An ka Jehowa tanu jamaba cɛma

¹ An ka kafoba ka jamalajɛw bɛ cogo ɲumanba de di an ma, san o san, ka nɔɔrɔ da Jehowa kan. An dusukunnata ni Dawuda dusukunnata bɛɛ ye kelen ye, ale min ye dɔnkili da ko: “Ne na i tanu jamaba cɛma, ne na barika da i ye mɔgɔ caman cɛma.” (Zab.35:18) An ka kafoba ka jamalajɛ min bɛna kɛ, o tɔgɔ ye ko: “An ka Ala kan minɛ.” O la sa, iko jamakulu bɛnnɛn kelen, an bɛ se ka mun kɛ walisa an ka kɛ sababu ye tanuli ka lase Jehowa ma?

² An bɛ se ka kɛ sababu ye walisa tanuli ka lase Jehowa ma, sira min dɔ fɛ, o ye an taamacogo ye. Jamalajɛ bɛ kɛ yɔrɔ minnu na, o kuntigi dɔ ye nin fɔ an ko la: “An y’an sinsin aw ka jamalajɛw kan, k’a fɔ diinɛ kulu wɛrɛ mɔgɔw ye minnu b’a fɛ ka an ka yɔrɔ maminɛ, ko u ka na, k’a lajɛ Jehowa Seerew bɛ jamalajɛ labɛn cogo min na. U ka na k’a lajɛ aw ka kow labɛncogo ka ɲi cogo min na.” O la sa, an yecogo fɛ, an ka jɛ-ka-baara fɛ, ani an taamacogo fɛ, an kelen-kelen bɛɛ bɛ se k’a ta kɛ walisa nin dakabana tanuli kumaw ka lase an ka Ala ma, ale min ni o tanuli sugu ka kan.​—1 Pi. 2:​12.

³ An kelen-kelen yecogo fɛ: Walisa an ka fini doncogo, ani an kun dilancogo ka tanuli lase Jehowa ma, fo an ka kɛ mɔgɔw ye minnu ka kow bɛrɛ bɛnnen don. (1 Tim. 2:⁠9) École du ministère gafe ɲɛ 132 la, a fɔlen bɛ yen ko: “Mɔgɔ min ka kow bɛrɛ bɛnnen don, o tigi bɛ hami walisa a kana don mɔgɔw gasi la fu, ani ka mɔgɔw bila fana u k’a filɛ fo k’a dama tɛmɛ.” Jamana caman na, mɔgɔw bɛ finiw don minnu bɛnnen tɛ. Nka, an bɛ cɛsiri minnu kɛ walisa ka an yɛrɛ jira Ala ka mɔgɔ jɔnjɔnw ye, o ye ko ye min nafa ka bon Jehowa bolo kosɛbɛ. (Kɛw. 15:14) Hali n’a y’a sɔrɔ jamalajɛ bɛ kɛ farikoloɲɛnajɛw kɛyɔrɔ de la, walima ɲɛnajɛ wɛrɛw kɛyɔrɔ de la, o bɛɛ n’a ta an ka ɲɔgɔnlajɛ bɛ kɛ anw ka “jamaba” ye jamalajɛ tile saba kɔnɔ. O la sa, ikomi an bɛ k’an lajɛ Jehowa de ɲɛkɔrɔ, ale Min kɔrɔtalen bɛ dunuya bɛɛ kunna, an ka kan ka fini don ni danbɛ ye, min ni ale ka kan.​—1 Til. Kib. 29 :⁠11.

⁴ An ka kan fana ka an hakili to an yecogo la jamalajɛ don kelen-kelen bɛɛ kalan bannen kɔ fɛ. A nege bɛ se ka kɛ an na ka finiw don minnu bɛ an lafiya ni an bɛ ka an ɲɛnajɛ tuma min na walima ni an bɛ ka dumuni kɛ tuma min na dumuni kɛyɔrɔ dɔ la. O n’a ta o ta, a nafa ka bon an ka finiw ni an kundilancogo ka kɛ iko a bɛnnen bɛ cogo min na mɔgɔw ma minnu b’a fɔ “ko u bɛ siran Ala ɲɛ.” (1 Tim. 2 : 10) Ni mɔgɔ camanba sɔnna fini min na, o kɔrɔ tɛ k’o fini ye fini donta ye. (1 Yuh. 2 : 16, 17) An ka Kerecɛn sɛbɛnw bɛ cɛw ani musow ka finidoncogo ɲuman ni finidoncogo bɛnnen jaw jira, ka o cɛw ni o musow to yɔrɔ suguya caman na. Ni an ka badiji nɔrɔlen bɛ an ka fini na, k’a sɔrɔ an bɛ dugu kɔnɔ, jamalajɛ bɛ kɛ yɔrɔ min na, o bɛna an hakili jigin ko an ye tuma bɛɛ Kerecɛn cidenyabaarakɛlaw de ye .​—2 Kɔr. 6 : 3, 4)

