I ka baara kɛ ni donkibarow ye walasa mɔgɔw ka mago jira kɛ
1 Yali a ka di i ye fɛn ɲuman caman ka to i hakili la tuma bɛɛ, fɛn ɲuman minnu bɛna i dɛmɛ k’i ka kuma fɔtaw yɛlɛma cidenyabaara la, ani ka mɔgɔ bila u ka mago jira kɛ ka ɲɛsin Bibulu ka cikan ma wa? N’o don, fɛn minnu bɛ kɛ diɲɛ kɔnɔ, an’i ka yɔrɔ la, i ka baara kɛ n’o fɛnw ye walasa ka barow daminɛ. I bɛ se ka kuma kow kan minnu bɛ kɛ sigida, jamana ni diɲɛ kɔnɔ. O fɛnw bɛ yɛlɛma tuma bɛɛ. (1 Kɔr. 7:31) Nin misaliw jateminɛ.
2 Magoɲɛfɛnw sɔngɔw ani sɔrɔ ye mɔgɔw jɔrɔnanko sɛbɛw ye. I bɛ se k’a fɔ ko:
◼ “Yali i y’a mɛn arajo la ko [o fɛn fɔ] sɔngɔ gɛlɛyara tugun wa?” Walima, i bɛ se ka kuma baara sɔrɔbaliya kan ni uziniba dɔ y’a ka baarakɛla caman bila. I bɛ se ka taa ɲɛ ni ɲininkali ye ko: “Yali i ma deli k’i yɛrɛ ɲininka mun na diɲɛ ka gɛlɛn ten?” Walima “Yali e miiri la dahirimɛko bɛna gɛlɛya tuma bɛɛ wa?” A bɛ bɔ e yɛrɛ ka baro ɲɛminɛcogo la.
3 Sɛbɛn minnu bɛ kuma farinya kow kan, i n’a fɔ bɔnɛkow denbayaw kɔnɔ, walima lakɔlidenw cɛma, olu bɛ se ka kɛ barokunw ye. I bɛ se ka ɲininkali kɛ ko:
◼ “Yali i y’a kalan kibarusɛbɛn kɔnɔ ko [ko min kɛra sigida la, o fɔ]?” I ka tila ka ɲininka ko: “E miiri la mun bɛ se ka kɛ o farinyaba sababu ye diɲɛ kɔnɔ?” Walima, “E miiri la, yali waati tɛna na abada an bɛna se ka hakililatigɛ sɔrɔ min na wa?”
4 Sanjiba minnu bɛ tiɲɛni kɛ, dugukolo yɛrɛyɛrɛw, walima tɔɔrɔ minnu bɛ fasodenw kan diɲɛ yɔrɔ caman na, olu fana bɛ cogo di an ma walasa ka mɔgɔw bila u ka mago jira kɛ. Misali la, i bɛ se ka ɲininkali kɛ ko:
◼ “Yali Ala de ye [kasaarako fɔ] sababu ye wa?” Walima i bɛ se ka kuma fasodenw ka tɔɔrɔw kan min kɛra kɔsa in na, k’a fɔ ko: “Ni mɔgɔ kelen-kelen bɛɛ bɛ bɛn fɛ, mun na o sigili ka gɛlɛn?”
5 I ka bɔ kow kala ma tuma bɛɛ walasa ka se ka baro daminɛ n’o ko kɛlenw ye. Hakilina minnu bɛ sɔrɔ Comment raisonner (Hakilijakabɔ kɛcogo) gafe kɔnɔ, a ɲɛw 9 –10 na, “Actualités” (Donkibarow) yɔrɔ la, olu bɛna i dɛmɛ. O bɛɛ n’a ta, i k’i janto a la walasa i kana i da don politiki kow walima hadamadenya koɲɛw na. Nka, i ka Bibulu ani Ala ka Masaya ko da u hakili kan, k’a jira k’o Masaya de ye waati bɛɛ la hadamadenw ka kunkow ɲɛbɔlan ye.