“Ka Kibaru duman fɔ”

1. Kibaru duman jumɛn b’an bolo k’a fɔ mɔgɔw ye?

¹ Bonya b’an bolo ka “Ala ka nɛɛma kibaru duman fɔ” diɲɛ kɔnɔ, kibaru duman man ca min kɔnɔ. (Kɛw. 20:24) O kɔrɔ ye ka mɔgɔw ladɔnniya ko Jehowa ka diɲɛ kura tilennen bɛna sigi sɔɔni “laban donw” nɔ na, ‘fɛn fɔlɔ [bɛna] tɛmɛ’ min kɔnɔ. (2 Tim. 3:1-5; Jir. 21:4) O waati la, bana tɛna kɛ tun. (Esa. 33:24) An ka mɔgɔ kanulen minnu banna, u bɛna bɔ kaburuw kɔnɔ, olu ni u somɔgɔw ni u teriw bɛna ɲɔgɔn sɔrɔ kokura. (Yuh. 5:28, 29) Dugukolo kuuru bɛɛ bɛna kɛ alijinɛ cɛɲumanba ye. (Esa. 65:21-23) Ninnu ye kibaru duman damadɔw de ye an bɛ minnu fɔ mɔgɔw ye.

2. Munna Hakilijigin waati bɛ cogo ɲuman caman di an ma ka seereya kɛ kibaru duman ko la?

² Marisikalo, Awirilikalo ni Mɛkalo bɛna cogo ɲuman caman di an ma ka o kibaru duman suguw fɔ mɔgɔw ye. O kalow kɔnɔna na, dugukolo yɔrɔ caman na, waati cogo ka ɲi, tile tɛ bin joona fana. O b’a to mɔgɔw bɛ se ka waati caman kɛ cidenyabaara la. Ka fara o kan, koba min nafa ka bon ni ko tɔw bɛɛ ye san kɔnɔ, n’o ye Hakilijigin ye, o bɛna kɛ diɲɛ yɔrɔ bɛɛ la Sibiridon na Marisikalo tile 22 tile binnen kɔfɛ. An ka kan k’an labɛn kabini sisan walisa ka bɔ ka caman kɛ forobaara la.

3. Mun bɛna an ka denbayaw dɛmɛ u ka dɔ fara u ka kɛta kan cidenyabaara la?

³ Ka kɛ tutigɛbaga farankan ye: Yala i bɛ se k’i ka waati boloda walisa ka kɛ tutigɛbaga farankan ye kalo kelen, kalo fila walima o kalo saba bɛɛ la wa? I bɛ se ka waati dɔ ta i ka denbaya ka kalan nata la walisa ka o ko lajɛ ɲɔgɔn fɛ. Ni denbaya kɔnɔmɔgɔw bɛ ɲɔgɔn dɛmɛ, u kelen walima u caman bɛ se ka kɛ tutigɛbaga farankan ye. (Nt. 15:22) I ka Jehowa deli o ko la, k’a lajɛ a bɛna duba i ka cɛsiriw ye cogo min na. (Nt. 16:3) Hali ni denbaya kɔnɔmɔgɔ si ma se ka kɛ tutigɛbaga farankan ye, denbaya kuuru bɛɛ bɛ se ka kuntilennaw sigi walisa ka dɔ fara u ka kɛta kan cidenyabaara la. U bɛ se k’o kɛ ni olu ni balimaw bɛ baara kɛ ɲɔgɔn fɛ, balima minnu bɛ se ka kɛ tutigɛbagaw ye.

4. N’an bɛ baara kɛ baarakɛwaati kuuru bɛɛ la, cogo jumɛn na an bɛ se ka an ka kow boloda ka se ka kɛ tutigɛbaga farankan ye?

⁴ N’a y’a sɔrɔ i bɛ baara kɛ baarakɛwaati kuuru bɛɛ la, n’i ye i ka waati boloda koɲuman, i bɛ se ka kɛ tutigɛbaga farankan ye. Waati min dira tilelafana dun kama, laala i bɛ se ka waati dɔ ta o la walisa ka waajuli kɛ. Walima i bɛ se ka i yɛrɛ ka waajulikɛyɔrɔ sɔrɔ i ka so kɛrɛfɛ, walima i ka baarakɛyɔrɔ kɛrɛfɛ, walisa ka waajuli kɛ lɛrɛ kelen sani baara ka daminɛ, walima lɛrɛ kelen baara jiginnen kɔfɛ. I bɛ se ka waati wɛrɛ sɔrɔ waajuli kama, ni baara dɔw b’i bolo ka kɛ minnu nafa man bon, n’i bɛ o baaraw bila kalo wɛrɛ la, ani n’i bɛ tile kuuru bɛɛ kɛ cidenyabaara la sibiridonw ni karidonw na. Dɔw sera ka tile kelen walima tile fila kɔnze ta walisa k’o waati kɛ foro baara la.

5. Mɔgɔ minnu kɔrɔla, walima minnu ye dɛsɛbagatɔ ye farikolo ta fan fɛ, i bɛ se ka olu dɛmɛ cogo jumɛn na u ka kɛ tutigɛbaga farankan ye?

