Diɲɛ yɔrɔ bɛɛ la an bɛɛ ka jɛ k’an cɛsiri ka mɔgɔw ladɔnniya Kafoba ka jamalajɛ ko la min tɔgɔ ye ko “An ka Krisita ladege” Weleweledalaw bɛna sɛbɛndennin kɛrɛnkɛrɛnnen dɔ jɛnsɛn kokura
1 Baaraba min kɛra salon diɲɛ yɔrɔ bɛɛ la walisa ka mɔgɔw ladɔnniya Kafoba ka jamalajɛ ko la min tɔgɔ ye ko “Kisili ka surun!” o ye nɔ ɲɛnama bila mɔgɔw la kibaru duman diyara minnu ye. Mɔgɔ minnu sɔnna o wele kɛrɛnkɛrɛnnen na ani ka na, a kɛra olu siɲɛ fɔlɔ ye ka dumuniba ni dumuni nafamaba sɔrɔ alako ta fan fɛ Jehowa Seerew cɛma. (Esa. 65:13) Kelenya ni nisɔndiya min b’an ka balimaya kɔnɔ Kretiɛnya sira fɛ, u y’o ye. (Zab. 133:1) Walisa ka mɔgɔ caman dɛmɛ u ka na Kafoba ka jamalajɛ la min tɔgɔ ye ko “An ka Krisita ladege,” an bɛna sɛbɛndennin kɛrɛnkɛrɛnnen dɔ jɛnsɛn kokura diɲɛ yɔrɔ bɛɛ la.
2 Fɛn minnu sɔrɔla salon baara la: N’an y’an sinsin kunnafoniw kan, an ye minnu sɔrɔ ka bɔ diɲɛ yɔrɔ bɛɛ la, ladɔnniyaliba min kɛra Kafoba ka jamalajɛ ko la min tɔgɔ ye ko “Kisili ka surun!” o ye nɔ ɲɛnamaba de bila mɔgɔw la. Yɔrɔ caman na, an ye ganseli ɲuman sɔrɔ. Misali la, dugu dɔ la, kunnafonidisɛbɛn dɔ kɔnɔ, barokun ɲɛnama dɔ kɛra an ka baara kan. A ko: “Walisa ka se ka mɔgɔ caman lasɔrɔ sani jamalajɛ don ka se, Jehowa Seerew ye dɔ fara u ka cɛsiri kan u sigida la: U ye baara kɛ lɛrɛw kɔnɔ minnu ka ca ni u ka lɛrɛ kɛta kɔrɔlenw ye, u ye yɔrɔ taama minnu ka jan ni yɔrɔw ye u bɛ deli ka minnu taama, wa, u y’u teliya fana ka kuma mɔgɔw fɛ.” Yɔrɔ wɛrɛ fana na, an jɛra ka sɛbɛndennin min jɛnsɛn, o diyara o yɔrɔ kunnafonidila dɔw ye, k’u bila ka kuma kɔsɛbɛ o kan sɛbɛnw kɔnɔ. Kunnafonidisɛbɛn saba ɲɔgɔn ye ganseli ɲuman kɛ an ka baara kan sani jamalajɛ don ka se. Karidon kunnafonidisɛbɛn dɔ kɔnɔ, kunnafonidila dɔ ye barokun caman sɛbɛn an ko la minnu bɛ ɲɛ fila ni kɔ fa. A y’an ka dannakow, an ka balimaya, an ka sɛbɛndennin jɛnsɛnni baara ani an ka jamalajɛko walawala kosɛbɛ o kɔnɔ. Weleweledala dɔ taara welesɛbɛn di soda dɔ la tuma min na, o muso y’a ka kuma tigɛ k’a fɔ ko: “Tiɲɛ don, ne tilatɔ bɛɛ filɛ nin ye o ko kalanni na kunnafonidisɛbɛn kɔnɔ.” Muso wɛrɛ fana kabala k’a fɔ ko: “Ne tilatɔ bɛɛ filɛ nin ye o kalanni na aw ko la, wa aw yɛrɛ filɛ nin ye yan sisan! Nin ye ne ka welesɛbɛn ye wa?” A y’a fɔ ka fara a kan ko: “Jehowa Seerew bɛ ka nin baara min kɛ, o ni tanuli ka kan kosɛbɛ.”
