Yali i bɛ waleɲumandɔn jira ka ɲɛsin Krista ka kanuya ma wa?
1 Ciden Yuhana y’i miiri a Makɛ ka ɲɛnamaya ma minkɛ, a y’a sɛbɛn ko: Yesu ka ‘mɔgɔ minnu bɛ diɲɛ na, a tun y’u kanu, a y’u kanu fana fo a laban na.’ (Yuh. 13:1) Hakilijigin waati in kɔnɔna na, an ka miiri Krista ka kanuya wale bɛɛ la belebele ma. An bɛ se k’an ka waleɲumandɔn jira ka ɲɛsin o kanuya ma, n’an bɛ dannaya kɛ kunmabɔsara la, n’an b’an ta kɛ wajuli baara la ni timinandiya ye, ani iko Yesu y’a kɛ cogo min na, n’an bɛ muɲuli kɛ fana “fo a laban.”— Mat. 24:13; 28:19, 20; Yuh. 3:16.
2 An ka waleɲumandɔn jira ka ɲɛsin Krista ka kanuya ma: Yesu ye baara caman kɛ a ka dugukolo kan ɲɛnamaya dɔgɔkun laban na. (Mat. 21:23; 23:1; 24:3) Ikomi an ye Krista ladegebagaw ye, an b’an ‘jija ni kisɛya ye’ Jehowa ka baara la bawo kanuya de b’an fana bila k’o kɛ. (Luka 13:24) Fɛɛrɛw tigɛra ka ɲɛsin Awirilikalo ma. Yali i bɛna baara kɛ n’o fɛɛrɛw ye walasa ka dɔ fara i ka waati kan cidenyabaara la wa?
3 Ɲinan, Matigi ka surɔfana bɛ bɛn Araba ma, Awirilikalo tile 19. Mɔgɔ joli bɛna na o ko sɛbɛ in na? O bɛ bɔ an de la kosɛbɛ. I bɛna mɔgɔ minnu wele o la, yali i ye olu tɔgɔw sɛbɛn wa? Olu bɛ se k’a kɛ i ka Bibulu kalandenw ye, magojirabagaw, i balimaw, i kalandenɲɔgɔnw, ani i kokɛɲɔgɔnw ye. Yali i ye o mɔgɔw ye k’u wele ni nisɔndiya ye o la wa? Yali i bɛna u hakili jigin tile damadɔw sanni Hakilijigin don ka se wa? Yali u mago b’i la walasa i k’u dɛmɛ u ka se ka na wa? Mɔgɔ minnu tɛ wajuli kɛ tun, maakɔrɔw bɛ olu fana wele ka na o la. Ikomi Hakilijigin don ko bɛna kɛ baarakɛdon dɔ su fɛ sanni a ka kɛ Sibiri, walima Kari dɔ fɛ, o tɛ dɔ bɔ o ko nafa la. An bɛɛ ka kan ka na.
4 I labɛnnen ka na: A nafa ka bon an k’an labɛn, ka miiriya bɛnnen sɔrɔ n’an bɛ na Hakilijigin don na. Pol ye dusu don a Krecɛnɲɔgɔnw kɔnɔ walasa u k’a to u hakili la ko ko sɛbɛ don. (1 Kɔr. 11:20-26) Mun na i tɛna Yuhana ka kibaru duman kalan a tilayɔrɔba 13 nan fo ka taa se a tilayɔrɔba 17 nan ma i ka denbaya ka Bibulu kalan kɛtuma na, ka tila k’i ka denbaya kɔnɔmɔgɔ kelen kelen bɛɛ ɲininka u k’a fɔ Yesu ka saraka kɔrɔ ye min ye u fɛ? Bibulu kalanjɛ min bolodala Hakilijigin dɔgɔkun kɔnɔna na, i kana ɲinɛ k’o fana kɛ don o don.
5 An ka kanuyaba min ɲɛsinnen bɛ Krista ma, o bɛna t’a fɛ Awirilikalo tile 19 tɛmɛnen kɔfɛ, bawo an jɔlen b’a kan k’an ka kanuya jira Krista la fo abada. Ɲinan Hakilijigin don ko bɛna an dɛmɛ k’o ŋaniya sinsin an na.