‘Lamɛnni kɛ ka dɔ fara i ka dɔnniya kan’
1 Ntalenw kitabu bɛ hakilitigiya jira iko mɔgɔ dɔ min bɛ wele bila ko: ‘A’ ye aw tulomajɔ k’a masɔrɔ ne bɛ kobaw fɔ, ne bɛ ne da yɛlɛ k’aw kalan ko tilennenw na. Laadili ni ko ɲɛnabɔ cogo ɲuman ye ne ta ye, a’ ye ne lamɛn. Minnu bɛ ka ne ka siraw taama, olu ye dubadenw ye. K’a masɔrɔ mɔgɔ min bɛ ne sɔrɔ, o tigi bɛ ɲɛnamaya sɔrɔ, Matigi na sɔn o la.’ (Nta. 8:6, 14, 32, 35) Nin kumaw bɛ kalan jira, kalan min b’an ɲɛ Kafoba ka jamalajɛ la, n’o ye ko: “Ala ka Kuma Karamɔgɔw”.
2 An balimaw magow jateminɛra ka bɔ diɲɛ yɔrɔ bɛɛ la. Kafoba ka jamalajɛ labɛnna walasa k’o magow ɲɛ. Alako ta fan fɛ dɔnniya, ani hakilila nafama minnu bɛna di an ma, n’an bɛ u taama, o bɛna an dɛmɛ ka hɛrɛ sɔrɔ, ka cɛsira ɲumanw to an ni Jehowa cɛ, ani ka to sira kan, sira min b’an lase ɲɛnamaya banbali la. Siga si t’a la ko daliluw bɛɛ b’an bolo walasa ka ‘lamɛnni kɛ, ka dɔ fara an ka dɔnniya kan’.—Nta. 1:5.
3 Sanni kalan ka daminɛ: N’an b’a fɛ ka nafa sɔrɔ kosɛbɛ hakililaw la minnu bɛna jira, kalan bɛ daminɛ tuma min na, o ka kan ka sɔrɔ k’an sigilen bɛ, ani k’an bɛ cogo ɲuman na o kama. O b’a wajibiya an yɛrɛ k’an ka kow labɛn ka ɲɛ. Fɛn min jɔyɔrɔ ka bon kosɛbɛ, o ye ka kow kɛ joona. I ka da joona su fɛ. I ka wuli joona walasa i ka kulu mɔgɔ kelen-kelen bɛɛ ka se ka waati sɔrɔ k’i yɛrɛ labɛn ani ka fɛn dɔ dun. I ka se joona jamalajɛ kɛyɔrɔ la. O cogo la i bɛna se ka sigiyɔrɔ sɔrɔ, ka se fana ka baara nafamaw kɛ sanni kalanbolodalen ka daminɛ. Kalan bɛna daminɛ sɔgɔma o sɔgɔma, nɛgɛ kan ɲɛ 9 tɛmɛnen ni sanga 30 ye.
4 Ikomi nin jamalajɛ bɛ kɛ kun fɔlɔ min na, o ye ka Jehowa tanu “jama cɛma”, kalan kelen-kelen bɛɛ ka kan ka daminɛ cogow la minnu bɛ nɔɔrɔ da Ala kan. (Zab. 26:12) O la sa, dusu donnen bɛ an bɛɛ kɔnɔ walasa an k’an sigi sanni kalan daminɛ dɔnkili ka fɔ. O kɛcogo sugu ni Bibulu laadilikan in bɛ ɲɔgɔn minɛ, ko: “Fɛn bɛɛ ka kɛ cogo bɛnnen na, a ko ɲɛnabɔlen koɲuman.” (1 Kɔr. 14:40) O kɔrɔ ye mun ye an kelen-kelen bɛɛ bolo? N’an ɲɛ bɛ kalan ɲɛminɛbaga la a ka taa sigi banbali kan fɔli tuma na, an k’an teliya k’an sigiyɔrɔ magɛn. O bɛna to an ka kalan daminɛ dɔnkili da n’an dusukun bɛɛ ye, o cogo la ka tanuniw lase Jehowa ma.—Zab. 149:1.
