Finidoncogo ɲuman bɛ bonyaba da Ala kan
1 Yanni dɔɔnin cɛ, an bɛna bonya sɔrɔ ka kɛ Jehowa ka mɔgɔ welelenw ye kafoba ka jamalajɛ la, n’o tɔgɔ ye ko: “An ka nɔɔrɔ da Ala kan.” Jehowa y’an wele ka na o la walisa ka dumunifɛn camanba di an ma alako ta fan fɛ. An bɛ a waleɲumandɔn kosɛbɛ o la! An bɛ se k’a jira ko an bɛ bonyaba da Jehowa kan, ko an b’a waleɲumandɔn a ka fɛɛrɛ tigɛlenw na alako ta fan fɛ, an ka finidoncogo ni an yecogo fɛ. — Zab. 116:12, 17.
2 An ka saniya, k’an yɛrɛ dilan cogo ɲɛnabɔlen na: An yecogo ka kan ka an ka Ala ka naamuw jira. Ala saniyalen bɛ. A ka ko si ferekelen tɛ. (1 Kor. 14:33 ; 2 Kor. 7:1) O la sa, an farikolo, an kunsigi, ni an sɔnifaraw ka kan ka saniya. An ka kan ka kɛ mɔgɔw ye minnu yecogo ka ɲi. Bi bi in na, mɔgɔ caman bɛ u yɛrɛ labila. Farikoloɲɛnajɛkɛla ŋana dɔ, walima mɔgɔ dɔ min bɛ bɔ sinima na ka caya, ni o ye a yɛrɛ labila, o kɔrɔ tɛ ko Kerecɛn ka kan ka o ɲɔgɔn kɛ. Ni an bɛ tugu sangawulikow kɔ, a ka gɛlɛn mɔgɔw bolo ka Ala lakika batobagaw faranfasiya ka bɔ mɔgɔw la minnu tɛ a batobagaw ye. — Mal. 3:18.
3 Finidoncogo min bɛnnen bɛ Kerecɛn cidenyabaarakɛlaw ma: Ciden Paul ye bataki sɛbɛn tuma min na Kerecɛn lakɔlɔsibaga Timote ma, a tun ye dusu don musow kɔnɔ ‘u k’u masiri cogo bɛnnen na . . . ni kuncɛdɔgɔya ye . . . i n’a fɔ muso minnu b’a fɔ k’u bɛ Ala bonya . . . ni kɛwale ɲumanw ye.’ (1 Tim. 2:9, 10) Walisa ka da a la tigitigi ko an ka finiw labɛncogo ka ɲi, fo an ka miiri ni ɲɛmajɔ ye. An ka finiw ka kan ka kɛ fini saniyalenw ye, fini sarama minnu cogo bɛrɛ bɛnnen don. U man kan ka kɛ fini ɲuguɲugulenw ye walima finiw ye minnu tɛ mɔgɔ sutura. — 1 Pi. 3:3.
4 Paul y’a fɔ fana ko an kana an ka kow damatɛmɛ ni an ‘kundigicogo ye, ani sanu, walima ni kɔnɔnkisɛ sɔngɔ gɛlɛnw, walima ni fini sɔngɔ gɛlɛnw ye.’ (1 Tim. 2:9) N’an bɛ masirifɛnw don k’a sɔrɔ an ma u damatɛmɛ, walima ni an bɛ an ɲɛda cɛɲɛ cogo bɛrɛ bɛnnen na, k’an pari ni fɛn wɛrɛw fana ye k’o bɛrɛ bɛn, o ye ka i ka ko kɛ ni hakilitigiya ye. Kerecɛnmuso ka kan ka tugu o kɛcogo de la. — Nt. 11:2.
5 Paul ye laadilikan min di Kerecɛnmusow ma, o fana ɲɛsinnen bɛ Kerecɛncɛw ma. Fini sugu minnu bɛ diɲɛ tabolo jira, balimakɛw ka kan k’u tanga olu ma. (1 Yuh. 2:16) Misali la, jamana dɔw la, ka finiw don minnu ka bon mɔgɔ ma, o de ka ca kosɛbɛ. Nka, Ala ka cidenyabaarakɛla bolo, o fini sugu bɛ mɔgɔ jira yecogo la min bɛnnen tɛ.
