Yali ne ka kan ka yɛlɛma yɔrɔ wɛrɛ la wa?

¹ Yesu ye ci min fɔ ko ka “taa siyaw bɛɛ kɛ kalandenw ye,” Jehowa ka baarakɛla caman sɔnna o ci ma. U yɛlɛmana yɔrɔw la, magoba bɛ yɔrɔ minnu na. (Mat. 28:19) U ye Pol ladege, ale min sɔnna nin welekan ma, ko: “Na Masedwane, k’an dɛmɛ.” (Kɛw. 16:⁠9) O bɛ se ka kɛ ka ɲɛ cogo jumɛn na?

² I ka fɛn bɛɛ jateminɛ kosɛbɛ: I ka jɛkulu la, yali wajulikɛyɔrɔ dɔ bɛ yen mɔgɔ tɛ baara kɛ min na ka caya wa? N’a bɛ ten, i bɛ se k’i ka baara sinsin o yɔrɔw kan. Sanni i k’a latigɛ k’i bɛ taa sigi yɔrɔ dɔ la, i ka laadilikan ɲini maakɔrɔw fɛ walasa k’a dɔn n’olu ɲɛ na i labɛnnen don koɲuman ka yɛlɛma yɔrɔ wɛrɛ la. I bɛ se fana k’i ka kafoba lakɔlɔsibaga ɲininka n’a bɛ jɛkulu dɔ dɔn i ka yɔrɔ masurunna na, i bɛ se ka dɔ fara i ka cidenyabaara kan yɔrɔ min na. Nka, n’i y’o fɛn bɛɛ jateminɛ kaban, a dɔ rɔ, i b’a fɛ ka dɛmɛ don jamana yɔrɔ dɔ wɛrɛ la, walima jamana wɛrɛ yɛrɛ la. N’o de y’i ŋaniya ye, i b’a fɛ ka baara kɛ yɔrɔ min na, e n’i ka jɛkulu maakɔrɔw kulu ka kan ka lɛtɛrɛ dɔ sɛbɛn, k’o ci o yɔrɔ Tɔn bolofara ma. I ye min kɛ i ka diɲɛnatigɛ kɔnɔ ala-ka-marako ta fan fɛ, olu bɛɛ ka kɛ o sɛbɛn kɔnɔ. A bɛ se fana ka kɛ hakilitigiyako ye ka taa bɔ o yɔrɔ la fɔlɔ sanni i k’a latigɛ ka yɛlɛma yen kudayi.

³ I k’i ɲɛmajɔ tungalasigi ko la: Balimakɛ caman bɛ ka yɛlɛma jamana wɛrɛw la bawo u b’a ɲini k’u ka diɲɛnatigɛko ɲɛ, walima ka lafiya dɔ sɔrɔ degunkow la. O sira la, dɔw bɛ nɛgɛn namaratɔw fɛ minnu bɛ layidu ta k’u dɛmɛ walasa u ka se ka sigi u ka jamana kura la. Nka, n’u y’u ka wari minɛ dɔrɔn, u bɛ taa k’u fililen to. Tuma dɔw la o namaratɔw b’a ɲini yɛrɛ ka tungarankew diyagoya k’u bila jɛnɛya la. N’u banna o ma, u bɛ taa k’u to o jamana na k’a sɔrɔ lakanani si t’u la. O cogo la tungarankew ka ko ka jugu ka tɛmɛ u faso ta kan. Tuma dɔw la u bɛ dɛsɛ ka jiginyɔrɔ, walima ka dɛmɛ ɲini balimakɛw fɛ, k’u ka doni da Krecɛn denbaya wɛrɛw kan minnu bɛ k’u jija k’u kunkow n’u ka gɛlɛyaw kɛlɛ. Denbaya dɔw mɔgɔ minnu n’u ka sokɔnɔmɔgɔ farala, u kɛra mɔgɔw ye minnu barika dɔgɔyara alako ta fan fɛ, k’a sababu kɛ u m’u ka yɛlɛmaniko jateminɛ koɲuman.​—⁠1 Tim. 6:​8-11.

⁴ N’i b’a fɛ ka yɛlɛma e yɛrɛ ka nafa kama, i k’a to i hakili la k’i sigiyɔrɔ mana kɛ yɔrɔ o yɔrɔ ye, kunko kɛlɛtaw bɛ yen. N’a y’a sɔrɔ i bɛ yɔrɔ la, i bɛ yɔrɔ min kan mɛn k’o mɔgɔw dɔnkow dɔn kaban, kunkow kɛlɛli ka nɔgɔn kosɛbɛ o yɔrɔ la ka tɛmɛ sigiyɔrɔ kura kan, i tɛ fosi dɔn o yɔrɔ min ko la.