Yecogo min bɛ tanu, min bɛ jogosanuya jira
1 Lotɛliɲɛmɔgɔ dɔ ye min fɔ an balimakɛw ni an balimamusow kan salon kafoba ka jamalajɛ dɔ la, o filɛ: “Jehowa Seerew ɲɔgɔn tɛ! Aw ka ɲi, aw ka finidoncogo ka ɲi, wa, aw bɛ mɔgɔw bonya kosɛbɛ fana.” Kafoba ka jamalajɛ dɔ wɛrɛ la, lotɛli baarakɛla musoman dɔ fana ko: “A bɛ ye cogo jɛlɛn na ko aw ka mɔgɔw bɛ fini don walisa k’u ko diya Ala ye.” Ɔwɔ, minnu bɛ taa jamalajɛw la, mɔgɔw bɛ olu kɔlɔsi. O kosɔn, an b’a fɛ an ka finidoncogo ka ‘bɛn ni kibaru duman ye.’ O b’a to fana tuma caman na mɔgɔ minnu tɛ Jehowa Seerew ye, olu bɛ an tanu. An labɛncogo de fana b’a jira cogo jɛlɛn na ko an ye Ala ka cidenyabaarakɛlaw ye. (Fil. 1:27) Ni an bɛ ka an labɛn kafoba ka jamalajɛ kama, a bɛnnen don an ka kɔn ka miiri an yecogo la.
2 Kalanden Yakuba y’a sɛbɛn ko: ‘Hakilitigiya min bɛ na ka bɔ san fɛ, fɔlɔ, o senuma don.’ (Yak. 3:17) An yecogo ka jogosanuya jira, o bɛ se ka kɛ ko gɛlɛn ye. Sitanɛ ka diɲɛ jogojugu bɛ mɔgɔw bila ka finidoncogow ta minnu bɛrɛ bɛnnen tɛ, minnu bɛ cɛ-ni-musoya nege don mɔgɔw la, ani minnu bɛ mɔgɔ yecogo kɛ kabakofɛn ye. O finidoncogow bɛnnen tɛ. (1 Yuh. 2:15-17) O la sa, an bɛna fini minnu don, ani an bɛna an kun dilan cogo min na, n’an bɛna o kow latigɛ tuma min na, an ka kan k’an hakili to Bibulu ka nin laadilikan na: ‘An ka ban alaɲɛsiranbaliya ni nin diɲɛ negew ma, ka taama ni hakilisigi ye nin diɲɛ in kɔnɔ.’ (Ti. 2:12) An t’a fɛ abada mɔgɔ wɛrɛw dusu ka tiɲɛ an yecogo fɛ, a kɛra an balimaw ye wo, walima lotɛli ni dumunikɛyɔrɔ baarakɛlaw ye wo, walima mɔgɔ wɛrɛw minnu bɛ an filɛ.—1 Kɔr. 10:32, 33.
3 Fini min bɛrɛ bɛnnen don, min labɛncogo ɲɛ na: Ni aw bɛ k’aw labɛn tuma min na kafoba ka jamalajɛ kama, aw ka aw yɛrɛ ɲininka nin fɛnw na: ‘Ne filɛ ka fini minnu don, u cogo bɛnnen bɛ wa walima mɔgɔw ka teli ka u ɲɛ jɔ ne la ni u bɛ ne kan na? Yala nin finiw bɛ mɔgɔw gasi sigi wa? Yala ne ka kɔrsasi kan jiginnen bɛ kojugu wa? Yala ne ka kɔrsasi ka surun kojugu wa? Yala ne ka fini ka fɛgɛn fo mɔgɔ bɛ ne fariyɔrɔw ye wa, walima u nɔɔrɔlen bɛ ne na fo ne fari kɛcogo bɛ ye wa? Yala ne ka fini saniyalen don ani kasa tɛ a la min bɛ mɔgɔ tɔɔrɔ wa? Ni ne bɛ ka ne lafiya tuma min na jamalajɛ kalan bolodalen kɔ fɛ, yala ne yecogo bɛnnen don, a saniyalen bɛ iko a bɛnnen bɛ cogo min na cidenyabaarakɛla ma wa? Walima ne bɛ ne yɛrɛ labila, ka ne ka finidoncogo damatɛmɛ, ani min bɛnnen tɛ kafoba ka jamalajɛ badiji ma min bɛ ne ka fini na wa? Yala fini min bɛ ne kan na lafiɲɛwaati la, ne bɛ se ka senfɛ seereya kɛ ni o ye wa?—Rɔm. 15:2, 3; 1 Tim. 2:9.
4 An bɛ se fana ka nafa sɔrɔ Kerecɛn mɔlenw ka hakilinaw la. Muso furulenw ka kan k’u cɛw ɲininka, mɔgɔ tɔw bɛ se ka mun miiri u ka finidoncogo la. Bangebaga minnu ye Jehowa ka baarakɛlaw ye, olu bɛ se k’u ka denmisɛnninw dɛmɛ finidoncogo sira la. Ka fara o kan, musokɔrɔba minnu bɛ siran Ala ɲɛ, olu bɛ se ka ‘muso misɛnninw dɛmɛ ka u ni u hakili jira ɲɔgɔn na . . . u ka kɛ mɔgɔ hakilimanw ye, ani mɔgɔ senumaw ye u yecogo la walisa Ala ka kuma tɔgɔ kana tiɲɛ.’ (Ti. 2:3-5) Fini minnu labɛnnen don ka ɲɛ, minnu bɛnnen bɛ, olu ja caman bɛ an ka sɛbɛnw kɔnɔ. U bɛ se ka an dɛmɛ.
5 An ka tanuli lase Jehowa ma: Kafoba ka jamalajɛw ye waati ye, an bɛɛ bɛ se ka Jehowa tanu min kɔnɔ, a tɛ dan jamalajɛ koɲɛw ɲɛnabɔbagaw dɔrɔn ma. A jɛlen don ko an ka kerecɛn taamacogo ni an kumacogo bɛ bonya da Jehowa kan. Nka, mɔgɔw bɛ fɛn fɔlɔ min kɔlɔsi an na, o ye an ka finidoncogo ni an kundilancogo ye. An bɛɛ ka tanuli lase Jehowa ma an ka yecogo fɛ min bɛ tanu, min bɛ jogosanuya jira. —Zab. 148:12, 13.
[Study Questions]
1. Ni an bɛ ka an labɛn kafoba ka jamalajɛ kama, mun na an ka kan ka miiri an yecogo la?
2. Mun na a ka gɛlɛn ka fini don ani ka an kun dilan cogo la min bɛ jogosanuya jira?
3. Ɲininkali jumɛnw bɛna an dɛmɛ ka an yecogo sɛgɛsɛgɛ?
4. Mɔgɔ tɔw bɛ se ka an dɛmɛ cogo di walisa an yecogo ka an ka jogosanuya jira?
5. An bɛɛ bɛ se ka tanuli lase Jehowa ma an ka kafoba ka jamalajɛ tuma na cogo di?
[Box on page 6]
Fɛn minnu b’an dɛmɛ walisa an yecogo ka tanu
◼ Ala ka Kuma
◼ Yɛrɛ-sɛgɛsɛgɛ
◼ Mɔgɔ wɛrɛw ka hakilinaw
◼ Kerecɛn sɛbɛnw