⁵ An ka Jehowa ka tabali bonya, n’o ye hakili dumuni ye, a ye min labɛn an kama: Dunuya bɛɛ Masaba ye dumuniba da an ɲɛkɔrɔ. (Esa. 25: 6; 1 Kɔr. 10:21) Ni a nafa ka bon an bolo k’an niyɔrɔ sɔrɔ Jehowa ka tabali la, an kuntilenna bɛna kɛ ka na jamalajɛ tile saba bɛɛ la. Yala aw ye fɛɛrɛw tigɛ aw siyɔrɔko la ani aw taacogo la wa? Yala aw y’a ɲini aw ka baarakɛyɔrɔ kuntigi fɛ a k’aw labila walisa aw ka se ka taa jamalajɛ la wa? Yala aw ye waati caman fana boloda walisa ka aw yɛrɛ labɛn wa? Aw bɛ waati min kɛ sira la sanni aw ka se jamalajɛ kɛyɔrɔ la, yala aw ye o waati jateminɛ walisa aw ka se joona, ka sigiyɔrɔ sɔrɔ, ani ka aw fara balimaw kan Jehowa tanuli la kalandaminɛ dɔnkili ni delili la wa?​—Zab. 147 :⁠1.

⁶ An mago bɛ dumuni min na sisan, Jehowa bɛ ka o de di an ma jɔnkɛ dannamɔgɔ hakilima sababu fɛ. (Mat. 24:45) O kosɔn, ni kalan bɛ ka kɛ tuma min na jamalajɛ kɛyɔrɔ la, an ka an tulomajɔ kosɛbɛ, an kana kuma mɔgɔ wɛrɛw fɛ k’a sɔrɔ kun sɛbɛ tɛ o la, an kana dumuni kɛ o tuma na, walima ka an yaala-yaala o waati la. Ni an bɛ tugu o laadilikanw kɔ, an bɛna jira o cogo de la, ko an bɛ Jehowa ka tabali bonya. An si man kan k’a to Jamalajɛ kalan kelen ka fɔ an kɔ. Bangebagaw ka kan k’u denw sigi u kɛrɛ fɛ, walisa k’u denw dɛmɛ olu fana ka nafaba sɔrɔ kalan na.​—Dut. 31:12.

⁷ A ɲinina an fɛ an ka na ni tilelafana ye an bolo walisa kalan jɔlen kɔ fɛ, an kana bɔ jamalajɛ kɛyɔrɔ la ka taa dumuni ɲini. An balima minnu bɔra jamana wɛrɛw la walisa ka na an ka jamalajɛ la salon, olu camanba nana ni u ka dumuni ye u bolo. An bɛ u tanu o la. Ni an bɛɛ sera k’o kɛ ɲinan, o na kɛ tanuliba ye dɛ! (Heb. 13:17) O ko min ɲinina an fɛ, o bɛ cogo di an ma, anw ni an balimaw ka balimaya diyabɔ tilelafana duntuma na. O bɛ dɔ fara an ka bɛn ni an ka kelenya kan, ka bonya lase Jehowa.​—Zab. 133:⁠1.

⁸ An ka senfɛ seereya kɛ: Ni an bɛ ka taa jamalajɛ kɛyɔrɔ la tuma min na, ani ni an bɛ ka na ka bɔ o yɔrɔ la tuma min na, an bɛ cogo caman sɔrɔ ka Jehowa tanu ni an dawolow ye. (Heb. 13:15) Ni an bɛ ka dumuni kɛ dumuni kɛyɔrɔ dɔ la, walima ni an bɛ ka baro kɛ lotɛli baarakɛla dɔ fɛ, an k’a ɲini ka seereya kɛ. Ikomi an hakiliw ni an dusukunw bɛna dumuni nafamaba caman sɔrɔ jamalajɛ la, an ka o fɛn dumanw fɔ mɔgɔw ye, an ni minnu bɛ bɛn.​—1 Pi. 3 :15.

⁹ An kɔrɔtɔlen de bɛ ka jamalajɛ makɔnɔ, ka se ka Jehowa tanu “jama cɛma” (Zab. 26:12) An ka kɛ kelen ye ka Jehowa tanu Kafoba ka jamalajɛ la, n’o tɔgɔ ye ko: “An ka Ala kan minɛ.”

[Study Questions]

1, 2. Kafoba ka jamalajɛ bɛ cogo jumɛn de di an ma, ani an bɛ se k’o kɛ sira jumɛnw fɛ?

3, 4. Ni an ka kow bɛrɛ bɛnnen don, o bɛna an dɛmɛ cogo di an ka finiw don cogo la min bɛnnen don Kerecɛn cidenyabaarakɛlaw ma, jamalajɛ kɛtuma na ani jamalajɛ kalanw bannen kɔ fɛ?

5, 6. An bɛ se k’a jira cogo di ko an bɛ Jehowa ka tabali bonya, n’o ye hakili dumuni ye a ye min labɛn an kama?

7. A ɲinina an fɛ, an ka mun kɛ tilelafana ko la, ani mun na?

8, 9. Jamalajɛ bɛ cogo wɛrɛ jumɛn di an ma ka Jehowa tanu?

