Waajuli b’an dɛmɛ ka muɲu
1 Ala ka Kuma bɛ dusu don an kɔnɔ walisa ‘ɲɔgɔndan boli min dara an ɲɛ, an ka o boli kɛ ni muɲuli ye.’ (Heb. 12:1) Walisa a ka se sɔrɔ boli la, bolibaga mago b’a la ka muɲu cogo min na, o cogo kelen na an mago bɛ muɲu na walisa ka ɲɛnamaya banbali sɔrɔ. (Heb. 10:36) Cogo jumɛn na Kerecɛn ka cidenyabaara bɛ se ka an dɛmɛ ka muɲu ni kantigiya ye fo ka se laban na?—Mat. 24:13.
2 An bɛ fanga sɔrɔ alako ta fan fɛ: Dakabana layidu min bɛ Bibulu kɔnɔ diɲɛ kura tilennen ko la, ni an bɛ o weleweleda, o b’an dɛmɛ walisa an yɛrɛ ka jigiya ka kɛ fɛn ɲɛnama ye an bolo. (1 Tes. 5:8) Ni an bɛ an sen don foro cidenyabaara la tuma bɛɛ, o b’a to an ye tiɲɛkuma minnu kalan Bibulu kɔnɔ, an bɛ se ka mɔgɔw ladɔnniya olu la. O b’a to fana an bɛ se ka an ka dannaya lafasa. O dannaya lafasali de bɛ tila k’an dɛmɛ walisa an ka fanga sɔrɔ alako ta fan fɛ.
3 Walisa an ka se ka mɔgɔ wɛrɛw kalan ka ɲɛ tiɲɛkumaw na minnu bɛ Bibulu kɔnɔ, fo an yɛrɛ ka tiɲɛkumaw faamu ka jɛya. An ka kan ka ɲininiw kɛ. An bɛ fɛn min kalan, an ka kan ka taasi o fana la. An bɛ o cɛsiriba min kɛ, o b’a to an ka dɔnniya bɛ dunya, an ka dannaya bɛ kologɛlɛya, dɔ bɛ fara fana an fanga kan alako ta fan fɛ. (Nt. 2:3-5) O la sa, ni an b’a ɲini ka mɔgɔ wɛrɛw dɛmɛ, o bɛ fanga don an yɛrɛ de la.—1 Tim. 4:15, 16.
4 Ka an sen don cidenyabaara la ni dusu ye, o ye ‘Ala ka kɛlɛkɛminɛn dafalen’ yɔrɔ nafamaba dɔ ye. An mago bɛ o la walisa an jɔlen ka to Sendonbaga ni jinɛw ɲɛ. (Efɛ. 6:10-13, 15) Ni an cɛsirilen bɛ cidenyabaara senuma na, o b’an dɛmɛ an hakili sinsinnen ka to fɛnw kan minnu bɛ an barika bonya, minnu b’an dɛmɛ fana walisa an kana kɛ mɔgɔw ye Sitanɛ ka diɲɛ ye minnu tiɲɛ. (Kol. 3:2) Ni an bɛ mɔgɔ wɛrɛw kalan Jehowa ka siraw la, an hakili bɛ jigin tuma bɛɛ ko a ka kan an yɛrɛ jogo ɲuman ka to an na.—1 Pi. 2:12.
5 Ala de bɛ barika don an na: Ka an sen don waajulibaara la, o b’an kalan fɛn laban min na, o ye ka an jigi da Jehowa kan. (2 Kɔr. 4:1, 7) O ye ko nafamaba ye dɛ! An bɛ o dannaya sugu min bonya an na, o bɛ an labɛn an ka cidenyabaara kɛ, nka a tɛ dan o dɔrɔn ma. O bɛ an labɛn fana an ka se ka ko sugu bɛɛ kunnasagon an ka ɲɛnamaya kɔnɔ. (Fil. 4:11-13) Tiɲɛ na, ni an b’a dege ka an jigi bɛɛ ta ka da Jehowa kan, o de ye ko yɛrɛ-yɛrɛ ye min b’a to an bɛ taga a fɛ muɲuli la. (Zab. 55:22) O la sa, waajuli b’an dɛmɛ sira caman fɛ an ka muɲu.