Baarakɛminɛn kura b’an bolo walasa ka kalanw daminɛ
1 Etazuni muso dɔ tun cɛsirilen bɛ kosɛbɛ Katoliki diinɛ ko la min ɲɛmɔgɔya bɛ Romɛ. A tun bɛ egilisi kalansiraw lafasa ni kantigiya ye. A taara diinɛ taama dɔ yɛrɛ la Vatikan. Nka, don min na Jehowa Seerew taara a ka da kɔnkɔn, a sɔnna sokɔnɔ Bibulu kalan ma. Mun na? Katuguni a tun b’a fɛ k’a dɔn Bibulu bɛ min fɔ. Ka fara o kan, a ka egilisi tun tɛ sokɔnɔ Bibulu kalan kɛ mɔgɔw kun. Muso in ka ko bɛ mun jira an na? K’an t’a dɔn abada mɔgɔ min bɛ se ka sɔn Bibulu kalan ma.—Waj. 11:6.
2 Mɔgɔ o mɔgɔ b’a fɛ ka Bibulu dɔn, an b’a fɛ k’o tigi dɛmɛ. Nka, yali i sigara k’o fɔ mɔgɔw ye wa? Yali i ka kin kɔnɔmɔgɔw bɛɛ b’a dɔn k’an b’o baara kɛ fu wa? An bɛ se k’a dɔn cogo di k’u bɛ o kala ma? N’an bɛ baara kɛ n’an ka baarakɛminɛn kura ye. Ɲɛ wɔɔrɔ sɛbɛndennin dɔ don min tɔgɔ ye ko Aimeriez-vous en savoir plus sur la Bible? (Yali i b’a fɛ ka dɔ fara i ka Bibulu dɔnniya kan wa?) An ka sɛbɛndennin kɔnɔko dɔn, tilayɔrɔ ni tilayɔrɔ.
3 “Pourquoi lire la Bible?” (Mun na ka Bibulu kalan?) Sɛbɛndennin bɛ kun minnu di an ma, olu ka di mɔgɔw ye kosɛbɛ. A b’a jira ko fɛn caman bɛ Bibulu kɔnɔ, minnu sababu fɛ ‘Ala b’an kalan ni kanuya ye,’ i n’a fɔ an bɛ se ka Ala deli cogo min na walasa a k’an dɛmɛ, ani an bɛ se ka ɲɛnamaya banbali sɔrɔ cogo min na iko fɛn dɔ Ala bɛ min ni an na. (1 Tes. 2:13) Sɛbɛndennin bɛ kuma ‘Bibulu ka tiɲɛkumaw kan minnu bɛ kunnafoniw di an ma fɛn caman kan. A dɔw ye ko: Mun bɛ kɛ n’an sara, ani mun na kɔnɔnafilikow ka ca dugukolo kan ten ni nɔ. A b’a jira ko ni Bibulu sariyakolo tilennenw sirataamana, o bɛ lafiya lase an ma farikolo ta fan fɛ, ka dɔ fara hɛrɛ ni jigiya kan, k’an dɛmɛ fana ka jogo ɲuman wɛrɛw sɔrɔ. Sɛbɛndennin bɛ sinsin kun ɲɛnamaba kan, kun min fana kosɔn an ka kan ka Bibulu kalan. O ye kiraya kumaw ye. U b’a jira fɛn minnu bɛna kɛ yan ni dɔɔnin cɛ.— Jir. 21:3, 4.
4 “De l’aide pour comprendre la Bible” (Dɛmɛ walasa ka Bibulu faamu) Sɛbɛndennin b’a fɔ ko: ‘An bɛɛ mago bɛ dɛmɛ na walasa ka Ala ka kuma faamu.’ A b’a jira fana an ka Bibulu kalan bɛ kɛ cogo min na : ‘Tuma caman na, a ka fisa ka Bibulu kalan kɛ dɔɔnin dɔɔnin, k’a daminɛ ni jujɔ kalansiraw ye.’ A b’a jira ka jɛya ko ‘sinsin bɛ kɛ Bibulu ka tiɲɛtigiya de kan walasa ka kow jalatigɛ.’ Nka, a b’a jira kɛrɛnkɛrɛnnenya la ko Wajibiya gafenin ye fɛn ye min bɛna kalanden dɛmɛ a ka ‘Bibulu tɛmɛsiraw faamu barokun caman kan.’ Tilayɔrɔ min dalen bɛ o kan, o bɛ ɲininkali nafama dɔ lawuli.
