A to i hakili la ko waati koronnen bɛ!
1 Yesu tun bɛ a kala ma ko waati min tun bɛ ale bolo walisa ka a Fa ka baara kɛ, ko dan tun bɛ o la. (Yuh. 9:4) O de kosɔn a ye a ka baara kɛ ni sɛbɛ ye, ka a to a hakili la ko waati koronnen bɛ. A ye a ka kalandenw kalan walisa olu fana ka baara kɛ o cogo la. (Luka 4:42-44; 8:1; 10:2-4) Fɛn minnu bɛ mɔgɔ ka ɲɛnamaya diya i bolo, Yesu tun ye olu kɛ bolo kɔfɛ fɛnw ye. (Mat. 8:20) O de y’a to, a sera ka tila a ka baara la, Jehowa ye min di a ma ka kɛ.—Yuh. 17:4.
2 Dan bɛ waati min na: Waati min labilara walisa ka kibaru duman weleweledali kɛ “dugukolo yɔrɔ bɛɛ la” o waati fana dan sigilen bɛ. (Mat. 24:14) Bibulu kiraya kumaw bɛ a jira ko an janfara kosɛbɛ laban donw kɔnɔna na. Sɔɔni “mɔgɔ minnu tɛ Ala dɔn, ani mɔgɔ minnu sɔnnen tɛ matigi Yesu ka kibaru duman na. . . kiri bɛna bin olu kan ka u ɲangili kɛ halakili banbali ye.” (2 Tes. 1:6-9) O kiritigɛ bɛna bala kosɛbɛ mɔgɔ la. (Luka 21:34, 35; 1 Tes. 5:2, 3) Mɔgɔw ka kan ka a dɔn, ko u bɛ farati la. An de ka kan ka mɔgɔw dɛmɛ u ka Jehowa ka mandiya sɔrɔ a tuma na.—Sof. 2:2, 3.
3 An k’an seko bɛɛ kɛ: Ala ka baarakɛlaw bɛ a kala ma ko “waati tɔ man ca.” O de kosɔn u bɛ jɔyɔrɔ fɔlɔ di waajuli baara ma. (1 Kɔr. 7:29-31; Mat. 6:33) Mɔgɔ dɔw bɛ a dabɔ a kama ka nafolo-ɲini-sira dɔ bila kɛrɛfɛ, walima ka u yɛrɛ ka nafa-sɔrɔ-sira dɔ bila walisa ka dɔ fara u ka cidenyabaara kan. (Mar. 10:29, 30) Mɔgɔ wɛrɛw bɛ ka taga a fɛ “ka caman kɛ matigi ka baara la” hali ka u to tɔɔrɔ kɔnɔ. (1 Kɔr. 15:58) Mɔgɔ caman bɛ ka kibaru duman weleweledali kɛ, nin ye a san tan sigiyɔrɔma caman ye, u ma o baara dabila. (Heb. 10:23) Jehowa bɛ o ɲɔgɔnna sarakaw bila jɔyɔrɔba la, masaya baara kɔkɔrɔdonni na.—Heb. 6:10.
4 Ni an ye an ka ɲɛnamaya sinsin Jehowa ka bato sɛbɛ kan, waajuli baara fana sen bɛ o min na, o bɛ an dɛmɛ an ka Jehowa ka don to an hakili la. O bɛ an lakana walisa Sitanɛ ka diɲɛ kana an minɛ ni tulonkɛ ye. O na barika don an na, walisa an cɛsirilen ka to taamacogo ɲuman sira kan. (2 Pi. 3:11-14) Ɔwɔ, ni an ye an ka baara kɛ, ka a tɔ an hakili la ko waati koronnen bɛ, o bɛ se ka kisi lase an ma ani mɔgɔ wɛrɛ minnu bɛ an lamɛn.—1 Tim. 4:16.