KALANSEN 22
I bɛ se ka kibaru duman fɔ mɔgɔ wɛrɛw ye cogo jumɛn na?
Ni i bɛ ka Bibulu tiɲɛw dɔn ka ta’a fɛ, i bɛ se k’a miiri ko, ‘Mɔgɔw bɛɛ tun ka kan ka nin dɔn!’ O ye tiɲɛ ye, mɔgɔw bɛɛ mago b’a la ka o tiɲɛw dɔn! Nka i ye fɛn minnu kalan, a bɛ se ka kɛ ko i bɛ ka siran ka olu kofɔ mɔgɔ wɛrɛw ye. An k’a lajɛ i bɛ se ka se sɔrɔ o siran kan cogo min na ani k’a daminɛ ka Bibulu kibaru duman fɔ mɔgɔ wɛrɛw ye ni nisɔndiya ye.
1. I bɛ ka fɛn minnu kalan, i bɛ se ka olu kofɔ i dɔnbagaw ye cogo jumɛn na?
Yesu ka kalandenw y’a fɔ ko: “An ye ko minnu ye ka u mɛn, an tɛ se ka to olu fɔbali ye.” (Kɛwalew 4:20) Tiɲɛ nafa tun ka bon u bolo kosɛbɛ, fo u tun b’a fɛ ka o kofɔ mɔgɔw bɛɛ ye. Yala a bɛ ten e fana bolo wa? Ni o don, o la i bɛ ka fɛn minnu kalan i ka cogoyaw ɲini ka olu kofɔ i somɔgɔw ani i teriw ye bonya kɔnɔna na.—Kolosekaw 4:6 kalan.
Fɛn dɔw, i bɛ se ka minnu kɛ walasa k’a daminɛ
Ni i bɛ ka kuma i somɔgɔw fɛ, i ka Bibulu barokun dɔ sen don aw ka baro la i kɛtɔ k’a fɔ ko: “Ne ye fɛn nafamaba dɔ kalan nin dɔgɔkun in na.”
I teri dɔ, min man kɛnɛ walima jɔrɔnankow bɛ min kan, Bibulu tɛmɛsira dɔ kalan a ye min bɛ dusu don mɔgɔ kɔnɔ.
Ni i baarakɛɲɔgɔn dɔw ye i ɲininka ko i ka wikɛni kɛra di? I ye fɛn minnu kalan i ka Bibulukalan na walima jɛkulu ka lajɛ dɔ la, olu dɔ fɔ a ye.
jw.org siti jira i teriw la.
A ɲini mɔgɔ wɛrɛw fɛ u ka fara i kan i ka Bibulukalan na, walima a jira u la u bɛ se ka Bibulukalan ɲini cogo min na jw.org siti kan.
2. Ka to ka waajuli kɛ ni jɛkulu kɔnɔmɔgɔw ye mun na o ye kuntilenna ɲuman ye?
Yesu ka kalandenw ma dan dɔrɔn ka kibaru duman fɔ u dɔnbagaw ye. Yesu ye “u fila-fila ci ka taa a ɲɛ” dugubaw la walasa u ka taa waajuli kɛ. (Luka 10:1) O waajuli kɛcogo labɛnnen in ye cogoya di mɔgɔ caman ma u ka se ka kibaru duman mɛn. Ka waajuli kɛ ɲɔgɔn fɛ, o fana ye nisɔndiyaba di kalandenw ma. (Luka 10:17) Ka to ka waajuli kɛ ni jɛkulu kɔnɔmɔgɔw ye, yala i bɛ se ka o kɛ i kuntilenna ye wa?
DƆ FARA I KA DƆNNIYA KAN
An k’a ɲini k’a dɔn i bɛ se ka min kɛ walasa ka se sɔrɔ siran kan ani nisɔndiya min bɛ kibaru duman fɔli la, i ka o sɔrɔ.
3. Jehova bɛ kɛ ni i ye
Mɔgɔ dɔw b’a fɛ ka waajuli kɛ. A bɛ se ka kɛ ko mɔgɔw bɛna u ye cogo min na ani mɔgɔw bɛna kɛ cogo min na ka ɲɛsin u ma, u bɛ siran o ɲɛ.
I bɛ ka fɛn minnu kalan, yala i bɛ ka siran ka olu kofɔ mɔgɔ wɛrɛw ye wa? Mun na?
A’ye WIDEYO lajɛ, o kɔ aw ka baro kɛ nin ɲininkali kan:
Nin Jehova Seere minnu ye funankɛw ye, olu ye se sɔrɔ u ka siranw kan cogo jumɛn na?
Esayi 41:10 kalan, o kɔ aw ka baro kɛ nin ɲininkali kan:
Ni i siranna waajuli kɛli ɲɛ, delili bɛ i dɛmɛ cogo di?
I tun bɛ nin dɔn wa?
