Aw bɛ baara kɛ ni welesɛbɛnw ye wa?

Don dɔ la, cɛnin dɔ ye welesɛbɛn sɔrɔ min tun bɛ dusu don mɔgɔw kɔnɔ u ka na foroba jɛmu dɔ lamɛn jahanama ko kan. Cɛnin si tun ye san 11 ye. A y’a fɔ kɔ fɛ ko: “Ne tun b’a fɛ kosɛbɛ ka faamuyali sɔrɔ o ko kan, bawo ne tun bɛ ko bɛnbali de kɛ tuma bɛɛ. O kosɔn, min tun bɛ ne jɔrɔ kosɛbɛ, o ye ka taa jeni jahanama na ni ne sara tuma min na.” Cɛnin taara o jɛmu lamɛn. San kelen ɲɔgɔn o kɔ fɛ, a kɛlen kɔ ka Bibulu-kalan kɛ siɲɛ caman, cɛnin batisera. Karili Kilayini min kɛra kɔ fɛ Jehowa Seerew ka ɲɛmɔgɔ kulu mɔgɔ dɔ ye san caman kɔnɔ, o ka Kerecɛn cidenyabaara daminɛna nin cogo de la. A ye o cidenyabaara kɛ a ka ɲɛnamaya tɔ bɛɛ kɔnɔ. Aw k’a jateminɛ ko nin ko bɛɛ daminɛna ni welesɛbɛn de ye.

Bi fana, welesɛbɛnw ye baarakɛminɛn ye min bɛ ka nɔ bɔ ka taga a fɛ seereya kɛli la. Weleweledala caman y’a ye ko ka welesɛbɛn di mɔgɔ ma, o ye fɛɛrɛ ɲuman ye walisa ka i tɔgɔ fɔ o tigi ye ani ka baro daminɛ a fɛ. Bangebagaw bɛ se ka u ka denmisɛnninw sen don cidenyabaara la, ni u bɛ u ka denmisɛnninw bila ka welesɛbɛn di daw la. Weleweledala minnu bɛ seereya kɛ lɛtɛrɛw fɛ, olu bɛ se ka kunnafoniw di lajɛw kan, ni u bɛ welesɛbɛn dɔ don lɛtɛrɛ foroko kɔnɔ. A jɛlen don ko welesɛbɛnw ye fɛɛrɛ ɲuman ye walisa ka Bibulu kalandenw wele ka na lajɛw la, ani mɔgɔ minnu y’a jira ko kibaru duman ka di u ye.

Welesɛbɛn ɲɛ kelen kan, jɛkulu ka lajɛ kelen-kelen bɛɛ ɲɛfɔlen bɛ. Komandi nataw bɛɛ la, Masaya So ladɛrɛsi ani lajɛw kɛwaatiw tɛna sɛbɛn a kan. O la sa, aw yɛrɛ na o kunnafoniw di tuma min na aw na welesɛbɛn di mɔgɔw ma. Yɔrɔ jɛman bɛna sɔrɔ welesɛbɛn kan walisa ka o kunnafoni sɛbɛn a kan, walima ka o kɛ a kan ni tanpɔn ye, ni a ka di aw ye. Yala aw ka cidenyabaara kɔnɔna na, aw bɛ baara ɲuman kɛ ni welesɛbɛnw ye wa?