 [Box on page 6]

An k’an hakili to fɛn ninnu na kafoba ka jamalajɛ ko la:

◼ Kalan kɛwaatiw: Kalan bɛna daminɛ sɔgɔma 9h30, tile saba bɛɛ la. Miniti damadɔw sanni kalan ka daminɛ, kalan ɲɛminɛbaga bɛ taa i sigi jama ɲɛ fɛ. O tuma b’a sɔrɔ Masaya fɔli bɛ ka kɛ. An kelen-kelen bɛɛ ka kan ka an sigiyɔrɔ magɛn o waati la, walisa kalan ka se ka daminɛ ni bonya ye. Kalan bɛna kuncɛ wulada fɛ 5h05 Juma ni Sibiri, ani 4h10 Karidon wulada fɛ.

◼ Mobilijɔyɔrɔ : Ikomi tuma caman na, mobilijɔyɔrɔ tɛ kɛnɛba kojugu ye, o kosɔn mɔgɔ caman ka kan ka jɛ ka na mobili kelen na, sanni mɔgɔ kelen walima mɔgɔ fila dɔrɔn ka na mobili kelen na. Ni an bɛna an ka mobili jɔ tuma min na, ani ni an bɛna taa tuma min na, ni an sɔnna ka an balimakɛw lamɛn minnu bɛ mobilijɔyɔrɔ ko kun na, o na kaasaraw bali.

◼ Sigiyɔrɔ marali: Sigiyɔrɔw bɛ se ka mara mɔgɔ minnu dɔrɔn ye, o ye mɔgɔw ye minnu ni aw bɛ na ɲɔgɔn fɛ mobili kelen na, walima aw ni minnu bɛ so kelen kɔnɔ.

◼ Bolomafaraw : Wari caman de bɛ bɔ walisa ka se ka kafoba ka jamalajɛ labɛn. An bɛ se ka an ka waleɲumandɔn jira ni an b’a bɔ an yɛrɛ la ka bolomafaraw di diɲɛ mumɛ baara kama an ka Masaya so kɔnɔ, walima jamalajɛ kɛyɔrɔ la.

◼ Tilelafanako: A ɲininen bɛ aw fɛ aw ka na ni aw ka tilelafana ye aw bolo, walisa aw kana bɔ jamalajɛ kɛyɔrɔ la ka taa dumuni ɲini kɛnɛma tilelafana duntuma na. Fɛn sumalen bɛ mara galasiyɛri fitinin min kɔnɔ, ni o bɛ se ka bila sigilan jukɔrɔ, aw bɛ se ka na ni o ye. Aw ma kan ka na ni galasiyɛriw ye minnu dilanna denbayaba kama, walima wɛrɛmafɛnw walima ni dɔlɔmafɛnw ye jamalajɛ kɛyɔrɔ la.

◼ Ja tali walima Kumakan tali : Ja ni kumakan bɛ ta ni masin sugu o sugu ye, olu si man kan ka don jamalajɛ kɛyɔrɔ kuran na, walima jamalajɛ kumakan tɛmɛsira si fɛ. Aw ka baara kɛ ni o mansinw ye cogo la min tɛna mɔgɔw hakili ta ka bɔ kalan kan.

◼ Foto tali : Ni aw bɛ ka foto ta kalan kɛtuma na, aw kana a to fototalan ka fotota yeelen bɔ.

◼ Pajɛriw ni Selilɛriw : O fɛnw ka kan ka labɛn, ka bila cogo la min b’a to u tɛna kɛ sababu ye ka mɔgɔw hakili ta ka bɔ kalan kan.

◼ Kaasaraw ani kɔrɔtɔkow : Ni mɔgɔ dɔ nana bana jamalajɛ kɛnɛ kan fo ka na o kɛ ko ye, min tɛ se ka bila ka sumaya, an b’a ɲini aw fɛ aw ka kuma balimakɛ fɛ min ka surun aw la ni o bilalen bɛ mɔgɔ kunbɛn kama. O balimakɛ na o fɔ mɔgɔw ye minnu bɛ dɛmɛ kunfɔlɔ lase banabagatɔw ma. O mɔgɔw cɛma, min bɛ a ɲɛdɔn kosɛbɛ, o bɛna jateminɛ kɛ bana juguya kan, ka o tigi dɛmɛ. Banabagatɔ bɛ bangebagaw ni denbaya minnu bolo, olu de ka kan k’u hakili to a la ka na ni banabagatɔ ka furaw ye u bolo walisa ni banabagatɔ mago bɛ a ka furaw la tuma min na, a ka se k’u ta iko a sɛbɛnna a kun cogo min na.

◼ Siyɔrɔko: Ni aw bɛ yɔrɔ o yɔrɔ la, aw ka hakili senu den jira aw kɛcogo fɛ ni mɔgɔ kelen-kelen bɛɛ ye o yɔrɔ la. Aw ka kɛ mɔgɔw ye minnu ka ɲi, minnu bɛ mɔgɔw fɛ, minnu bɛ bonya da mɔgɔ wɛrɛw kan. Ni aw jiginnen bɛ mɔgɔw de ka so, aw k’aw sen don u ka baaraw ni u ka musakaw la. Don laban na, sanni aw ka bɔ yen, aw ka so saniyalen ni a labɛnnen to.