololabila y’a to mɔgɔ miliyɔn caman ye nafa sɔrɔ Ala-ka-marako kalan ni jɛɲɔgɔnya la min bɛ dusu don mɔgɔ kɔnɔ alako ta fan fɛ.
3 Aw ka mɔgɔw dususaalo, k’u jigi tugu: Ni kasaara kɛra, Jehowa ka jamakulu labɛnnen don ka “koɲuman kɛ” u Jehowa Seere ɲɔgɔnw ye ani mɔgɔw ye minnu tɛ an ka diinɛ na. (Gal. 6:10) Izini dɔ kɔnɔfɛnw pɛrɛnna tuma min na Faransi, cɛ dɔ n’a muso tun ka so bɛ o kɛrɛ fɛ. U ko: “An balima kerecɛnw nana an dɛmɛ o yɔrɔnin bɛɛ la. Anw ni an sigiɲɔgɔn minnu tun bɛ sankanso kelen na, u ye anw ka yɔrɔ ni olu ka yɔrɔ bɛɛ saniya. An sigiɲɔgɔnw kabakoyara kosɛbɛ k’a ye ko mɔgɔ caman de nana an dɛmɛ.” Balimamuso wɛrɛ y’a fɔ ka fara a kan ko: “Maakɔrɔw nana u mago don anw na kosɛbɛ, ka dusu don anw kɔnɔ. Tiɲɛ na, o kɛra fɛn ye an mago tun bɛ min na ka tɛmɛ fɛn tɔw bɛɛ kan.”
4 An bɛ se ka koɲuman kɛ an sigiɲɔgɔnw ye cogo caman fɛ. Nka, an bɛ se k’u dɛmɛ sira min fɛ min bɛna u nafa ka tɛmɛ a bɛɛ kan, o ye ka tiɲɛ dɔnniya nafama lase u ma. Jehowa yɛrɛ ye ‘ɲɛnamaya banbali jigiya’ min kofɔ, o sen bɛ o tiɲɛ dɔnniya la. (Tite 1:1, 2) Mɔgɔ minnu dusukasilen don diɲɛ kow kosɔn ani u yɛrɛw ka jurumutɔya ko la, cikan min bɛ Bibulu kɔnɔ, o bɛ dususaalo lakika lase o mɔgɔw ma. (Mat. 5:4) An bɛɛ ka koɲuman kɛ, ka tɔw sɔn ni a se b’an ye ka o kɛ.—Nt. 3:27.