Jamalajɛw ye nisɔndiya tuma ye
1 Jehowa Seerew ka jamalajɛw ye nisɔndiyaba tumaw ye. A ka ca ni san kɛmɛ ye, nin ɲɔgɔn lajɛw nɔ bɛ jama cayali la min bɛ ka kɛ an ka jɛkuluba la. K’a daminɛ mɔgɔ fitininw na, an ye Jehowa ka duba caman ye an ka baara kan diɲɛ kɔnɔ. An tile la jamalajɛ fɔlɔ senfɛ, min kɛra Sikago, Ilinɔyi, san 1893 na, jama la mɔgɔ 360 cɛma, 70 batisera; o kɛra taamasiyɛn ye min b’a jira k’u y’u yɛrɛw di Jehowa ma. Salon, jamalajɛ minnu kumakun tun ye “Ala ka Kuma Kɛbagaw” ye, olu bɛɛ ye jama hakɛ min dalajɛ diɲɛ bɛɛ kɔnɔ, o bɛ taa mɔgɔ 9 454 055 la; mɔgɔ batiselenw hakɛ tun ye 129 367 ye. Nin ye dakabanadalilu ye ka nisɔndiya!
2 Kabini Bibulu kɔnɔ mɔgɔw tile la, Jehowa ka mɔgɔw ka lajɛw ye fɛɛrɛba de ye walasa ka dɔnniya lase mɔgɔ ma, dɔnniya min bɛ bɔ Jehowa yɔrɔ. Ɛsdrasi ni Nehemi tile la, jama tun bɛ Sariya kitabu kalanni lamɛn “k’a daminɛ sɔgɔma fo ka taa tile gan.” (Neh. 8:2, 3) Ikomi u ye faamuyali fisama sɔrɔ sariya kitabu la o waati la, mɔgɔw “ɲagalila kosɛbɛ. (Neh. 8:8, 12) An fana bɛ nisɔndiya, k’a masɔrɔ jamalajɛw bɛ cogo ɲuman di an ma ka kalan ɲuman ni alako dumuni sɔrɔ “a tuma la” ka bɔ Jehowa yɔrɔ “jɔnkɛ dannamɔgɔ hakilima” bolo fɛ. (Mat. 24:45) Ikomi Yesu y’a fɔ ko mɔgɔ ka kan ka balo “kuma [na] min bɛ bɔ Ala da la,” jamalajɛw jɔyɔrɔ ka bon an ka kɛnɛya la alako ta fan fɛ.—Mat. 4:4.
3 Ka ye lajɛ kɛnɛkan, o bɛ cɛsiriw bɛɛ kun bɔ: An bɛɛ ka kan k’a kɛ an kuntilenna ye ka kɛ ɲinan kafoba ka jamalajɛ mumɛ la, n’o ye “Ala ka Kuma Karamɔgɔw” ye. An ka kan k’a ŋaniya ka se yen joona don o don ani ka to yen fo an ka jɛ k’a fɔ “Amina!” kuncɛli delili tuma na. Walasa an ka se k’o kɛ, fo an ka yɛlɛma don an ka waati bolodacogo la. Ka waati sɔrɔ an ka baarakɛyɔrɔ la walasa ka taa jamalajɛ la, o bɛ se ka na ni gɛlɛya dɔw ye. N’an jɔra min kan, an ka kan ka ka to o kan, foyi kana an bɔ o kan. Ni jatigila ni bolifɛn ko b’an na, an ka kan ka kɔn k’o ɲɛnabɔ. Ni cɛsiri b’an bolo k’a kɛ, o kun bɛ!
