An ka dɔ fara ɲɔgɔn barika kan n’an bɛ cidenyabaara la tuma min na
1 A ka di an bɛɛ ye mɔgɔ ka dusu don an kɔnɔ ni “kuma bɛnnen ye min fɔra a waati la.” (Nt. 25:11) N’an ni an balimaw bɛ cidenyabaara la, an bɛ se ka da a la cogo di ko an ka kuma bɛ dusu don u kɔnɔ?
2 Kuma minnu bɛ dɔ fara mɔgɔ barika kan: N’an bɛ ka waajuli kɛ tuma min na, an ka kuma alakow fana kan, o bɛ na ni ɲɔgɔn barika bonya ye kosɛbɛ. (Zab. 37:30) An bɛ se ka kuma an ka kibaru duman ɲɛfɔcogo kan walima ka kuma ko dɔw kan minnu kɛra foro baara la a ma mɛn, n’u bɛ dusu don mɔgɔ kɔnɔ. (Kɛw. 15:3) Yala an ye fɛn nafama dɔ sɔrɔ ka bɔ an yɛrɛ ka Bibulu kalan na, walima sɔn-ni-sɔn gafenin kuraw kɔnɔ, walima jɛkulu ka lajɛ dɔ la wa? An ye foroba jɛmu min lamɛn Masaya so kɔnɔ a ma mɛn, o yɔrɔ nafama minnu fɔra, an bɛ se ka baro kɛ olu fana kan.
3 An dusu bɛ se ka tiɲɛ ni an barokɛɲɔgɔn ye baro-jɔ-kuma dɔ lawuli, an ma se ka min jaabi ka ɲɛ. N’an bɔra o da la, a nafa ka bon kosɛbɛ an ni an waajulikɛɲɔgɔn ka miniti damadɔw ta k’a lajɛ o baro-jɔ-kuma bɛ se ka jaabi ka ɲɛ cogo min na siɲɛ wɛrɛ, laala an kɛlen ka Comment raisonner gafe kɔnɔkumaw lajɛ. Ni fɛn dɔ fana diyara an ye an waajulikɛɲɔgɔn ka kibaru duman ɲɛfɔcogo la, an bɛ se k’a tanu o la ni kɔnɔnajɛya ye, ka dusu don a kɔnɔ o cogo la.
4 A bɔ i yɛrɛ la ka ko dɔ kɛ: Yala mɔgɔ dɔw bɛ an ka gafe kalan kulu la an ni minnu ma baara kɛ ɲɔgɔn fɛ kɔsa in na wa? N’an b’a ɲini o mɔgɔw dɔ la kelen fɛ a ka an bilasira cidenyabaara la, o bɛ se ka na ni ‘ɲɔgɔn jija ye dannaya la.’ (Rom. 1:12) A ka di tutigɛbaga basigilenw ni tutigɛbaga farankanw ye olu ni mɔgɔ wɛrɛw ka baara kɛ ɲɔgɔn fɛ kɛrɛnkɛrɛnnenya la sɔgɔma joona fɛ walima su kotuma na, weleweledala damadɔw dɔrɔn bɛ se ka cidenyabaara kɛ waati min na. An bɛ se ka tutigɛbagaw dɛmɛ ni an ni olu bɛ bɔ ɲɔgɔn fɛ cidenyabaara la. Yala weleweledala dɔ bɛ yen min ye dɛsɛbagatɔ ye farikolo ta fan fɛ n’o cogoya bɛ dan sigi a ka kɛta la cidenyabaara la wa? N’an bɛ fɛɛrɛ tigɛ walisa a k’an bilasira, laala Bibulukalan dɔ la, o bɛ se ka an fila bɛɛ nafa.—Nt. 27:17.
5 Ka kumaw fɔ minnu bɛ mɔgɔ tanu ani minnu bɛ an ka waleɲumandɔn jira hali ko fitininw na, o bɛ dusu don tuma bɛɛ mɔgɔ kɔnɔ. An ka kan ka o kow to an hakili la ni an ni weleweledalaw bɛ ka cidenyabaara kɛ ɲɔgɔn fɛ, ikomi an b’a fɛ ka “dɔ fara ɲɔgɔn barika kan ka taa a fɛ.”—1 Tes. 5:11, NW.