5 “Êtes-vous disposé à prendre chaque semaine du temps pour comprendre la Bible?” (Yali i b’a fɛ ka waati ta dɔgɔkun o dɔgɔkun walasa ka Bibulu faamu wa?) Sɛbɛndennin b’a jira ko Bibulu kalan bɛ se ka kɛ waati, ani yɔrɔ la minnu bɛ bɛn kalanden ma. A bɛ se ka kɛ kalanden ka so, walima telefoni yɛrɛ fɛ. Jɔn bɛ se ka na o baro la? Sɛbɛndennin b’a jaabi ko: ‘I ka denbaya mumɛ bɛɛ. I b’a fɛ ka i teri minnu wele o la, olu fana bɛ se ka na. Walima n’i b’a fɛ, baro bɛ se ka kɛ e kelenpe dɔrɔn fɛ.’ Kalan bɛ kɛ waati joli kɔnɔ? A b’a jira ko: ‘Caman b’a boloda ka lɛrɛ kelen bila dɔgɔkun o dɔgɔkun walasa ka Bibulu kalan kɛ. N’i bɛ se ka waati kɛ min ka ca n’o ye, walima min t’o bɔ, Seerew bɛna u yɛrɛ labila walasa k’i dɛmɛ.’ O ye fɛn ye min nafa ka bon kosɛbɛ. An bɛ sɔn ka yɛlɛma don an ka kow la walasa k’olu bɛn kalanden kelen-kelen bɛɛ ka cogoyaw ma.
6 “Une invitation à s’instruire” (A ɲininen bɛ an fɛ ka kalan kɛ) Sɛbɛndennin ɲɛ laban b’a jira ko sɛbɛndennin bɛ mɔgɔ min bolo, o tigi bɛ se ka Wajibiya gafenin ɲini. Walima a bɛ se k’a ɲini mɔgɔ ka taa bɔ a ye k’an ka sokɔnɔ Bibulu kalan ɲɛfɔ a ye. O kalan bɛ kɛ fu. I bɛ Wajibiya gafenin ɲɛ fɔlɔ ja ye o yɔrɔ la. Yali i ɲɛ t’a la sisan mun na nin sɛbɛndennin bɛna dusu don dusukunjɛlentigi caman kɔnɔ u ka sɔn an k’u dɛmɛ wa? O tuma na sa, an bɛ se ka baara nafamaba kɛ ni baarakɛminɛn kura in ye cogo di?
7 Sɛbɛndennin bɛ se ka di jɔn ma? Sɛbɛndennin bɛ se ka di mɔgɔ ma, i bolo a bolo. Walima, a bɛ se ka bila mɔgɔ dɔ bara min t’a ka so. Baara bɛ se ka kɛ n’a ye du ni du, nbɛdaw la, ani jagokɛyɔrɔ la. Ni mɔgɔ dɔ sɔnna an ka sɛbɛnw na, walima n’a banna u la, i bɛ se ka sɛbɛndennin di o tigi ma. N’i bɛ sɔn-ni-sɔn gafeninw, walima sɛbɛn wɛrɛw di mɔgɔw ma, i ka a fara olu kan ka di. N’i bɛ batakiw ci mɔgɔw ma, i k’a bila lɛtɛrɛ foroko kɔnɔ. I ye mɔgɔ minnu sɔrɔ telefoni fɛ, a ɲininka n’i bɛ se ka a ci u ma. I ka sɛbɛndennin to i kun tuma bɛɛ walasa k’u di n’i bɛ taa sanni kɛ, walima n’i bɛ foroba mobili kɔnɔ, walima n’i ye cogo sɔrɔ tuma o tuma walasa ka senfɛ seereya kɛ. Mɔgɔ o mɔgɔ mana i ka da kɔnkɔn, i ka a di o ma. A di i somɔgɔw, i sigiɲɔgɔnw, i baarakɛɲɔgɔnw, i kalandenɲɔgɔnw, ani i dɔnbaga tɔw ma. E ni mɔgɔ o mɔgɔ mana bɛn, i jija ka sɛbɛndennin di o tigi ma. I bɛna mun kɛ sisan sa?
8 Ni mɔgɔ sɔnna o yɔrɔnin bɛɛ la: Mɔgɔ dɔw bɛna sɔn o yɔrɔnin bɛɛ la k’a fɔ k’u bɛ Bibulu kalan fɛ. O la sa, n’i bɛ taa foro baara la tuma o tuma, i k’a lajɛ tuma bɛɛ ni Wajibiya gafenin fila b’i kun. Kelen ye kalanden ta ye, tɔ kelen ye e yɛrɛ ta ye. Ni mɔgɔ dɔ sɔnna, i ka kalan daminɛ o yɔrɔnin bɛɛ la. Gafenin dayɛlɛ a ɲɛ filanan na, ka nin yɔrɔ kalan: “Baara bɛ kɛ ni nin kitabunin ye cogo di?” O kɔfɛ, i sin kalansen fɔlɔ ma, k’a jira a la kalan bɛ kɛ cogo min na. Yali nin tɛ kalan kɛcogo ye min ka nɔgɔn kosɛbɛ wa?
9 N’i lamɛnbaga mago bɛ waati dɔ la walasa ka miiri o ko la: Sanni waati caman ka tɛmɛ, i jija k’a ye ko kura. Sanni i ka taa a bara, i k’a lajɛ ni Wajibiya gafenin b’i kun walasa kalansen minnu b’a kɔnɔ, i ka se k’olu jira a la gafenin ɲɛ filanan na. O kɔfɛ, kalansen min nafa ka bon ale yɛrɛ bolo n’a bɛɛ ye, a to a k’o sugandi. I ka baro daminɛ o kan.
