An k’an ‘bolo labila ka nili kɛ, k’an ka nafolo tila an ni tɔw cɛ’

¹ A san kɛmɛ caman de filɛ nin ye ko ciden Pol ye Timote kalan a ka dusu don a dannayakɛɲɔgɔnw kɔnɔ walasa ‘u ka koɲuman kɛ, ka kɛwale ɲumanw kɛ n’u ka nafolo ye, ka u bolo labila ka nili kɛ, ani ka u ka nafolo tila u ni tɔw cɛ.’ (1 Tim. 6:​18, LK) Pol ye Heburu Krecɛnw hakili jigin u kana ɲinɛ ‘ka koɲuman kɛ, ka dɔ bɔ u bolofɛnw na ka o di.’ (Heb. 13:16) Mun na a ye nin cikanw sɛbɛn? Bawo, a b’a dɔn ko “nɔɔrɔ ni bonya ani hɛrɛ na di koɲumankɛlaw bɛɛ kelen kelen ma.”​—⁠Rom. 2:⁠10.

² Ikomi Jehowa Ala ye dabaga ye, a ye fɛn bɛɛ tigi ye. (Jir. 4:11) A bɛ fɛn min kɛ an ye n’a ka nafolow ye, o nafa ka bon kosɛbɛ an bolo. Mɔgɔ camanba b’a jira ko waleɲumandɔn t’u la, nka Kɔrɔtalenba b’a to an bɛɛ ka nafa sɔrɔ a ka fɛn dilenw na walasa an ka se ka balo. (Mat. 5:45) A y’a Denkɛ mandi yɛrɛ di k’o kɛ saraka ye walasa an ka se ka ɲɛnamaya banbali sɔrɔ. A ye kanuya min ɲɛsin an ma, yali o man kan k’an wajibiya ka kɛ ɲumandɔnbagaw ye k’an bolo labila an mɔgɔɲɔgɔnw ye wa?​—⁠2 Kɔr. 5:​14, 15.

³ An bɛ se ka mun tila an ni tɔw cɛ? Fɛn nafama minnu b’an bolo, a mana kɛ fɛn o fɛn ye, a bɛnnen don an ka baara kɛ n’u ye cogo la min bɛ diya Ala ye. Masaya baara min bɛ kɛ diɲɛ yɔrɔ bɛɛ la, siga t’a la k’an b’a fɛ k’o kɔkɔrɔdon hakili ni wariko ta fan fɛ. Siga t’a la ko kibaru duman ye nafolo bɛɛ la nafama ye mɔgɔ bɛ se ka min sɔrɔ bawo a ye “Ala ka sebagaya ye ka dannabagaw bɛɛ kisi.” (Rom. 1:16) N’an b’an ka waati n’an ka nafolow kɛ kalo o kalo k’an sen don wajuli ni kalan baara la, o cogo la an bɛ se ka hakili ta fan fɛ nafolo tila an ni tɔw cɛ. O bɛ se k’u dɛmɛ ka ɲɛnamaya banbali sɔrɔ.

⁴ N’an bɛ dɛmɛ don mɔgɔw ma minnu ka sɔrɔ tɛ bɛrɛ ye, o ka di Jehowa ye. A ye layidu ta k’a bɛna duba an ye. A b’an hakili jigin fana ko: “Nafoloba tɛ mɔgɔ nafa diminya don na, nka tilennenya bɛ mɔgɔ kisi saya ma.” (Nta. 11:4; 19:17) Ka Masaya baara kɔkɔrɔdon n’an ka nafolo ye, ani k’an niyɔrɔ kɛ k’a dafa kibaru duman wajuli la, o ye cogo ɲumanw ye minnu fɛ an bɛ se k’a jira tiɲɛ na k’an bolo labilalen don, k’an b’an ka nafolo tila an ni tɔw cɛ.