‘Aw ye aw ka kanuya bonya’
1 An Kerecɛnw ka balimaya kɔnɔna na, a ko bɛ an kelen-kelen bɛɛ bolo ka an ta kɛ walisa jɛkulu ka diya. (1 Pi. 1:22; 2:17) O diya sugu bɛ sɔrɔ jɛkulu kɔnɔ, ni an bɛ ‘an ka kanuya bonya’ an ni ɲɔgɔn cɛ. (2 Kɔr. 6:12, 13) Mun na a nafa ka bon an ka an balimakɛw ni an balimamusow dɔn ka ɲɛ?
2 Teriyaw bɛ sinsin ka taga a fɛ: Minnu ye an jɛɲɔgɔnw ye dannaya la, ni an bɛ olu dɔn ka taga a fɛ, o bɛna an bila ka nafaba don u ka limaniya, u ka muɲuni ni u jogo ɲuman tɔw la. U fiɲɛw bɛ dɔgɔya an ɲɛkɔrɔ. Teriya minnu bɛ an ni ɲɔgɔn cɛ, olu fana bɛ sinsin ka taga a fɛ. Ni an bɛ ɲɔgɔn dɔn ka ɲɛ, an bɛ se ka ɲɔgɔn barika bonya, ka ɲɔgɔn dusu saalo. (1 Tes. 5:11) An ni ɲɔgɔn cɛ, an bɛ se ka kɛ ‘dɛmɛ ye min bɛ barika bonya’ walisa an ka ban kow ma, Sitanɛ ka diɲɛ bɛ ko minnu kɛ ni olu bɛ ladamulenya jogow tiɲɛ. (Kol. 4:11) Ka an to don laban gɛlɛnw na, siga t’a la ko hɛrɛko don an bolo ka se ka teri ɲumanw sɔrɔ Jehowa ka jamakulu cɛ ma.—Nt. 18:24.
3 Ni an bɛ kɔrɔbɔli gɛlɛnw na, teri sɛbɛw bɛ se ka kɛ sababu kɛrɛnkɛrɛnnen ye an ka barika ni dususaalo sɔrɔ. (Nt. 17:17) A tun bɛ Kerecɛn muso dɔ kɔnɔ ko a ye mɔgɔ nafantan ye, wa a tun bɛ ka o miirijugu kɛlɛ. A hakili tora nin na: “Teriw tun bɛ yen minnu tun bɛ kuma ne fɛ, ka fɛn ɲumanw fɔ ne kan walisa ka ne dɛmɛ ne ka se sɔrɔ n ka miiri juguw kan.” O teri suguw ye dugawuba de ye ka bɔ Jehowa yɔrɔ.—Nt. 27:9.
4 Aw ka aw mago don tɔw la: Minnu ye an jɛɲɔgɔnw ye dannaya la, an bɛ se ka an ka kanuya bonya olu ta fan fɛ cogo jumɛn na? Ka fara u foli kan Kerecɛn lajɛw la, aw ka aw jija ka baro ɲɛnama kɛ u fɛ. K’a sɔrɔ aw m’a ɲini ka aw sen don u ka kow la, aw k’a jira u la ko aw bɛ aw mago don u la. (Fil. 2:4; 1 Pi. 4:15) Aw bɛ aw mago don tɔw la sira wɛrɛ min fɛ, o ye k’u wele ka na dumuni kɛ aw fɛ. (Luka 14:12-14) Walima aw bɛ se ka fɛɛrɛ tigɛ walisa aw ni u ka baara kɛ ɲɔgɔn fɛ foro cidenyabaara la. (Luka 10:1) Ni an b’a bɔ an yɛrɛ la k’a ɲini ka an balimaw dɔn ka ɲɛ, an bɛ kelenya yiriwa jɛkulu kɔnɔ.—Kol. 3:14.
5 Yali an ka teli ka an teriw sugandi an filanw dɔrɔn cɛ ma, walima mɔgɔw dɔrɔn cɛ ma, mɔgɔ minnu diyanyekow ni an diyanyekow ye kelen ye wa? An man kan k’a to o ko sugu ka dan sigi an ka teriya samani la mɔgɔw fɛ, jɛkulu kɔnɔ. Dawuda ni Jonatan tun ye teriya jɔnjɔn don u ni ɲɔgɔn cɛ, k’a sɔrɔ u si hakɛ ni u bɔyɔrɔ tun tɛ kelen ye. Ruti ni Naomi fana ka teriya tun bɛ ten. (Ru. 4:15; 1 Sa. 18:1) Yali aw bɛ se ka teriya sama mɔgɔ wɛrɛw fɛ wa? Ni aw bɛ o kɛ, o bɛna dugawu lase aw ma, aw ma sigi ni min ye.
6 Ni an bɛ an ka kanuya bonya tɔw ta fan fɛ, an bɛ ɲɔgɔn barika bonya, ka hɛrɛ yiriwa jɛkulu kɔnɔ. Ka fara o kan, an ye kanuya min jira an balimaw fan fɛ, Jehowa yɛrɛ bɛ duga an ye o ko la. (Zab. 41:1, 2; Heb. 6:10) Mun na aw tɛna a kɛ aw kuntilenna ye k’a ɲini ka an balima caman dɔn?
[Study Questions]
1. A bɛ an kelen-kelen bɛɛ bolo ka mun kɛ?
2. Minnu ye an jɛɲɔgɔnw ye dannaya la, mun na a nafa ka bon an ka teriya sinsin an ni olu cɛ?
3. Cogo jumɛn na an bɛ se ka kɛ dɛmɛ ye min bɛ tɔw barika bonya?
4. An bɛ se ka tɔw dɔn ka ɲɛ jɛkulu kɔnɔ cogo di?
5. Sira dɔ la kelen jumɛn fɛ an bɛ se ka teriya sama mɔgɔ wɛrɛw fɛ?
6. Ni an bɛ an ka kanuya bonya an balimaw ta fan fɛ, an bɛ koduman jumɛn dɔw sɔrɔ o la?