Baara kɛ ni sɛbɛndenninw ye walasa ka barow daminɛ
1 Yali i tɛ sɔn a ma ko ka seereya nafama kɛ o bɛ bɔ tuma caman na n’i y’a bɔ i yɛrɛ la ka baro daminɛ mɔgɔ fɛ wa? A gɛlɛya ye ka kuma fɛn kan min bɛna diya a tigi ye, n’a bɛn’a to fana a ka sɔn ka baro kɛ i fɛ. O bɛ se ka kɛ cogo nafama na cogo di?
2 Weleweledalaw caman y’a ye ko barow bɛ se ka daminɛ ni kuma sugandilen ɲuman damadɔw ye, ani ni sɛbɛndenninw dili ye minnu sinsinnen bɛ Bibulu kan. Sɛbɛndenninw kumakunw ka di mɔgɔw ye, u jaw ɲɛ ka ca, wa u bɛ mɔgɔ ɲɛ minɛ fana. Sɛbɛndennin kelen tɛ mɔgɔ doni, k’a kɛ ikomi ni kunnafoniw kalanta ka ca kosɛbɛ. Ka fara o kan, cikan minnu b’u kɔnɔ, u jɛlen don, u kalanni ka di, wa Bibulu kalan bɛ se ka daminɛ n’u ye fana.
3 Seere dɔ bɛ miiri nin cogo la: “Nin diɲɛ kɔrɔtɔlen in na, tuma caman na mɔgɔw t’a fɛ ka waati bɛrɛ ta ka kalan kɛ. Nka, sɛbɛndenninw janya bɛrɛ bɛnnen don walasa ka cikan nafama di. U man jan fana fo mɔgɔw ka ban u la k’a sɔrɔ u m’u lajɛ yɛrɛ. Ne ye sɛbɛndennin caman kalan, fo a laban na ne sera ka tiɲɛ dɔn.” An kana jɔn abada se la min bɛ Ala ka Kuma ye, n’o ɲɛfɔlen bɛ cikan surunw na nin sɛbɛnw kɔnɔ.—Heb. 4:12.
4 Cogo nɔgɔn naani: Caman ye nɔ ɲuman sɔrɔ tuma min na u ye baara kɛ ni kuma daminɛcogo nɔgɔn ye. 1) Ka sɛbɛndennin damadɔw jira mɔgɔ dɔ la, ka tila k’a ɲininka olu la jumɛn de ka di a ye. 2) N’a tigi ye kelen sugandi ka ban tuma min na, ka ɲininkali labɛnnen koɲuman dɔ kɛ min bɛ sɛbɛndennin yɔrɔ koloma jira. 3) Ɲininkali jaabi la, ka sɛbɛndennin dakun bɛnnen dɔ kalan, walima Bibulu tɛmɛsira bɛnnen dɔ min b’a kɔnɔ. 4) N’a tigi sɔnna, ka t’a fɛ ka baro kɛ sɛbɛndennin kɔnɔko kan, walima k’i sinsin Wajibiya gafenin kalansen, walima Dɔnniya gafe dakun kan min bɛ kunnafoni wɛrɛw di o kan. O cogo la, i bɛ se ka Bibulu kalan dɔ ɲɛminɛ o yɔrɔnin bɛɛ la. Nin hakilila nataw bɛna i dɛmɛ i k’i ka kuma fɔta labɛn walasa ka baara kɛ ni sɛbɛndennin naani ye.
5 Sɛbɛndennin min kumakun ye ko “Qui domine vraiment le monde?” (Jɔn bɛ ka diɲɛ mara tigitigi?), o ye ɲininkali ye min bɛ se ka kɛ.
◼ N’i barokɛɲɔgɔn y’i jaabi ko “Ala”, walima “N t’a dɔn”, kumasen fila minnu bɛ ɲɛ 2 nan daminɛ na, ani dakun fɔlɔ min bɛ ɲɛ 3 nan na, olu kalan. I ka 1 Yuhana 5:19 ani Jirali 12:9 nafa jira. N’a bɛ siga ko Sitanɛ Sendonbaga bɛ yen, walima k’a tɛ yen, walima n’a sɔnna a ma ko diɲɛ b’a ka fanga kɔrɔ, i bɛ se ka t’a fɛ baro la ni hakilijakabɔ sira ye min bɛ L’origine des conditions mondiales (diɲɛ kow cogoyaw sababu) yɔrɔ la. N’a ye mago dɔ jira, a ɲininka n’a b’a fɛ i k’a ɲɛfɔ a ye Sendonbaga bɔra min. Baara kɛ ni sɛbɛndennin ɲɛ 3 nan ni 4 nan ye.
