Yali fɛn don min bɛ wajuli bali wa?
1 Mɔgɔ fanba bolo degunnen bɛ u ka ɲɛnamaya kɔnɔ. Nka, Jehowa Seerew bɛ mɔgɔw la, mɔgɔ minnu bolo degunnen don kosɛbɛ ka tɛmɛ tɔw bɛɛ kan: an bɛ Ala ka Kuma kalan, an bɛ taa jɛkulu lajɛw la, an b’an ta kɛ foro baara fana na. Ka fara o kan, an bolo degunnen don an dahirimɛ ɲini baara la, sokɔnɔ baara, walima lakɔli baara la, ani baara caman wɛrɛw fɛ minnu kelen-kelen bɛɛ kɛli bɛ waati ta. O fɛnw ye gɛlɛyaw ye kɛrɛnkɛrɛnnenya la dutigiw bolo.
2 Ikomi wariko ka gɛlɛn yɔrɔ caman na, a bɛ se ka kɛ ko dutigiw ka kan ka baara kɛ lɛrɛ caman kɔnɔ tile kɔnɔ, wa, gɛlɛya fana kɔnɔ walasa k’u dahirimɛ sɔrɔ. Ni dahirimɛ ɲini baara bɛ mɔgɔ ka waati n’a fanga fanba bɛɛ ta, waati bɛrɛ tɛ to tun a bolo walasa ka wajuli baara kɛ. Ikomi a wajibi b’u kan k’u ka denbaya magoɲɛfɛnw sɔrɔ, dɔw bɛ se k’a miiri k’u bɛ se ka fitinin dɔrɔn de kɛ cidenyabaara la. (1 Tim. 5:8) Tiɲɛ don ko degunko caman sirilen bɛ dahirimɛ ko la bi. Nka, a kun tɛ dahirimɛ ɲini baara ka kibaru duman wajuli bali. (Mar. 13:10) O kama, an bɛ cogoya min na sisan, an ka kan k’o lajɛ.
3 Ikomi diɲɛ cogo fana bɛ yɛlɛma tuma bɛɛ, a bɛ se ka kɛ ko dutigi b’a ɲini ka baara kɛ kojugu walasa ka dɔ fara a ka wari kan, ka se ka gɛlɛyaw kunbɛn, mɔgɔ tɛ sigi ni gɛlɛya minnu ye. (1 Kɔr. 7:31) I bɛ min kɛ i dahirimɛ ɲini baara la, ka dɔ fara o kan, a bɛ iko o bɛ na ni fɛn wɛrɛw sɔrɔli ye, walima cogo wɛrɛw sɔrɔli ye walasa k’i lafiya ani k’i ɲɛnajɛ. Nka, n’a y’a sɔrɔ o kɛli bɛ waati ta alako ta fan fɛ fɛnw na, k’i bali ka taa tuma bɛɛ lajɛw la, yali denbaya ka hɛrɛ bɛ yiriwa, k’a wasa wa? Fɛn min b’an ka alamɔgɔya bila farati la, siga t’a la k’an b’a fɛ k’an yɛrɛw minɛ o kɛli ma. K’an jan to Yesu ka laadilikan na ka ‘nafolo lajɛ sankolo la’ ani ka kɛ ‘nafolotigi ye Ala ta fan fɛ’, o de ye kɛcogo ye hakilitigiya sira la.—Mat. 6:19-21; Luka 12:15-21.
4 An ka Masaya kunkankow ɲini fɔlɔ: Yesu y’a nɔfɛmɔgɔw kalan k’u ka alako ta fan fɛ kow bila fɛn tɔw bɛɛ ɲɛ. A y’u waju ten: “Aw kana hami k’a fɔ ‘An na mun dun?’ walima, ‘An na mun min?’ walima, ‘An na mun don?’ ” Mun na a y’o fɔ? A y’a ɲɛfɔ ko: “Aw sankolo Fa b’a dɔn ko aw mago bɛ o fɛnw bɛɛ la.” N’an dalen bɛ o la tigitigi, fɛn si tɛ yen min bɛna an bali ka tugu Yesu ka kuma nataw la ko: “A’ ye Ala ka masaya ni a ka tilennenya ɲini fɔlɔ. O mana kɛ, Ala na o fɛnw [magoɲɛfɛnw] bɛɛ di aw ma ka fara olu kan.” Siga t’a la, Ala ko, ale na olu kɛ a yɛrɛ ka doni ye! (Mat. 6:31-33) A jɛlen don ko sisan tɛ jɔrɔ kojugu waati ye dahirimɛ ko la; k’a kanu ka se ka fɛrɛ koɲuman nin diɲɛ sigicogo in na, fo an hakili bɛɛ ka da o kan, o fana waati tɛ sisan ye, bawo diɲɛ sigicogo in bɛna tɛmɛ sɔɔni. —1 Piɛ. 5:7; 1 Yuh. 2:15-17.