10 Mɔgɔ minnu ye sɔn-ni-sɔn gafeninw ta, i ka taa bɔ u ye: N’i ye sɛbɛndennin ani sɔn-ni-sɔn gafeninw to mɔgɔ dɔ bolo, i bɛ se ka segin ka taa bɔ o tigi ye ka kuma a fɛ ten: “Ne nana bɔ i ye siɲɛ laban min na, ne ye La Tour de Garde sɛbɛn to i bolo. A dɔ rɔ, i y’a jateminɛ ko sɔn-ni-sɔn gafenin tɔgɔ bɛɛ ye ko: La Tour de Garde annonce le Royaume de Jéhovah. N tun b’a fɛ ka ɲɛfɔ i ye bi, o masaya ye fɛn min ye, ani o kɔrɔ bɛ se ka kɛ min ye, e ani i ka denbaya bolo.” O kɔ, Wajibiya gafenin dayɛlɛ kalansen 6 la. A daminɛ ni dakun fɔlɔ ye. O kalan, ka baro kɛ a kan waati hakɛ kɔnɔ min bɛ i barokɛɲɔgɔn bolo. O kɔfɛ, i k’a boIoda walasa ka segin ka na don wɛrɛ la ka kalansen tɔ laban.
11 I kana to sɛbɛndennin ka ban i bolo: Baara lakɔlɔsibaga ni balimakɛ minnu bɛ sɛbɛnw kow ɲɛnabɔli la, u tɛna dɛsɛ ka waleya walasa Aimeriez-vous en savoir plus sur la Bible (I b’a fɛ ka dɔ fara i ka Bibulu dɔnniya kan wa?) sɛbɛndennin caman maralen ka to tuma bɛɛ jɛkulu kɔnɔ. I k’a dɔw bila i jufa, walima i ka waribilalan kɔnɔ, i ka mobili kɔnɔ, i ka baarakɛyɔrɔ la, lakɔli la, i ka so donda kɛrɛ fɛ, i bolo bɛ se k’a sɔrɔ yɔrɔ o yɔrɔ la, nɔgɔya la. A jɛlen don k’i bɛna dɔw bila i ka bololabɔrɛ kɔnɔ n’a nana kɛ k’i ye mɔgɔ dɔ sɔrɔ min b’a fɛ ka baro kɛ Bibulu kan.
12 Jehowa ka barika don an ka baara la: Kuntilenna ɲuman kelen bɛ Krecɛn bɛɛ la, o ye ka tiɲɛ kalan kɛ mɔgɔ wɛrɛ kun. (Mat. 28:19, 20) Yali i bɛ ka sokɔnɔ Bibulu kalan kɛ mɔgɔ dɔ kun wa? N’i bɛ ka o kɛ, yali i ka dɔgɔkun baarabolodalen bɛ se ka to i ka dɔ wɛrɛ kɛ wa? N’i tɛ ka Bibulu kalan dɔ kɛ sisan, siga t’a la k’i b’a fɛ ka dɔ ɲɛminɛ. Jehowa deli a ka barika don i ka baara la walasa i ka mɔgɔ dɔ sɔrɔ, i bɛna se ka kalan kɛ min kun. O kɔ, baara kɛ ka kɛɲɛ n’i ka deliliw ye.—1 Yuh. 5:14, 15.
13 Baarakɛminɛn kura b’an bolo walasa ka kalanw daminɛ. Fɛn min b’a kɔnɔ, i k’o dɔn kosɛbɛ. I kana i yɛrɛminɛ k’a di mɔgɔw ma. I k’i seko kɛ walasa ka ‘koɲuman kɛ. I ka kɛwale ɲumanw ka kɛ i ka nafolo ye. I k’i bolo labila ka nili kɛ, ka teliya ka tilali kɛ,’ n’o ye ka fɔ mɔgɔ wɛrɛ ye, i ye min kalan Ala ka Kuma ko la.’—1 Tim. 6:18.
[Box on page 8]
COGO MINNU B’AN BOLO KA SƐBƐNDENNIN JƐNSƐN
◼ An ka don o don barow la
◼ Ni mɔgɔ dɔ sɔnna an ka sɛbɛnw na
◼ Ni mɔgɔ si tɛ so kɔnɔ
◼ N’an bɛ segin-ka-bɔnyew kɛ
◼ N’an ye mɔgɔ dɔ sɔrɔ nbɛdaw seereya fɛ
◼ N’an bɛ ka seereya kɛ jagokɛyɔrɔ la
◼ N’an bɛ ka senfɛ seereya kɛ
◼ N’an bɛ ka batakiw sɛbɛn
◼ N’an bɛ foroba mobili kɔnɔ
◼ Ni mɔgɔ dɔ nana an ka da la
◼ N’an bɛ kuma an somɔgɔw, an sigiɲɔgɔnw, an baarakɛɲɔgɔnw, an kalandenɲɔgɔnw, ani an dɔnbaga wɛrɛw fɛ.