I ye o bila kɔfɛ ma wa?

Ka mun bila kɔfɛ ma? I ka DPA karati lafali, n’o ye karati ye min bɛ di Jehowa Seere batiselenw ma. Ikomi i t’a dɔn min bɛna i sɔrɔ sini, a nafa ka bon kosɛbɛ i ka kɔn k’a latigɛ, wa, k’a sɛbɛn fana, i bɛ sɔn furakɛlicogo ni furakɛli fɛɛrɛ minnu na, ni kasaara walima bana dɔ nana cun i kan, n’o ka kan ka ɲɛnabɔ teliya la. (Yak. 4:14; Kɛw. 15:28, 29) Walisa k’i dɛmɛ o sira la, wideyo bɔra min tɔgɔ ye ko Soigner sans transfuser – Besoins et droits du patient. O lajɛ. O kɔfɛ delili kɛ, wa, i ye min kalan, aw ka o sɛgɛsɛgɛ ɲininkali nataw sababu fɛ.—Kɔlɔsili: Opereli kunkunrunninw jaw jiralen bɛ wideyo la, o kosɔn, bangebagaw ka kan k’a latigɛ ni olu ni u ka denmisɛnninw bɛna o lajɛ ɲɔgɔn fɛ.

(1) Munna dɔgɔtɔrɔkulu bɛ ka jolidon nafa sɛgɛsɛgɛ kokura? (2) Misali saba di opereli gɛlɛnw kan minnu kɛra k’a sɔrɔ jolidon ma kɛ. (3) Diɲɛ bɛɛ kɔnɔ, furakɛlaw ni operelikɛlaw joli y’a jira ko u bɛ sɔn ka mɔgɔ furakɛ k’a sɔrɔ jolidon ma kɛ? Munna u sɔnna ka o kɛ? (4) Kalan minnu kɛra kɔsa in na jolidon ko la dɔgɔtɔrɔsow la, olu ye mun jira? (5) Furakɛli ta fan fɛ, farati jumɛnw bɛ jolidon na? (6) Ka ɲɛsin fɛnw ma minnu bɛ se ka bila joli nɔ na, dɔgɔtɔrɔba caman nana faamuyali jumɛn sɔrɔ olu nafa kan? (7) Mun de bɛ na ni jolidɔgɔya ye? Hadamaden bɛ se ka jolidɔgɔya kun fo ka se hakɛ jumɛn na? Mun bɛ se ka bila a nɔ na? (8) Mun bɛ se ka kɛ walisa banabagatɔ fari ka se ka jolikisɛbilenw caman dilan, n’o bɛ wele tubabukan na ko Globules rouges? (9) Fɛɛrɛ jumɛnw tigɛra walisa ka jolibɔn dɔgɔya opereli kɛtuma na? (10) Yala mɔgɔ bɛ se ka da fɛnw na minnu bɛ se ka bila joli nɔ na, ni denmisɛnw bɛ furakɛ walima ni banabagatɔ ka ɲɛnamaya bɛ farati la wa? (11) N’i b’a fɛ ka mɔgɔ furakɛ ka ɲɛ, sariyakolo fɔlɔ jumɛn de bɛ sirataama? (12) Munna a nafa ka bon kosɛbɛ Kretiɛnw ka kɔn ka furakɛlicogow sugandi jolidon tɛ min na? An bɛ se k’o kɛ cogo di?

Ka kɛɲɛ ni an kɔnɔnamiiri ye min kalanna ka ɲɛ Bibulu fɛ, a bɛ an kelen-kelen bɛɛ de bolo k’a latigɛ ni an bɛ sɔn furakɛlicogo dɔw la minnu jirala wideyo la. Aw bɛ sɔn furakɛlicogo ani furakɛli fɛɛrɛ minnu na ni jolidon tɛ u la, yala aw ye o latigɛ cogo jɛlen na aw yɛrɛ ani aw ka denbaya ye wa? Walisa ka kunnafoni dafalenw sɔrɔ ka se ka baro kɛ o kow kan, aw ka “Questions des lecteurs” lajɛ san 2004 Zuwɛnkalo tile 15 La Tour de Garde kɔnɔ ani san 2000 Ɔkutɔburukalo tile 15 La Tour de Garde kɔnɔ. San 2006 Nowanburukalo An ka Masaya Cidenyabaara cɛmancɛ sɛbɛn min tɔgɔ ye ko “Ne ka kan ka mun latigɛ fractions (farakisiɔnw) ni furakɛlifɛɛrɛw ko la ni ne yɛrɛ joli ye?” o fana lajɛ. I ye mɔgɔ minnu sugandi walisa olu ka kuma i tɔgɔ la, i tɛna se k’o kɛ tuma min na, ani i somɔgɔw fana minnu tɛ Jehowa Seerew ye, i ka olu bɛɛ ladɔnniya koɲuman i ka kow latigɛlenw la.