6 Lafiya waatiw la, jamalajɛ kalanw kɔ fɛ: Balimakɛw ni balimamusow fanba ye misali ɲumanw ye u ka finidoncogo ni u yecogo la ni u bɛ jamalajɛ kɛnɛ kan. Nka, mɔgɔ dɔw bɛ u yɛrɛ labila ni u bɛ taa jamalajɛ la, walima ni u bɛ na ka bɔ o yɔrɔ la, walima ni u bɛ ka fɛn wɛrɛw kɛ jamalajɛ kalanw kɔ fɛ. A kɛra jamalajɛ kalan kɛtuma ye, walima waati wɛrɛ ye, an yecogo b’a to mɔgɔw bɛ hakilila dɔ ta ka ɲɛsin Ala ka jamakulu ma. Ikomi jamalajɛ badiji bɛ an disi la, an ka kan tuma bɛɛ ka an yɛrɛ dilan cogo la min bɛnnen don Kerecɛn cidenyabaarakɛlaw ma. Tuma caman na, o bɛ mɔgɔ tɔw bila u ka an tanu, ka sira dayɛlɛ an ye fana ka seereya kɛ. — 1 Kor. 10:31-33.
7 Ni an bɛ yɛlɛmisɛn kɛ mɔgɔ fɛ teriya sira la, o bɛ an ɲɛda cogo ɲɛ ka t’a fɛ cogo min na, o cogo kelen na, ni an ka finidoncogo ni an yecogo ka ɲi, o bɛ danbe don cikan na, an bɛ cikan min lase mɔgɔw ma. O bɛ danbe don fana jɛkuluba la min tɔgɔ b’an kan. An ka ɲinan kafoba ka jamalajɛ tuma la, n’o ye ko “An ka nɔɔrɔ da Ala kan,” mɔgɔ minnu b’an kɔlɔsi, laala, olu dɔw bɛ se k’a ɲini k’a dɔn mun na anw ni tɔw tɛ kelen ye. A laban na, u bɛ se k’a fɔ ko: ‘An bɛ taa aw fɛ, bawo an y’a mɛn [k’a kɔlɔsi] ko Ala bɛ ni aw ye.’ (Zak 8:23) An kelen-kelen bɛɛ ka bonya da Jehowa kan, an ka finidoncogo ni an yecogo fɛ.
[Study Questions]
1. An bɛ se k’an ka waleɲumandon jira cogo di an ka kafoba ka jamalajɛ nata la ?
2. Ka kɛ mɔgɔ saniyalenw ye, ani mɔgɔw ye minnu yecogo ka ɲi, mun na o nafa ka bon an bolo?
3. An bɛ se ka da a la tigitigi cogo di ko an yecogo ani laadilikan min bɛ 1 Timote 2:9, 10, olu bɛ taa ɲɔgɔn fɛ?
4, 5. Kerecɛncɛw ni kerecɛnmusow ka kan k’u hakili to laadilikan jumɛn na?
6. N’an bɛ ka taa jamalajɛ la, walima ni an bɛ ka na ka bɔ o yɔrɔ la, walima ni an bɛ jamalajɛ kɛnɛ kan, an ka finidoncogo ni an yecogo ka kan k’a jira jamalajɛ don kelen-kelen bɛɛ la ko an bɛ naamu kɔrɔtalenw mara. Mun na?
7. An ka finidoncogo ni an yecogo ɲuman bɛ nɔ jumɛn bila tɔw la?
[Box on page 5]
An ka danbe jira an yecogo fɛ
▪ An taatɔ ni an segintɔ ka bɔ jamalajɛ la
▪ Jamalajɛ kɛnɛ kan
▪ Lafiya waatiw la, jamalajɛ kalanw kɔ fɛ