A labɛnna “cogo bɛnnen na ani a ko ɲɛnabɔlen koɲuman”
1 Walasa kafoba ka jamalajɛ ka kɛ ka ɲɛ, fo caman k’u cɛsiri ɲɔgɔn fɛ. Jamalajɛ labɛnbagaw bɛ lajɛ yɔrɔ bɛnnen labɛn, ka jatigila ko ɲɛnabɔ. Mɔgɔ kelen-kelen bɛɛ ani denbaya kuluw b’u ka taama n’u ka jatigila ko boloda. Ka fara o kan, walasa ka jamalajɛ taabolo ɲɛnabɔ ka ɲɛ, jɛkuluw bɛ mɔgɔw ɲini jamalajɛ baaradaw ye minnu mago bɛna kɛ dɛmɛdonbagaw la, olu k’u ta. O labɛnw kɛ kun ye ko “fɛn bɛɛ ka kɛ cogo bɛnnen na, a ko ɲɛnabɔlen koɲuman.”—1 Kɔr. 14:40.
2 K’a sɔrɔ aw bɛ k’aw ka labɛnw kɛ ka kɛɲɛ ni jamalajɛ taw ye, aw k’aw hakili to a la ko kalo caman labɛnni walima san caman yɛrɛ labɛnni wajibiyalen don. Balima kɛmɛ caman bɛ waatiba kɛ ka kow labɛn; sow maminɛni, baarakɛminɛnw dalajɛli ani baarakɛlaw tali bɛ o la. Ka kɔn ka kow labɛn, o bɛ na ni dubaw ye bɛɛ ma alako ta fan fɛ. An bɛ se ka mun kɛ ka dɛmɛ don?
3 An ka jatigila fɛɛrɛ kɔkɔrɔdon: A nafa ka bon an bɛɛ ka jamalajɛ mabɛnw kɔkɔrɔdon. O wajibiyalen don kɛrɛnkɛrɛnnenya la n’an b’an ka jatigila ko boloda. Mago bɛ kɛ so hakɛ minnu na jamalajɛ kelen-kelen bɛɛ senfɛ, o bɛ taa kɛmɛ yirika la. An balimaw fanba ka sɔrɔ ka dɔgɔ, wa, u jigi bɛ so da nɔgɔnw kan. O la, cɛsiribaw kɛra walasa ka jatigilaw sɔrɔ minnu da ka nɔgɔn. An ka kan k’an hakili to tɔw magow la ni kanuya ye, ani ‘an si kana miiri an yɛrɛw ka kow la dɔrɔn, nka an bɛɛ kelen-kelen ka miiri an mɔgɔɲɔgɔnw ka ko fana na.’—Flp. 2:4.
4 N’an tugura kosɛbɛ jamalajɛ ka ɲɛbilakumaw na ka ɲɛsin jatigila ko ma, bɛɛ bɛna tɔnɔ sɔrɔ o la. Ka o ɲɛnabilakumaw bila, o bɛ na ni gɛlɛyaw ye minnu tun ka kan ka bali. Cogo di? Misali la, ni dɔ bɛ a ka jatigila ko bolodalen bɔ a ma waati laban na, o bɛ se ka kɛ sababu ye a ka don balima dɔ wɛrɛ gasi la bawo o balima tun ka kan ka se ka o jatigila sɔrɔ a bolodatuma na. O ko nɔ ye ko balimaw ka furancɛ tigɛ min ka jan ni fɔlɔ ta ye walima ka sɔn siyɔrɔw ma minnu cogo ka jugu ni fɔlɔ ta ye. A ka ɲi kosɛbɛ n’an bɛ se ka kɛ kantigiw ye, ka an kuma kɛ “ɔwɔ, ɔwɔ”. (Mat. 5:37) Balima minnu bɛ si balima wɛrɛw fɛ, u fana bɛna o sariyakolow sirataama.
5 An bɛ se ka jɛkabaara kɛ cogo minnu na: An bɛ se ka fɛn dɔw kɛ minnu ka nɔgɔn walasa k’an ka kow kɛɲɛ ni jamalajɛ fɛɛrɛ ye ka ɲɛsin jatigila ko ma. (1) I ka jatigila ɲinisɛbɛnfura (demande de logement) dafa ka ɲɛ. (2) I ye mɔgɔw hakɛ jateden min sɛbɛn jatigila ɲinisɛbɛnfura kan, mɔgɔ minnu bɛna na i fɛ ka si yen, i kana na ni mɔgɔ wɛrɛw ye minnu ka ca n’o jateden ye. (3) An bɛ ji ni kuran minnu kɛ an ka jatigila la, an ka dɛmɛ don u sɔngɔ la wariko ta fan fɛ. (4) Ni kasaara dɔ kɛra an ka jatigila la, an ka jamalajɛ ka labɛnbaga kulu ladɔnniya a la o yɔrɔnin kelen. (5) Ni an bɛ si yɔrɔw la yɔrɔ minnu na balima cɛmaw bɛ sow kelen na ani balima musomaw bɛ sow kelen na, an ka jamalajɛ ka labɛnbaga kulu bonya, ka jɛkabaara kɛ u fɛ. An k’an jija ka tɔw ka yɔrɔw sumanen to, ka an taamacogo bɛnnen to tuma bɛɛ.
6 Ikomi anw ye Jehowa Ala ka baarakɛlaw ye, cogo b’an bolo k’a jogo ɲɛw jira an ka kɛwalew bɛɛ sababu fɛ, kɛrɛnkɛrɛnnenya la, n’an bɛ labɛnw kɛ walasa ka taa jamalajɛw la walima n’an bɛ ye u kɛnɛkan, Ala tɔgɔ bɛ ko minnu na. An hakili to a la ko “Ala tɛ ko ferekelenw ka Ala ye, fɔ hɛrɛ ta.” (1 Kɔr. 14:33) O la, n’an bɛ labɛnw kɛ “Ala ka Kuma Karamɔgɔw” kafoba ka jamalajɛ taali kama walima n’an bɛ ye a kɛnɛkan, an jɔlen ka to a kan ko an kɔlɔsibagaw ka o Jehowa jogo ɲɛ ye an taamacogo na. Ala m’a tora an kɔlɔsibaga kɔnɔnajɛlenw ka bɔ a kala ma ko Jehowa ka jama lajɛlenw bɛ kow labɛn “cogo bɛnnen na ani a ko ɲɛnabɔlen koɲuman.”—Zab. 68:27.