4 Jamalajɛ la taali bɛ na ni duba minnu ye, Jehowa ka mɔgɔw t’o suma ni wari ye. A’ ye mɔgɔ dɔw ka misaliw lajɛ, mɔgɔ minnu tun jɔra a kan ka taa Jehowa Seerew ka jamanaw-cɛ jamalajɛ la. O kumakun tun ye ko: “La volonté divine” (Ala sago), n’o tun kɛra New York City san 1958 kɔnɔna na. Balimakɛ dɔ y’a ka sojɔ ciyakɛda datugu dɔgɔkun fila kɔnɔna na, k’a bɔ a yɛrɛ la ka dɛmɛ don jamalajɛ la ani ka ye a kɛnɛkan. Virgini gunw na, balimakɛ dɔ ye dugukolo tari fila ni tila feere walasa ale n’a ka denbaya mɔgɔ wɔɔrɔ bɛɛ ka taa jamalajɛ la. Cɛ n’a muso y’u ka jikankurun mɔtɛrima feere walasa u ka taa n’u den saba bɛɛ ye jamalajɛ la; den ninnu si bɛ daminɛ kalo fila la ka taa se san wolonwula ma. Kaliforni mara la, a tun fɔra denbaya kelen na balimakɛ saba ye ko n’u ma to u ka baarayɔrɔ la, u tun tɛ na baara sɔrɔ tun u segintuma na. O bɛɛ n’a ta, o m’u bali ka taa o jamalajɛ la, ɲinɛ tɛ kɛ min kɔ.
5 Jehowa b’an ladiya an ka cɛsiri sɛbɛmaw kosɔn: Jehowa ɲɛ bɛ a ka mɔgɔw ka cɛsiriw la, n’a bɛ duba u ye. (Heb. 6:10) Misali la, jamalajɛ senfɛ min kɛra san 1950 nan na, n’o kumakun tun ye ko: “L’accroissement de la théocratie” (Ala ka mara ko ka jiidili), jama la mɔgɔw ye jɛmukan mɛn min kɛra koba ye, ko “Nouveaux systèmes de choses” (Kow sigicogo kuraw). Balimakɛ Frederik Franz ye bɛɛ hakili jɔ a kɛlen ka ɲininkali kɛ, ko: “Yali nin jamanaw-cɛ jamalajɛ na nisɔndiya k’a dɔn ko yan, su in na, an cɛma, caman bɛ yan minnu na kɛ diɲɛ kura ka masakɛdenw ye wa?” San 50 ni kɔ o kɔfɛ, an bɛ t’a fɛ ka nisɔndiya ni Zaburu 45:16 faamuyali jɛlen ye.
6 Salon kafoba ka jamalajɛ kɔfɛ, dutigi koɲumandɔnna dɔ y’a sɛbɛn ko: “Balimaw, nin jamalajɛ kɛra kisili fɛn ye ka se hakɛ min na, aw tɛna o dɔn abada. Ne ka denbaya yɛlɛmana duguba kɔnɔ k’a kun kɛ baarako ye, nka an ka alamɔgɔya barika dɔgɔyara. . . . An y’a to an ka Krecɛnya sira la ko wajibiyalenw ka bila bolokɔfɛ. An ye lajɛw la taali dabila, an ni tɔw tun tɛ jɛ ka wajuli kɛ tun. . . . Nin jamalajɛ y’an kɛ mɔgɔ kuraw ye, wa, an ye kuntilennaw boloda ko kura alako ta fan fɛ; an y’an ka kow labɛn fana walasa k’u dafa.”
7 Jehowa b’an labalo ni alako dumuni ye ka kɛɲɛ n’an magow ye. A bɛ balo nafama di an ka jamalajɛw senfɛ. An ka waleɲumandɔn ka ɲɛsin nin fɛɛrɛ ma, o ka kan ka se k’an bila ka segin Kɔrnɛye ka kuma kan, a ye min fɔ tuma min na ciden Piɛrɛ taara bɔ a ye, ko: “Sisan Ala ye fɛn minnu bɛɛ di i ma k’a fɔ an ye, an bɛɛ lajɛlen filɛ Matigi [Jehowa] ɲɛ kɔrɔ yan ka olu lamɛn.” (Kɛw. 10:33) A ka kɛ an kuntilenna ye ka “kɛ Ala ɲɛ kɔrɔ” kalan kɛtuma kelen-kelen bɛɛ la, ɲinan kafoba ka jamalajɛ senfɛ, n’o ye “Ala ka Kuma Karamɔgɔw” ye!