Jehowa Seerew ka san 2004 Kafoba Jamalajɛ min tɔgɔ ye — “An ka taama ni Ala ye”
1 An bɛ kafoba ka jamalajɛ min kɛ san o san, mun de bɛ o kɛ ko kɛrɛnkɛrɛnnen ye aw bolo? Jɛmu minnu bɛ an kologɛlɛya ani daramu minnu bɛ labɛn an kosɔn “jɔnkɛ dannamɔgɔ hakilima” fɛ wa? (Mat. 24:45-47) Hakilila-dumuni min bɛ kɛ sɛbɛn-kura bɔlenw kɔnɔ a tuma na wa? Balimakɛw ani balimamusow bɛ ɲɛfɔli minnu kɛ k’a jira cogo min na Bibulu ye yɛlɛma don u ka ɲɛnamaya la wa? Dantigɛli minnu bɛ kɛ k’a jira ko waajuli baara bɛ ka ɲɛsɔrɔ yɔrɔ wɛrɛ la cogo min na wa? An bɛ jɛɲɔgɔnya min kɛ ni an krecɛnɲɔgɔnw ye, denmisɛn fara mɔgɔkɔrɔba kan wa? Ɔwɔ, nin ɲɔgɔnna kow ani ko wɛrɛw de kosɔn an bɛ kɔrɔtɔ kafoba ka jamalajɛw ka se!
2 An ka na Tile Saba Mumɛ Bɛɛ la: Musa sababu fɛ Jehowa ye nin cikan fɔ: ‘Mɔgɔw bɛɛ lajɛ ɲɔgɔn fɛ. . . walisa u ka lamɛnni kɛ ani u ka kalan’ (Dut. 31:12) Jɔnkɛ dannamɔgɔ hakilima sababu fɛ Jehowa ye kalan kɛrɛnkɛrɛnnen bolodalen dɔ labɛn an kosɔn jamalajɛ don kelen-kelen bɛɛ la. Ikomi Jehowa bɛ ka an kalan ‘an nafa kama,’ a ka di an ye an ka sɔrɔ a ka kalan bɛɛ la. (Esa. 48:17) Ni aw bɛ a fɛ aw ka baarada ɲɛmɔgɔ ka pɛrɛmisɔn di aw ma jamalajɛ kama, aw ka Jehowa deli fɔlɔ ani ka wuli ka taa aw ka pɛrɛmisɔn-ɲinini na. O cogo la aw bɛ Nehemi ka jagɛlɛya misali ladege. (Neh. 1:11; 2:4) Ani fana, ni aw bɛ kɔn ka a suda aw ka dukɔnɔmɔgɔw la minnu tɛ Jehowa batobagaw ye, ko aw bɛna taa jamalajɛ la, o bɛ a jira ko aw bɛ u bonya.
3 Jatigilako: Aw yɛrɛ ka lafiya kama fɛɛrɛ tigɛra jatigilako kama dugu kelen-kelen bɛɛ la jamalajɛ bɛ kɛ yɔrɔ minnu na. Mɔgɔ minnu bɛ a fɛ ka jatigila sɔrɔ jamalajɛ tuma na, an bɛ olu bɛɛ hakili jigin a la, u ka jɛ-ka-baara dafalen kɛ ka kɛɲɛ ni nin fɛɛrɛ tigɛlenw ye walisa doni kana da balimakɛw kan minnu sɔnna ka u ka so dayɛlɛ ka mɔgɔ wɛrɛw kunbɛn minnu bɔra yɔrɔ wɛrɛ la ka na. Salon jamalajɛ dɔ la, mɔgɔ minnu tun mago bɛ jatigila la olu tilancɛ dɔrɔn de ye jatigilako-ɲɛnabɔ-jɛkulu ladɔnniya. O de ye a to denbaya dɔw la, mɔgɔ minnu jiginna u kan olu hakɛ cayara ka se fo siɲɛ saba ma, ka tɛmɛ u tun sigilen bɛ ni min ye.
