“An ka A tɔgɔ kɔrɔta ɲɔgɔn fɛ!”

¹ Zaburu sɛbɛnbaga ye dɔnkili da ko: ‘An ka jɛ ka Jehowa tanu, an ka a tɔgɔ kɔrɔta ɲɔgɔn fɛ!’ (Zab. 34:4) An ka kafoba ka jamalajɛ nata tɔgɔ ye ko “An ka taama ni Ala ye.” O bɛna kɛ sababu ye anw ani an balimakɛw ni an balimamusow minnu bɛ jɛkulu wɛrɛw la, an bɛɛ ka jɛ ɲɔgɔn fɛ ka Jehowa tɔgɔ kɔrɔta. Yala aw ye fɛɛrɛw tigɛ aw jatigilako la, aw taaliko ni aw naliko la ka bɔ jamalajɛ la, ani aw ka kɔnze ko la aw ka baarakɛyɔrɔ la wa? An bɛ hakilitigiya baara de kɛ ni an kɔnna ka o kow ɲɛnabɔ.—Nt. 21:5.

² Ni an sera jamalajɛ kɛyɔrɔ la: N’an bɛ na jamalajɛ la, an ka kan ka fɛn caman de jateminɛ. Ka kɔn ka bɔ so walisa ka taa jamalajɛ la, o bɛna a to ko cunnenw kana se ka an lasumaya. O b’a to fana an bɛ se ka sigiyɔrɔ sɔrɔ a waati la walisa an ka se ka jɛ ka kalan daminɛ dɔnkili da ani ka delili lamɛn ni tɔw ye n’an dusukun bɛɛ ye. (Zab. 69:31) Miniti damadɔ sanni kalan ka daminɛ, k’a sɔrɔ Masaya fɔli bɛ sen na, kalan ɲɛminɛbaga bɛ taa sigi jama ɲɛ fɛ. An bɛɛ ka kan ka an sigiyɔrɔ magɛn o waati la walisa kalan ka se ka daminɛ ni bonya ye ani cogo ɲɛnabɔlen na.—1 Kɔr. 14:33, 40.

³ Ala ka Kuma b’a ɲini an fɛ an ka ‘fɛn bɛɛ kɛ an cɛ ma ni kanuya ye.’ (1 Kɔr. 16:14) Ni lajɛ kɛyɔrɔ dayɛlɛla lɛrɛ 8 la, ni an bɛ tɔw bonya, o bɛna an bali an ka boli, an ka girin ani an ka mɔgɔw ɲɔni walima k’u digi ka tɛmɛ walisa an ka an ɲɛna sigiyɔrɔ sɔrɔ sanni mɔgɔ wɛrɛw ka o ta. An ni minnu bɛ na mobili kelen na, walima an ni minnu bɛ so kelen kɔnɔ, an ka kan ka sigiyɔrɔ mara olu dɔrɔn de ye.—1 Kɔr. 13:5; Fil. 2:4.

⁴ An b’a ɲini aw fɛ aw ka na ni aw ka tilelafana ye aw bolo, sanni aw ka bɔ jamalajɛ kɛyɔrɔ la ka taa dumuni ɲini lafiyɛnbɔ waati la, tile fɛ. Ni aw nana ni aw ka dumuni ye aw bolo, o bɛna a to an bɛɛ lajɛlen bɛ jɛɲɔgɔnya ɲuman diyabɔ, ani ka kɛ jamalajɛ kɛyɔrɔ la wuladafɛ kalan daminɛ tuma yɛrɛ la. Ni aw mago bɛna kɛ galasiyɛri fitinin la, aw bɛ se ka na ni o ye, k’o bila aw ka sigilan jukɔrɔ. Nka, galasiyɛri belebelew, wɛrɛminɛn minnu bɛ se ka ci ani dɔlɔmafɛnw yamaruyalen tɛ kafoba ka jamalajɛ kɛyɔrɔ la.

⁵ Alako ta fan fɛ dumuni caman fɛti bɛ an ɲɛ: Masakɛ Josafat tun ye mɔgɔ ye min y’a ‘dusukun labɛn Ala ɲinini kama.’ (2 Til. 19:3) An fana bɛ se k’an dusukun labɛn cogo di kafoba ka jamalajɛ kama? Alako ta fan fɛ dumuni minnu bɛna di an ma jamalajɛ la, o ɲɛfɔlen bɛ barokunw kɔnɔ minnu bɛ Mɛkalo tile 22 ani Zuwɛnkalo tile 8 Réveillez-vous ! ɲɛ laban na. An ka waati ta ka miiri o barokunw kan walisa k’a ɲini k’a dɔn Jehowa ye min bila an ɲɛ. K’a ɲini Jehowa fɛ a ka an dɛmɛ ka faamuyali sɔrɔ kalan nata la ani ka o waleya, o fana sen bɛ an dusukun labɛnni na. —Zab. 25:​4, 5.

⁶ An bɛɛ b’a fɛ ka dɔ fara an ka dɔnniya kan Ala ka Kuma ko la bawo an b’a dɔn ko o de sababu fɛ an bɛna se ka kɔgɔ ka kisili sɔrɔ. (1 Pi. 2:2). O la sa, an bɛɛ ka ye an ka Kafoba ka jamalajɛ kɛnɛ kan, min tɔgɔ ye ko ‘An ka taama ni Ala ye, ani an ka Jehowa tɔgɔ kɔrɔta ɲɔgɔn fɛ.’—Zab. 34:4.

[Study Questions]

1. Sababu jumɛn bɛna a to an bɛ jɛ ka Ala tɔgɔ tanu ɲɔgɔn fɛ, ani an bɛ se ka mun kɛ kabini sisan walisa k’an labɛn o kama?

2. Mun na a nafa ka bon an ka fɛɛrɛ tigɛ walisa ka se joona jamalajɛ kɛyɔrɔ la?

3. Ni an bɛ an ka sigiyɔrɔ ɲinina tuma min na, an bɛ se ka tɔw bonya cogo di?

4. Fɛɛrɛ jumɛn kofɔra tilelafana ko la, ani nafa jumɛn bɛ o la?

5. An bɛ se k’an dusukunw labɛn cogo di jamalajɛ kalan kama?

6. An bɛɛ ŋaniya ye mun ye, ani mun na o ŋaniya bɛ an na?

[Box on page 5]

An bɛ Ala tɔgɔ kɔrɔta sira minnu fɛ

◼ An ka kɔn k’an labɛn

◼ An k’a jira ko an bɛ tɔw kanu

◼ An ka an dusukun labɛn