An ka cidenyabaara bɛ ko minnu ɲɛ
1 Ala ka Kuma b’a fɔ ko Kerecɛnw bɛ iko mɔgɔ minnu bɛ ka taama sesɔrɔ kɔnɔ Jehowa ka baara la. A bɛ u jira i n’a fɔ mɔgɔ minnu ye se sɔrɔ kaban, ni u bɛ ka taama ɲɔgɔn kɔ. (2 Kɔr. 2:14-16) Ni an bɛ ka Ala dɔnniya lase mɔgɔw ma, an bɛ min fɔ, o bɛ iko wusulan suman duman Jehowa bolo. Mɔgɔ dɔw bɛ sama kibaru duman diya nɔ fɛ, k’a sɔrɔ dɔw bɛ ban o la. Nka, ni mɔgɔ fanba ma sɔn kibaru duman na, o kɔrɔ tɛ ko an ka baara ma ɲɛ sɔrɔ. An k’a lajɛ an ka cidenyabaara bɛ ko minnu ɲɛ.
2 An ka cidenyabaara bɛ nɔɔrɔ da Jehowa kan: Sitanɛ y’a fɔ ko hadamadenw bɛ baara kɛ Jehowa ye u yɛrɛ de ka nafaw kama. (Job 1:9-11) O la sa, an ka cidenyabaara bɛ cogo di an ma, k’a jira ko laadiriya de b’an bila ka tugu Jehowa kɔ. Ci min dira an ma ka waajuli kɛ ani ka mɔgɔw kɛ kalandenw ye, weleweledala caman bɛ o baara kɛ, k’a sɔrɔ gɛlɛyaw bɛ u kelen-kelen bɛɛ kan, walima u bɛ o kɛ k’a sɔrɔ mɔgɔ caman y’a jira ko kibaru duman man di u ye. An bɛ o kow kun minkɛ ni kantigiya ye, o bɛ Jehowa nisɔndiya.—Nt. 27:11.
3 Ka fara o kan, jɔyɔrɔ bɛ an ka cidenyabaara la walisa Ala sagonata ka kɛ. Ka ɲɛsin Sitanɛ ka diɲɛ halakili nata ma, Jehowa ko : “Siyaw n’a dɔn ko ne ye Jehowa ye.” (Ezek. 39:7) Walisa siyaw ka se ka o dɔn, fo Ala ka baarakɛlaw ka to ka taa Ala tɔgɔ ni a sagonata fɔ “siyaw bɛɛ ni bɔnsɔnw bɛɛ ni kanw bɛɛ ani mɔgɔ sifaw bɛɛ” ye.—Jir. 14:6, 7.
4 Sinsin bɛ kɛ fana an ka cidenyabaara kan ka mɔgɔw kiri tigɛ: Kibaru duman waajuli jɔyɔrɔ dɔ ye ko sinsin bɛ kɛ a kan ka mɔgɔw kiri tigɛ. Ciden Paul ko Krista Yesu bɛna hakɛ bɔ ‘Ala dɔnbaliw la ani an Matigi Yesu Kibaru Duman kan minɛbaliw la.’ (2 Tes. 1:8, 9) Mɔgɔw kiri bɛna tigɛ u kɛcogo de kan ka ɲɛsin kibaru duman ma. O ye koba de ye min dalen bɛ Ala ka baarakɛlaw kan dɛ! Walisa joli hakɛ kana kɛ an na, an man kan ka an yɛrɛ minɛ ka mɔgɔw ladɔnniya Masaya cikan na, o min bɛ mɔgɔw kisi.—Kɛw. 20:26, 27.
5 Ikomi an cɛsirilen don tuma bɛɛ an mɔgɔɲɔgɔnw dɛmɛni na, walisa u ko ka diya Ala ye, o cɛsiriw ye kow ye minnu bɛ Jehowa ka makari jira. (1 Tim. 2:3, 4) Ikomi an b’a dɔn fana ko kow bɛ yɛlɛma-yɛlɛma tuma bɛɛ hadamadenw ka ɲɛnamaya kɔnɔ, o kosɔn an bɛ taa bɔ u ye an tɛ sɛgɛn o la, walisa ka dusu don u kɔnɔ u ka Jehowa ɲini a ɲinituma na. O kɛcogo fɛ, an bɛ “an ka Ala ka makari ni a ka ɲumanya” jira, ale min “t’a fɛ mɔgɔ si ka halaki, a b’a fɛ bɛɛ ka nimisa u ka jurumu la.”—Luka 1:78; 2 Pi. 3:9.
6 An ka cidenyabaara bɛ an yɛrɛ nafa: Ni an bolodegunnen bɛ tuma bɛɛ Jehowa ka baara la, o bɛ an lakana. O b’an dɛmɛ ka Jehowa ka don ɲɛnafilɛ kosɛbɛ. O b’an dɛmɛ fana an kana nɔgɔ nin diɲɛjugu fɛ. (2 Pi. 3:11-14; Tit. 2:11, 12) O la sa, an k’anw sabati ka kɛ sigasigabaliw ye. An ka taa ɲɛ Matigi ka baara la tuma bɛɛ, bawo an b’a dɔn ko an bɛ cɛsiri minnu kɛ an ka cidenyabaara la, olu tɛna kɛ fu ye.—1 Kɔr. 15:58.
[Study Questions]
1. An ka cidenyabaara bɛ Jehowa bolo cogo di, ani mɔgɔw kɛcogo ye jumɛnw ye o ko la?
2. An ka cidenyabaara b’a to an bɛ se ka mun jira?
3. Mun na a nafa ka bon kosɛbɛ an bolo ka mɔgɔw ladɔnniya Ala tɔgɔ ani a sagonata la?
4. Sinsin bɛ kɛ waajuli baara kan cogo di walisa ka mɔgɔw kiri tigɛ?
5. Ala ka makari bɛ ye cogo di an ka cidenyabaara la?
6. Ni an bolo bɛ tuma bɛɛ Jehowa ka baara la, o bɛ an yɛrɛ nafa cogo jumɛn na?