Sɛbɛndennin tilatilali baara kɛrɛnkɛrɛnnen min bɛna daminɛ Ɔkutɔburukalo tile 20 ka n’a bila Nowanburukalo tile 16 la
1 K’a daminɛ Ntɛnɛndon Ɔkutɔburukalo tile 20 ka n’a bila Nowanburukalo tile 16 la, an bɛna sɛbɛndennin kura dɔ tilatilali baara kɛ. O sɛbɛndennin tɔgɔ ye ko: I b’a fɛ ka jaabiw sɔrɔ wa? An jigi b’a la ko o baara kɛrɛnkɛrɛnnen min bɛna kɛ dugukolo yɔrɔ bɛɛ la, o bɛna kɛ sababu ye mɔgɔ caman k’a jira ko Ala ka kuma ka di u ye, tiɲɛ bɛ se ka sɔrɔ yɔrɔ kelenpe min na.—Yuh. 17:17.
2 O sɛbɛndennin bɛ jaabi pereperelatigɛlenw di Bibulu ɲininkali nafama wɔɔrɔ kan, n’olu ye ko: “Yali Ala b’a janto an na tigitigi wa?” “Yali kɛlɛ ni tɔɔrɔkow bɛna ban don dɔ la wa?” “Mun bɛ saya kɔfɛ?” “Yali don dɔ la mɔgɔ salenw bɛna lakunun wa?” “An bɛ se ka delili kɛ cogo di ani Ala k’an lamɛn?” ani “An bɛ se ka hɛrɛ sɔrɔ ɲɛnamaya kɔnɔ cogo di?” Diinɛ minnu b’a fɔ k’u ye kretiɛnw ye, olu ma jaabiw di o ɲininkaliw la minnu bɛ mɔgɔw wasa. Hali mɔgɔ caman minnu b’a fɔ k’u tɛ Kretienw ye, u ye u yɛrɛ ɲininka o kow la, nka laala, u t’a dɔn ko o jaabi jɛlenw bɛ sɔrɔ Bibulu kɔnɔ. O la sa, an jigi b’a la ko kuma min bɛ o sɛbɛndennin kɔnɔ, o bɛna diya mɔgɔ caman ye.
3 Aw k’aw ka waajulikɛyɔrɔ bɛɛ kɛ: N’a bɛ se ka kɛ, aw k’aw cɛsiri k’aw ka waajulikɛyɔrɔ camanba kɛ da-ni-da waajuli la. N’aw ka waajulikɛyɔrɔ ka bon, maakɔrɔw bɛ se ka dusu don aw kɔnɔ aw ka sɛbɛndennin kelen bila mɔgɔw ka daw la, minnu tun tɛ u ka so aw nako fɔlɔ la. Aw k’aw hakili to a la ka sɛbɛndennin kelen di aw sigiɲɔgɔnw ma, aw somɔgɔw ma, aw dɔnbagaw ma minnu bɛ aw ka baarakɛyɔrɔ la walima aw ka lakɔliso la ani mɔgɔ wɛrɛw fana ma aw ni minnu bɛ kuma tuma bɛɛ. Laala, aw bɛ se k’aw ka kow labɛn walisa ka kɛ tutigɛbaga farankanw ye Ɔkutɔburukalo walima Nowanburukalo la. Yali den walima Bibulu kalanden b’i bolo min taara ɲɛ alako ta fan fɛ, n’a bɛ mankutu dafa walisa ka fara an kan o baara la i ko weleweledala min ma batise wa? N’a bɛ o cogo la, i ka maakɔrɔw ladɔnniya.
4 Sɛbɛndennin jiracogo: Walisa ka cikan lase mɔgɔ camanba ma, a ka ɲi i k’a to i hakili la ko i ka kuma man kan ka janya. Ɲininkali wɔɔrɔ minnu bɛ ɲɛ fɔlɔ la, i barokɛɲɔgɔnw ɲininka olu dɔ la kelen dɔrɔn na, ka tila ka o jaabi jira u la sɛbɛndennin kɔnɔ. O bɛn’a to weleweledala bɛɛ bɛ u ka kuma fɔ ka bɛn ni waajulikɛyɔrɔ mɔgɔ magow ye. Ni dɔ y’a jira ko cikan diyara a ye, o tigi tɔgɔ sɛbɛn, ka segin ka na bɔ a ye. Sibiridonw ni Karidonw na, sɔn-ni-sɔn gafeninw ni sɛbɛndennin bɛ se ka di ɲɔgɔn fɛ. Ni sɛbɛndennin tilatilali baara banna Nowanburukalo tile 16, an bɛna gafenin jira min tɔgɔ ye ko Ala bɛ min waajibiya anw ma. Sɛbɛndennin minnu tora, baara bɛna kɛ ni olu ye, i ko baara bɛ kɛ ni sɛbɛndennin tɔw ye cogo min na.
5 Bibulukalan daminɛ: Nin sɛbɛndennin dilanna kɛrɛnkɛrɛnnenya la walisa k’an dɛmɛ ka Bibulukalanw daminɛ. Ni mɔgɔ dɔ y’a jira ko kibaru duman ka di a ye, n’i seginna ka na bɔ a ye, i bɛ se k’a ɲininka Bibulu kuma jumɛn y’a dusu saalo walima k’a jigi tugu? An ka Bibulukalan koɲɛ ɲɛfɔlen bɛ sɛbɛndennin ɲɛ laban min na, o jira a la, ka tila ka Ala bɛ min waajibiya anw ma gafenin kelen di a ma. N’a bɛ se ka kɛ, a ye barokun min sugandi, o walawalalen bɛ tilayɔrɔba min kɔnɔ, o dakun kelen walima o dakun fila lajɛ.
6 Jehovah bɛ mɔgɔ ɲini, minnu b’a bato “ni hakili ni tiɲɛ ye.” (Yuh. 4:23, NW) An bɛɛ k’an niyɔrɔ kɛ o baara kɛrɛnkɛrɛnnen na walisa ka mɔgɔw dɛmɛ u ka tiɲɛ dɔn.