6 “Quel espoir y a-t-il pour nos chers disparus?” (Jigi jumɛn bɛ an diyanyemɔgɔ tununnenw ye?) sɛbɛndennin bɛ se ka kɛ sababu ye mago ka jira yɔrɔnin kelen. I bɛ se ka baro dɔ daminɛ n’i ye ɲininkali kɛ ko:
◼ “An ka mɔgɔ kanulen minnu sara, yali i ma deli k’i yɛrɛ ɲininka abada n’an bɛna olu ye ko kura wa?” A ka jaabi kɔfɛ, sɛbɛndennin ɲɛ 4 nan dakun filanan jira a la. Yuhana 5:28, 29 kalan. O kɔfɛ, a ɲɛfɔ a ye ko kunnafoni minnu bɛ sɛbɛndennin tilayɔrɔ fɔlɔ jukɔrɔ, k’u bɛn’a dɛmɛ ka faamuyali sɔrɔ. A fɔ a ye k’aw bɛ se ka baro kɛ o kan ɲɔgɔn fɛ.
7 “Une vie de famille agréable” (Denbaya ka ɲɛnɛmaya kɛcogo min ka di) sɛbɛndennin diyara denbayaw ye diɲɛ fan bɛɛ la. N’i bɛ baara kɛ n’a ye, i bɛ se k’a fɔ ko:
◼ “Siga t’a la k’i bɛ sɔn a ma ko gɛlɛyaw bɛ denbayaw kan bi. E yɛrɛ ɲɛ na, mun bɛ se ka kɛ walasa ka denbaya kɔnɔmɔgɔw cɛjuru kologɛlɛya?” A ka jaabi kɔfɛ, ɲɛ 6 nan dakun fɔlɔ yɔrɔw jira a la. Bibulu tɛmɛsira kofɔlen minnu bɛ sɛbɛndennin ɲɛ 4 nan ni 5 nan na, olu dɔ la kelen ta, k’a kɔrɔ ɲɛfɔ. A fɔ a ye ko sokɔnɔ Bibulu kalan bɛ se ka kɛ a kun fu.
8 Baara bɛ se ka kɛ ni “Pourquoi avoir confiance en la Bible” (Dannaya bɛ se ka kɛ Bibulu la kun min na) sɛbɛndennin ye ni nin ɲɛjiracogo ye:
◼ “Mɔgɔ caman ye Kaɛn ni Abɛl ka kuma mɛn, kuma min bɛ sɔrɔ Bibulu kitabu fɔlɔ kɔnɔ. Jenɛse ka maana bɛ kuma fana Kaɛn muso kan. Yali i ma deli k’i yɛrɛ ɲininka a muso bɔra min wa?” Baara kɛ ni sɛbɛndennin ɲɛ 2 nan dakun laban ye walasa ka jaabi di. A fɔ a ye ko sɛbɛndennin bɛ kuma fana Bibulu ka ɲɛfɔli nafama kan ka ɲɛsin an ka sini ma. K’a daminɛ ni ɲɛ 5 nan dakun sabanan ye, t’a fɛ baro la. Bibulu tɛmɛsiraw ta minnu b’i ka baro kɔkɔrɔdon.
9 Sɛbɛndennin minnu sinsinnen bɛ Bibulu kan, k’olu tila-tila, o nafa yera. Fɛɛrɛ nafama don fana walasa ka kibaru duman fɔ. Ikomi u tali ka nɔgɔn n’i bɛ taa yɔrɔ o yɔrɔ la, i bɛ se ka baara kɛ n’u ye cogo nafama na da-ni-da baara la, ani senfɛ seereya la. Sɛbɛndenninw jɔyɔrɔ ka bon an ka cidenyabaara kɛli la. A lajɛ k’i y’a sugu caman ta, wa i ka baara kɛ n’u ye kosɛbɛ walasa ka barow daminɛ.—Kol. 4:17.