Jehova Seere caman delila k’a miiri ko olu tɛna se abada ka kibaru duman fɔ mɔgɔ wɛrɛw ye. O misali dɔ filɛ nin ye, Sergey tun dalen tɛ a yɛrɛ la ani a tun ka gɛlɛn a ma ka kumaɲɔgɔnya don a ni mɔgɔ wɛrɛw cɛ. Nka o kɔ, a ye Bibulukalan kɛ. A ko: “Hali ni siran tun bɛ ne la, ne tun bɛ ka fɛn minnu kalan, ne y’a daminɛ ka to ka olu kofɔ mɔgɔ wɛrɛw ye. Ne dabali banna k’a ye ko, ka to ka Bibulu kofɔ mɔgɔ wɛrɛw ye, o y’a to ne sera ka da n’yɛrɛ la kosɛbɛ. O kɛli fana ye n’yɛrɛ ka dannaya barika bonya.”
4. Kuma ni bonya ye
Ni i bɛ ka kibaru duman kofɔ, i bɛ kuma minnu fɔ kana olu dɔrɔn jateminɛ nka i bɛ u fɔ cogo min na i ka o fana jateminɛ. 2 Timote 2:24; ani 1 Piɛrɛ 3:15 kalan, o kɔ aw ka baro kɛ nin ɲininkaliw kan:
I bɛ se ka nin tɛmɛsiraw waleya cogo di ni i bɛ ka kuma mɔgɔ wɛrɛw fɛ Bibulu ko la?
A bɛ se ka kɛ ko i somɔgɔ dɔw walima i teri dɔw tɛ sɔn i ta ma. I bɛ se ka mun de kɛ? I man kan ka mun de kɛ?
Mun na a bɛ fisaya an ka ɲininkaliw kɛ mɔgɔw la ni fɛɛrɛ ye, nka an kana a fɔ u ye u ka kan ka da fɛn min na?
5. Kibaru duman fɔli bɛ nisɔndiya di
Jehova ye kibaru duman fɔli baara di Yesu ma. Yesu bɛ o baara ye cogo di? Yuhana 4:34 kalan, o kɔ aw ka baro kɛ nin ɲininkaliw kan:
Dumuni ɲuman dunni ka ɲi an ka ɲɛnamaya ma ani o bɛ an nisɔndiya. Ka Ala sago kɛ, kibaru duman fɔli sen bɛ o la, mun na Yesu ye o ni dumuni dunni sanga ɲɔgɔn ma?
E hakili la, i bɛ se ka nisɔndiya jumɛnw sɔrɔ kibaru duman fɔli la?
Laadilikanw
Dɔgɔkun kɔnɔ lajɛ nata la, i k’a ɲini k’a dɔn i bɛ se ka barow daminɛ cogo min na.
A ɲini ka i sen don dɔgɔkun kɔnɔ lajɛ barokunw kɛli la. Barokunw bɛ di kalandenw ma walasa u ka o barokunw walawala. Olu bɛ se ka i dɛmɛ walasa i bɛ ka fɛn minnu kalan i labɛnnen ka kɛ ka olu fɔ mɔgɔ wɛrɛw ye.
Nin kalankɛ gafe in kɔnɔ, a sɛbɛnnen bɛ yɔrɔ dɔw la ko: “Mɔgɔ dɔw b’a fɔ ko” ani “Mɔgɔ dɔ bɛ se ka nin ɲininkali kɛ”. Baara kɛ ni o yɔrɔw ye walasa k’i dege mɔgɔw ka ɲininkaliw jaabi cogo la, ani baro-jɔ-kuma minnu bɛ kɛ ka caya, k’i dege olu fana jaabi cogo la.
MƆGƆ DƆ BƐ SE KA NIN ƝININKALI KƐ: “Kan jumɛn de bɛ i da”?
I bɛ se ka tɛmɛn o fɛ cogo di walasa k’a fɔ o tigi ye i ye fɛn minnu kalan i ka Bibulukalan sen fɛ?
BAKURUBAFƆLI
Ka kibaru duman fɔ mɔgɔ wɛrɛw ye, o bɛ nisɔndiya di. Ani o kɛli bɛ se ka nɔgɔnya cogo la, i tun ma sigi ni min ye.
Seginnkanni
Mun na kibaru duman ka kan ka fɔ mɔgɔ wɛrɛw ye?
I bɛ se ka kuma ni bonya ye cogo jumɛn na?
Siran fɛn o fɛn bɛ se ka kɛ i la waajuli kɛli kosɔn, i bɛ se ka olu bɔ i la cogo di?
NINNU LAJƐ
Jogo naani lajɛ minnu bɛ se ka i dɛmɛ ka kibaru duman fɔ.
A lajɛ Bibulu maana dɔ bɛ se ka an dɛmɛ cogo min na ka kibaru duman fɔ hali ni an ye denmisɛnw ye.
I somɔgɔ minnu tɛ Jehova dɔn fɔlɔ, a lajɛ i bɛ se ka Bibulu kofɔ olu ye cogo min na.
“An somɔgɔ minnu tɛ Jehova Seerew ye, an ka olu dusukun sɔrɔ” (w14 15/03)