“Min bɛ se ka o kuma minɛ, o ka a minɛ”

¹ Don dɔ la, tuma min na Yesu tun bɛ ka kuma a ka kalandenw fɛ furu ko kan, a da sera furukɛbaliya ma. A ye o kofɔ i n’a fɔ ‘nilifɛn.’ A tilara k’a fɔ ko: “Min bɛ se ka o kuma minɛ, o ka a minɛ.” (Mat. 19:​10-​12) San damadɔ o kɔ, ciden Pol kumana furukɛbaliya nafaw kan, ka dusu don tɔw kɔnɔ u ka ale yɛrɛ ladege, ka to furukɛbaliya la. (1 Kɔr. 7:​7, 38) Mɔgɔ caman ye ‘o kuma minɛ’ furukɛbaliya kan, k’a nafa sɔrɔ. O nafa dɔw ye jumɛnw ye?

² Ka Baara kɛ “k’a sɔrɔ fɛn fosi ma i hakili ta ka bɔ o kan”: Pol tun ye a faamu ko furukɛbaliya b’a to a bɛ se ka Jehowa ka baara kɛ ‘k’a sɔrɔ fɛn fosi ma a hakili ta ka bɔ o kan.’ O cogo kelen na bi fana, cɛgana bɛ se k’a ɲini ka lakɔli kɛ min tɔgɔ ko l’École de formation ministérielle. Tuma caman na, a ka nɔgɔn furukɛbali bolo ka tutigɛbagaya baara daminɛ, ka kan wɛrɛ kalan, ka taa yɔrɔ wɛrɛ la weleweledala ko bɛ yɔrɔ min na, ka taa baara kɛ Betɛli la, walima ka bonya kɛrɛnkɛrɛnnen wɛrɛw sɔrɔ Ala ka baara la. A bɛ se ka waati caman sɔrɔ, sira caman fɛ walisa ka a yɛrɛ-kalan cogo ɲɛnama na, ka taasi, ka kuma Jehowa fɛ delili jɛlenw na. Tuma caman na fana waati bɛ furukɛbali bolo walisa ka tɔw dɛmɛ. Nin kow bɛɛ ye furukɛbaliya “nafa” dɔw ye.​—⁠1 Kɔr. 7:​32-​35; Kɛw. 20:35.

³ Ka baara kɛ Ala ye o cogo la k’a sɔrɔ fɛn fosi ma i bali, o bɛ na ni dugawu caman ye. A kɛlen kɔ ka san 27 kɛ Keniya jamana na, an balimamuso dɔ, min tun furulen tɛ, o y’a sɛbɛn ko: “Ne teriw tun ka ca kosɛbɛ, wa, ne ka baara fana tun ka ca. An tun bɛ fɛn caman kɛ ɲɔgɔn fɛ. An tun bɛ taa bɔ ɲɔgɔn ye. . . Ikomi ne tun furulen tɛ, fosi tun tɛ ne bali ka n diyanyekow kɛ: yɔrɔ o yɔrɔ ka di n ye, n tun bɛ se ka taa yen. O y’a to ne tun cɛsirilen bɛ ne ka cidenyabaara la. O tun ye nisɔndiyaba lase ne ma.” A y’a sɛbɛn fana ko: “Sanw senfɛ, ne ni Jehowa gɛrɛla ɲɔgɔn na kosɛbɛ.”

⁴ Yesu ka kuma minɛ furukɛbaliya ko la: Yesu y’a jira ko ‘sankolola masaya kosɔn’ mɔgɔ bɛ se ka furukɛbaliya sira ta. (Mat. 19:12) Iko nilifɛn sifa bɛɛ, furukɛbaliya sira tali bɛ nisɔndiya ni nafa caman lase mɔgɔ ma, ni a kɛra cogo bɛnnen na. U kɛtɔ ka tɔnɔ bɔ u ka furukɛbaliya la, ani u kɛlen k’u ka dannaya da Ala kan, walisa ka hakilitigiya ni fanga sɔrɔ, mɔgɔ caman nana a faamu ko ka Yesu ka kuma minɛ furukɛbaliya ko la, n’o ye nilifɛn ye, o nafa ka bon.