Tila 10: Ka Bibulu-kalanw ɲɛminɛ minnu bɛ taa ɲɛ
Ka kalanden dege du-ni-du waajuli la
1 Kalanden min ma batɛmu ta fɔlɔ, ni diinɛ maakɔrɔw y’a ye ko o kalanden bɛ se ka kɛ weleweledala ye, o kalanden bɛ se ka bɔ ni jɛkulu ye ka jama la waajuli kɛ. (Organisés pour faire la volonté de Jéhovah ɲɛw 79-81.) An bɛ se ka kalanden dege a ka se ka du-ni-du waajulibaara gɛlɛyaw kun cogo di?
2 Labɛnw kɛtɔ ɲɔgɔn fɛ: Labɛnkoɲuman ɲɔgɔn tɛ. Sɛbɛn jiracogo minnu bɛ An ka Masaya Cidenyabaara kɔnɔ ani Comment raisonner gafe kɔnɔ, olu jira kalanden na i k’a dɛmɛ a yɛrɛ ka kuma daminɛcogo nɔgɔman dɔ ɲɛnatɔmɔ, min bɛnnen bɛ sigida ma. Kabini a daminɛ na, dusu don a kɔnɔ a ka baara kɛ ni Bibulu ye a ka cidenyabaara kɔnɔ.—2 Tim. 4:2.
3 Aw ye to ka waajulibaara kɛcogow ladege ka sɔrɔ ka bɔ. O bɛ weleweledala kura nafa kosɛbɛ. Ka kalanden to o waajulibaara kɛcogow ladegeli la, sigida-la-mɔgɔw bɛ deli ka an jaabi ni kuma minnu ye, olu bɛ kunbɛn ni fɛɛrɛ min ye, i bɛ o jira kalanden na. (Kol. 4:6) A fɔ ka jɛya kalanden ye, ko an ka kerecɛn cidenyabaara kɔnɔ, a wajibiyalen tɛ an ka mɔgɔw ka ɲininkaliw bɛɛ jaabi dɔn. Tuma caman na, a ka ɲi an ka a fɔ a tigi ye ko an bɛna a ka ɲininkaliw jaabi ɲini walisa an ka se ka a walawala a tigi ye.—Nta. 15:28.
4 Ka aw to waajuli la ɲɔgɔn fɛ: Ni kalanden bɛ bɔ siɲɛ fɔlɔ la du-ni-du waajuli la, aw jɛra ka sɛbɛn jiracogo min labɛn ɲɔgɔn fɛ, i bɛ baara kɛ ni o ye ani i bɛ a to a k’a kɔlɔsi e bɛ baara kɛ ni o sɛbɛn jiracogo labɛnnen ye cogoya min na. O kɔ i k’a to a yɛrɛ ka sɛbɛnjira dɔ kɛ. Tuma dɔw la, min ka fisa ni a bɛɛ ye, o ye ka baara dɔ di weleweledala kura ma ka aw to sɛbɛn jira la i na a fɔ ka kalanjɛ di a ma ka kɛ ani ka a bila ka Bibulu tɛmɛsira dɔ ɲɛfɔ. Kalanden kɛcogoya ani dan min bɛ a la, olu jateminɛ. (Fil. 4:5) Ka i to Kalanden degeli la dɔɔnin-dɔɔnin waajulibaara suguya wɛrɛw la, i bɛ a tanu a ka ɲɛtaawalew bɛɛ la.
5 A nafa ka bon kosɛbɛ ka weleweledala kura dɛmɛ a ka cidenyabaara kɛ a ka ko bolodalen ye. Ni o se bɛ a ye, a bɛ cidenyabaara boloda dɔgɔkun o dɔgɔkun. (Fil. 3:16) Fɛɛrɛ jɔnjɔn tigɛ walisa aw ka jɛ ka baara kɛ ɲɔgɔn fɛ foro kɔnɔ, ani dusu don a kɔnɔ a ka baara kɛ ni weleweledala timinandi tɔw ye fana. Weleweledala timinandiw bɛ kɛ misali ye a fɛ. A ni olu bɛ jɛ baara la minkɛ, o bɛna a dɛmɛ a yɛrɛ ka se baara la koɲuman ani o bɛna a dɛmɛ a ka nisɔndiya sɔrɔ du-ni-du waajulibaara la.