An ka miiri Hakilijigin na ni waleɲumandɔn ye
1, 2. Munna an ka kan ka miiri kunmabɔsara la ni waleɲumandɔn ye?
1 Walisa ka tugu Yesu ka ci fɔlen la, Kretiɛn minnu bɛ diɲɛ yɔrɔ bɛɛ la, olu bɛna u lajɛ san 2008, Sibiridon na Marisikalo tile 22 tile binnen kɔfɛ ka Yesu Krisita ka saya hakilijigin kɛ. (Luka 22:19; 1 Kɔr. 11:23-26) Ko minnu tiimɛna o don na, ni a san 1 975 ɲɔgɔn de ye nin ye, o waleɲumandɔnba min b’an dusukun na, o de b’an bila ka tugu Yesu ka ci fɔlen na. Yesu kɛlen ka kantigiya dafalen mara fo ka se saya ma diminba kɔnɔ tɔɔrɔ jiri kan, a ye a Fa tɔgɔ saniya, ka Sitanɛ ka dalakɔrɔbɔ kumaw jaabi cogo dafalen na.—Job 1:11; Nt. 27:11.
2 Yesu ka joli bɔnnen de ye layidu kura sɛmɛntiya. O de y’a to Ala ye hadamaden dafabaliw ta ka kɛ i ko a denkɛw, u ka jigiya sɔrɔ o cogo la ka kuntigiya kɛ Krisita fɛ sankolola Masaya la. (Jer. 31:31-34; Marka 14:24) Ka fara o kan, Ala ye hadamadenw kanu haali cogo min na, o jirala ka jɛya tuma min na a ye a Denkɛ kanulen di ka kɛ saraka ye, i ko Yesu yɛrɛ y’a fɔ cogo min na Nikodɛmɛ ye.—Yuh. 3:16.
3. Mɔgɔ minnu bɛna na Hakilijigin na, olu bɛna nafa jumɛn sɔrɔ o la?
3 Mɔgɔw wele ka na Hakilijigin na: Ka ɲɛsin mɔgɔw ma, an bɛ se ka minnu wele ka na Hakilijigin na, Zanwuyekalo An ka Masaya Cidenyabaara y’a jira ko an bɛ se ka olu tɔgɔw sɛbɛn, ka tila k’u kelen-kelen wele ka na o la. I ye mɔgɔ minnu tɔgɔw sɛbɛn, yala i ye olu dɔw weleli daminɛ wa? Yala i ye fɛɛrɛ tigɛ walisa k’i sen don kosɛbɛ baara la min bɛna daminɛ Marisikalo tile fɔlɔ la, n’o ye ka mɔgɔ wele ka na Hakilijigin na wa? Mɔgɔ minnu bɛna na o la, u bɛna kunnafoniw sɔrɔ ka bɔ Sɛbɛnniw kɔnɔ minnu bɛn’a to u bɛ se ka u ka dannaya da kunmabɔsara kan, kunmabɔsara min bɛ tila ka ɲɛnamaya banbali di u ma.—Rom. 10:17.
4. Munna an ka kan na joona Hakilijigin na?
4 Mɔgɔ minnu bɛ se, olu bɛɛ ka kan ka a boloda ka kɔn ka na walisa ka mɔgɔw kunbɛn minnu bɛna sɔn ka na wele kɛrɛnkɛrɛnnen na. Ikomi mɔgɔ caman de bɛ na Hakilijigin na, o kosɔn an ka kan k’an jan to kɛrɛnkɛrɛnnenya la mɔgɔ kuraw la ani mɔgɔ tɔw la minnu bɛ to ka na an ka lajɛw la waati ni waati.
5. I bɛ se k’i dusukun labɛn Hakilijigin kama cogo di?
5 I dusukun labɛn: Bibulu kalanni kɛrɛnkɛrɛnnen min bolodala Hakilijigin kama, n’o bɛna daminɛ Marisikalo tile 17, o bɛ sɔrɔ Examinons les Ecritures chaque jour—2008 ani san 2008 kalandiriye kɔnɔ. Yesu ye don laban minnu kɛ dugukolo kan sani a ka sa, koba minnu kɛra o donw na, n’an bɛ miiri o la, o bɛna an dɛmɛ k’an dusukun labɛn Hakilijigin labatoli kama. (Esd. 7:10) Ka taasi o maanaw la minnu bɛ Bibulu kɔnɔ, ka Jehowa deli fana o waati la, o bɛna an ka waleɲumandɔn bonya kosɛbɛ Jehowa ni a Denkɛ ka kanuya ko la, u kɛlen ka kunmabɔsara di an ma.—Zab. 143:5.
6. N’an ka waleɲumandɔn bonyana kunmabɔsara ko la, o bɛna mun kɛ an na?
6 Ikomi Hakilijigin bɛ ka surunya, an bɛ se k’an yɛrɛ labɛn koɲuman, ka tɔw fana labɛn o ko nafama kɛrɛnkɛrɛnnen kama. Ka miiri kunmabɔsara la ni waleɲumandɔn ye, o bɛna anw ni Jehowa cɛ sinsin, ka anw ni a Denkɛ cɛ sinsin fana. (2 Kɔr. 5:14, 15) O bɛna an bila fana ka u ladege, ka mɔgɔw kanu ni kanuya ye kaariya bɛ min na.—1 Yuh. 4:11.