3 Kibaru duman ka di mɔgɔ minnu ye, olu caman nana kafoba ka jamalajɛ kɛyɔrɔ la, ni u ka welesɛbɛnw ye u bolo. U dɔw bɔra dugu janw na walisa ka na Kafoba ka jamalajɛ kalanw la. An ye cɛsiriba minnu kɛ walisa ka mɔgɔw wele ka na jamalajɛ la, o de y’a to mɔgɔ nataw cayara. Jamana dɔ la, mɔgɔ minnu nana salon jamalajɛ la, olu cayara ka tɛmɛ san tɛmɛnen mɔgɔ nataw kan ni 27 ye kɛmɛsarada la.
4 An ka waajulikɛyɔrɔ baara: Aw bɛ se ka sɛbɛndennin jɛnsɛnni daminɛ dɔgɔkun saba sani aw ka kafoba ka jamalajɛ ka daminɛ. Cɛsiri ka kan ka kɛ yɛrɛ de walisa ka jɛkulu waajulikɛyɔrɔ bɛɛ kɛ. Dɔgɔkun laban sani jamalajɛ ka kɛ, jɛkulu minnu ka waajulikɛyɔrɔ ka bon kosɛbɛ, olu bɛ se ka sɛbɛndennin to mɔgɔw ma sɔrɔ so minnu kɔnɔ cogo la min tɛ kɔlɔsi tɛmɛbagaw fɛ. Sɛbɛndennin hakɛ min dira jɛkulu ma ka jɛnsɛn, jɛkulu ka kan k’u cɛsiri ka o hakɛ bɛɛ tilatila, ani ka waajulikɛyɔrɔ camanba kɛ. Sɛbɛndennin min tɔ tora, jɛkulu tutigɛbagaw bɛna baara kɛ ni olu ye.
5 An bɛ se ka min fɔ: I bɛ se ka nin fɛn ɲɔgɔn fɔ: “An bɛ ka nin welesɛbɛn di mɔgɔw ma diɲɛ yɔrɔ bɛɛ la walisa ka mɔgɔw wele ka na ko nafamaba dɔ la min bɛna kɛ sɔɔni. Nin y’i ta ye. I bɛna kunnafoni wɛrɛw sɔrɔ a kɔnɔ.” I ka sɛbɛndennin jiracogo surunya walisa a caman ka se ka jɛnsɛn. Nka, a jɛlen don ko ni ɲininkali bɛ i barokɛɲɔgɔn fɛ, i ka waati ta k’olu jaabi. Ni mɔgɔ dɔ y’a jira ko kibaru duman ka di a ye, i k’o sɛbɛn, wa, i ka segin ka na bɔ o tigi ye joona.
6 A nafa ka bon kosɛbɛ an k’an jija ka Yesu ladege. (Yuh. 3:36) An ka kafoba ka jamalajɛ nata bɛna mɔgɔw bɛɛ dɛmɛ minnu bɛna na o la u ka Yesu ladege tigitigi. Siga t’a la ko kabini sisan an bɛ se ka miiri seereyaba la min bɛna kɛ kokura, k’o sabu kɛ cɛsiri ye min bɛna kɛ diɲɛ yɔrɔ bɛɛ la ka mɔgɔw ladɔnniya Kafoba ka jamalajɛ ko la min tɔgɔ ye ko “An ka Krisita ladege.” O la sa, an bɛ se ka mɔgɔ hakɛ o hakɛ wele ka na o la, an k’an cɛsiri k’o mɔgɔ hakɛw wele. Tuma min na an kelen-kelen bɛɛ bɛna cɛsiri min kɛ k’an sen don baara la min bɛna kɛ diɲɛ yɔrɔ bɛɛ la, Jehowa ka duba kosɛbɛ o cɛsiriw ye.