4 Ni weleweledala dɔ ye Demande de chambre pour cas particuliers sɛbɛn ci, jɛkulu-ka-baara komite, min bɛ o tigi ka jɛkulu kɔnɔ, o na o lajɛ, ka u sinsin kunnafoniw kan minnu bɛ sɔrɔ o sɛbɛn kɔnɔ. O dɛmɛ bɛ kɛ dɔrɔn weleweledalaw ye tɔgɔ duman bɛ minnu kan ani u denw ye, minnu kɛcogo ka ɲi. Ni ɲininkali kɛrɛnkɛrɛnnen bɛ jatigilako-ɲɛnabɔ-jɛkulu fɛ ka ɲɛsinn o sɛbɛn kɔnɔko dɔ ma, u na se jɛkulu Sɛbɛnnikɛla ma.
5 Mago kɛrɛnkɛrɛnnenw: Ciden Paul ye Galasi jɛkuluw hakili jigin a la u ‘ka ko ɲuman kɛ mɔgɔw bɛɛ ye, janko u balima dannabaaw.’ (Gal. 6:10) Balimakɛw ani balimamusow minnu kɔrɔlen bɛ, banabaatɔw, bangebaaw minnu bɛ u kelen na, wala mɔgɔ minnu ye tutigɛbagaw ye, a bɛ se ka kɛ ko olu tɛ dɛmɛ ɲini aw fɛ, nka gɛlɛya bɛ se ka kɛ u kan ni u bɛ na jamalajɛ la. Yala aw bɛ se ka ‘ko ɲuman kɛ u ye’ ka u dɛmɛ wa? U ka dukɔnɔmɔgɔ minnu ye Krecɛnw ye ani maakɔrɔw, olu ka kan ka kɛ o mɔgɔ suguw mago kala ma.
6 Ni an bɛ taa jamalajɛ wɛrɛ la: An bɛ cogo min na walima yɔrɔ min na o bɛ se ka a to an bɛ a ɲini ka taa jamalajɛ wɛrɛ la an ka jɛkulu tɛ na kɛ yɔrɔ min na. N’i bɛ a fɛ ka kunnafoni sɔrɔ jamalajɛ wɛrɛ kan, i ka kan ka se jɛkulu Sɛbɛnnikɛla ma. Sɛbɛn min tɔgɔ ye Demande de chambre pour cas particuliers, o sɛbɛn kɔ kan, kunnafoni bɛ di jamalajɛ wɛrɛw kɛwaati kan ka tugu ɲɔgɔn na ani jamalajɛ biro ladɛrɛsi. I bɛ lɛtɛrɛ ci ladɛrɛsi ɲɛnatɔmɔlen la, ka lɛtɛrɛ wɛrɛ don o kɔnɔ ni i yɛrɛ ka ladɛrɛsi ye, ka tɛnburu nɔrɔ a kan. Ni jamalajɛ fila wala damadɔ bɛ kɛ dugu kelen na, a sɛgɛsɛgɛ ko i ye jamalajɛ kɛwaati sɛbɛn i ka ɲininkali-sɛbɛn kan. Jatigilako-ɲɛnabɔ-jɛkulu min bɛ o jamalajɛ yɔrɔ la o na a janto i ka ko la.
7 Jehowa ka jamakulu ka Jamalajɛ dɔ sen fɛ min kɛra nin y’a san 2500 ye, Esdrasi ani a balima Levitiw ye kalan kɛ ka bɔ Ala ka kuma kɔnɔ ani ka a ɲɛfɔ jama dalajɛlen ye. Mun bɔra o la? Nehemi 8:12 bɛ a fɔ an ye ko ‘jama bɛɛ taara. . . ka ɲagaliba kɛ k’a masɔrɔ kuma minnu fɔra u ye, u ye olu faamu.’ Yala an fana tɛ waleɲumandɔn jira jɔnkɛ kulu munnen na, ale min bɛ baara kɛ ni Ala ka kuma ye iko Esdrasi ani Levitiw, ka a ɲɛfɔ, ka a jira an na, an bɛ se ka u waleya cogo min na an ka ɲɛnamaya kɔnɔ wa? U kɛtɔ ka o kɛ, jɔnkɛ bɛ Jehowa ka kanuya sɛbɛ ɲɔgɔn de jira ani Jehowa bɛ a mago don cogo min na a ka jamakulu bɛɛ la, u bɛ o ɲɔgɔn fana de jira. An ka an cɛsiri walisa Jamalajɛ don kelen si kana tɛmɛ an kan, o Kafoba Jamalajɛ min tɔgɔ ko ‘An ka taama ni Ala ye.’
[Box on page 3]
Kalan Kɛwaatiw
Jumadon ani Sibiridon
9:30 - 17:10
Kari don
9:30 - 16:05