5 Kalan kɛtuma na: Esdrasi tun ye ‘a dusukun labɛn walasa ka Jehowa ka sariya kalan, k’a taama’. (Esd. 7:10, New World Translation, NW) Jehowa bɛ dɔnniya min di an ma, an bɛ se k’an dusukun labɛn cogo di walasa k’o sɔrɔ? N’an bɛ ka kalanbolodalen barokunw lajɛ, an k’an yɛrɛ ɲininka ko: “Jehowa b’a fɛ ka mun de fɔ n ye? Ne ni n ka denbaya bɛ se ka baara kɛ ni hakilila dilenw ye cogo di?” (Esa. 30:21; Efe. 5:17) Jamalajɛ kɔnɔna bɛɛ la, an k’an yɛrɛ ɲininka u la. Yɔrɔ minnu nafa ka bon an yɛrɛ ɲɛna, an k’o sɛbɛn. An ka waati ta ka baro kɛ u kan jamalajɛ don kelen-kelen bɛɛ bannen kɔ; a bɛna nɔgɔya an bolo ka miiriyaw to an hakili la, k’u taama.
6 A man nɔgɔn tuma bɛɛ an ɲɛmajɔlen ka to lɛrɛ caman ka tugu ɲɔgɔn na. Mun bɛ se k’an dɛmɛ an k’an yɛrɛ kɛlɛ walasa an kan’a to an hakili ka ta ka bɔ kalan kan? Se min bɛ ɲɛ ye, an ka baara kɛ n’o ye. Tuma caman na, an b’an ɲɛ jɔ fɛn min na, an b’an ɲɛmajɔ o fɛn fɛ. (Mat. 6:22) O la sa, n’an ye mankan dɔ mɛn, walima ni mɔgɔ dɔ ye fɛn dɔ kɛ an lamini na, an k’an yɛrɛ minɛ walasa an kana an kunkolo yɛlɛma k’a lajɛ. An k’an ɲɛ jɔlen to kumana na. Ni tɛmɛsira dɔ bɛ ka kalan, an k’o lajɛ an ka Bibulu kɔnɔ, wa, an k’o dayɛlɛlen to fo o yɔrɔ ɲɛfɔli ka ban.
7 Krecɛnya sira la, an ka kanuya b’an bali an ka mɔgɔ wɛrɛw tɔɲɔ kalan kɛtuma na. (1 Kɔr. 13:5) O jamalajɛw ye “makunni tuma” ye, ani tulomajɔ waati don fana. (Waj. 3:7) O la sa, an k’an yɛrɛ minɛ barow la, ani wuliliw la, nafa tɛ minu na. An k’an ka kow labɛn walasa ka dɔ bɔ an ka taa-ni-seginw na ɲɛgɛnw na. An k’an jija walasa an kana dumuni kɛ sanni lɛrɛ bolodalen ka se, fo n’a y’a sɔrɔ ko sɛbɛ don kɛnɛya ta fan fɛ. Mɔgɔ minnu bɛ na ni telefɔni ye u bolo, walima ni fototalan ye, u k’u jija walasa u kana tɔw hakili ta ka bɔ kalan kan. Bangebagaw ka kan ka fɛɛrɛw tigɛ walasa denbaya kɔnɔmɔgɔw bɛɛ ka sigi ɲɔgɔn kɛrɛ fɛ, hali ni funankɛw don. O cogo la, u bɛna se k’u denw kɔlɔsi cogo bɛnnen na.—Nta. 29:15.
8 Maakɔrɔ min bɛ to ka na jamalajɛ la kabini san caman, a ye nin kɔlɔsili kɛ salon ko: “Ne ɲɛna, nin jamalajɛ tun ye a danmajamalajɛ ye kun wɛrɛ la. A bɛ iko nabagaw bɛɛ tun bɛ ka sɛbɛnni kɛ, hali denmisɛnninw. O yeli tun bɛ mɔgɔ nisɔndiya. Tuma min na kumanaw tun bɛ tɛmɛsiraw tataw fɔ, Bibuluw tun bɛ dayɛlɛ.” Tiɲɛ na, nin tulomajɔ sugu ka kan ni foli ye. N’an bɛ lamɛnni kɛ koɲuman, anw, ani tɔw bɛna kodumanw sɔrɔ o la, nka, min ka bon n’o bɛɛ ye, an bɛna bonya da an Karamɔgɔba Jehowa Ala kan.—Esa.30:20.