5 Dahirimɛ ɲini baara kun fɔlɔ ye ka se ka mɔgɔ magoɲɛfɛnko ɲɛnabɔ. Nka, an mago bɛ fɛn joli de la? Ciden Pol y’a sɛbɛn ko: “Ni dumuni ni fini b’an fɛ, o bɛna an wasa.” Min b’an fɛ kaban, yali an b’a ɲinina ka dɔ fara o kan wa? N’a bɛ o cogo la, ciden Pol ye kankari min da o ko la, an bɛna o tɔnɔ sɔrɔ. A ko: “Minnu b’a fɛ ka fɛntigiya, olu na bin kɔrɔbɔli fɛ. U nege jugu kuntanw na kɛ jan ye ka u minɛ, ka u bila halakili ni tiɲɛni kow la [“ka halakili ni tiɲɛni lase u ma,” NW].” (1 Tim. 6:8, 9; Mat. 6:24; Luka 14:33) Ni an nege bonya kojugu de y’an balilan ye, an bɛ se k’o dɔn cogo di?
6 N’an dahirimɛ ɲini baara kosɔn, an bɛ baara min kɛ foro baara la, o ye fitinin dɔrɔn ye, walima n’an ɲɛ t’a nafa la ka jɛn fɛn dɔw kɔ kibaru duman kosɔn, o la sa, an bɛ fɛn minnu bila ɲɛfɛ, an ka kan ka yɛlɛma don olu la. (Heb. 13:15, 16) N’an b’an ka ɲɛnamaya kɛcogo nɔgɔya kosɛbɛ, o nafa bɛna bonya kosɛbɛ walasa fɛn min b’an bali ka wajuli kɛ, an ka se k’o fɛn bɔ yen. Fɛn min ye k’an ka waati kɛ baara la n’an fanga ye, o ka kan ka ɲɛsin Masaya kunkankow de ma fɔlɔ tuma bɛɛ.
7 An ka baara tɛ fu ye: Pol ka kumaw bɛ dusu don an kɔnɔ tuma bɛɛ, ko ka ‘caman kɛ Matigi ka baara la, k’a masɔrɔ an b’a dɔn ko an ka baara tɛna kɛ fu ye Matigi la.’ (1 Kɔr. 15:58) ‘Matigi ka baara’ bɛɛ la fɔlɔ ye ka wajuli kɛ Masaya ko la ani ka mɔgɔw kɛ kalandenw ye. (Mat. 24:14; 28:19, 20) Walasa k’an ta kɛ kosɛbɛ o la ka kɛɲɛ n’an seko ye, an ka kan k’an ka waati boloda foro baara kama dɔgɔkun o dɔgɔkun, ani k’an cɛsiri walasa an kana fɛn wɛrɛ kɛ o waati la. (Efe. 5:15-17) O tuma na sa, dahirimɛ ɲini baara, walima fɛn wɛrɛ si tɛna an bali k’an ka cidenyabaara kɛ.
8 N’an b’an yɛrɛw di Bibulu tiɲɛkumaw ɲɛfɔli baara ma tɔw ye, hɛrɛ min bɛ nili la, an n’o dɔn. (Kɛw. 20:35) N’an bɛ t’a fɛ ka Masaya wajuli baara kɛ, an ka sini ko la, an daŋaniyalen bɛ se ka sigi n’a ye ko “Ala tɛ tilenbali ye, a tɛna ɲinɛ an ka kɛtaw kɔ, ani an ye kanuya min jira a tɔgɔ kosɔn.”—Heb. 6:10.