⁵ N’i kɔrɔla, walima ni dɛsɛlen don farikolo ta fan fɛ, walima ni barika bɛrɛ t’i la, o bɛɛ n’a ta i bɛ se ka kɛ tutigɛbaga farankan ye, n’i bɛ dɔɔnin-dɔɔnin kɛ don o don cidenyabaara la. Jehowa deli a ka “sebaaya dama dɔnbali” di i ma. (2 Kɔr. 4:7) An balimamuso dɔ sera ka kɛ tutigɛbaga farankan ye k’a si to san 106 la. A somɔgɔ minnu ye Kretiɛn ye ani jɛkulu kɔnɔmɔgɔ wɛrɛw y’a dɛmɛ a ka waajuli kɛ du-ni-du, ka segin-ka-bɔnyew kɛ, ka taa Bibulukalanw na, ka cidenyabaara ɲɛ wɛrɛw fana kɛ. A ye dɛmɛ don ka Bibulukalan tan daminɛ. An balimamuso ko: “Cogo ɲɛnamaba min dira n ma ka kɛ tutigɛbaga farankan ye, ni ne miirila o ma, ne dusukun bɛ fa kanuya ni waleɲumandɔn na ka taa Jehowa ma, a Denkɛ ma an’A ka jɛkuluba ma min falen bɛ kanuya la. Ne b’a fɛ tiɲɛ na k’a fɔ ko: ‘I ni ce Jehowa!’ ”

6. Denmisɛn minnu batiselen don, minnu bɛ taa halisa lakɔli la, olu bɛ se ka kɛ tutigɛbaga farankan ye cogo jumɛn na?

⁶ N’i ye denmisɛn ye min batiselen don, min bɛ taa halisa lakɔli la, e fana bɛ se ka kɛ tutigɛbaga farankan ye. I ko mɔgɔ minnu bɛ baara kɛ baarakɛwaati kuuru bɛɛ la, a ka c’a la i bɛ se ka fɔlɔ ka sibiridonw ni karidonw boloda cidenyabaara kama. Laala don dɔw la, i bɛ se ka bɔ ka taa waajuli kɛ lɛrɛ kelen sani kalan ka daminɛ, walima lɛrɛ kelen kalan jiginnen kɔfɛ. Yala don bɛ yen kalan tɛ kɛ min na, n’i bɛ se ka cidenyabaara kɛ o don na wa? N’i b’a fɛ ka kɛ tutigɛbaga farankan ye, i k’o fɔ i bangebagaw ye.

7. Maakɔrɔw bɛ se ka mun kɛ walisa jɛkulu ka dusu sɔrɔ cidenyabaara kama Hakilijigin waati la?

⁷ Aw k’a kɛ weleweledalaw ka dusu sɔrɔ cidenyabaara kama: Maakɔrɔw bɛ misali ɲuman min jira, o sababu fɛ weleweledalaw bɛ se ka dusu sɔrɔ cidenyabaara kama. (1 Pi. 5:2, 3) U bɛ se ka foro baara ka lajɛ wɛrɛw boloda mɔgɔw kama minnu bɛna cidenyabaara kɛ sɔgɔma joona fɛ, ani ni lakɔli walima ni baara jiginna. Baara lakɔlɔsibaga ka kan ka sɛgɛsɛgɛ ko weleweledala minnu bɛ mankutuw dafa, olu de bilala lajɛw ɲɛminɛni na, wa, ko waajulikɛyɔrɔ, sɔn-ni-sɔn gafeninw ni sɛbɛnw bɛ yen minnu bɛ bɔli kɛ o baara kɛrɛnkɛrɛnnen kama o kalow kɔnɔna na.

8. Fɛn min kɛra jɛkulu dɔ kɔnɔ, an bɛ mun kalan o la?

⁸ Kalo caman kɔnɔ sani Hakilijigin ka se, jɛkulu dɔ maakɔrɔw ye dusu don weleweledalaw kɔnɔ walisa u ka kɛ tutigɛbaga farankan ye. Sɔn kɛra mɔgɔ hakɛ minnu na ka kɛ tutigɛbaga farankan ye, u tun bɛ to ka jɛkulu ladɔnniya o la dɔgɔkun o dɔgɔkun. O la sa, mɔgɔ minnu tun b’a fɛ ka dɔ fara u ka kɛta kan cidenyabaara la, olu tun b’a dɔn ko mɔgɔ caman bɛna sɔrɔ minnu bɛna u kɔkɔrɔdon. Foro baara lajɛ wɛrɛw bolodala sɔgɔma joona fɛ ani tile binnen kɔfɛ. O kɔ kɛra ko weleweledala 53, n’o ye jɛkulu weleweledala tilancɛ ɲɔgɔn ye, olu kɛra tutigɛbaga farankan ye Awirilikalo la.

9. Munna Hakilijigin waati ye waati ɲuman ye mɔgɔw bolo minnu bɛ mankutuw dafa walisa ka kibaru duman weleweledali daminɛ?

⁹ Aw ka mɔgɔ wɛrɛw dɛmɛ u ka waajuli kɛ: Ni mɔgɔ kuraw ani denmisɛnw bɛ mankutuw dafa ka waajuli daminɛ, u bɛ se ka wele ka foro baara daminɛ weleweledalaw fɛ minnu bɛ se kosɛbɛ o baara la. U bɛ se ka cogo sɔrɔ k’o kɛ Hakilijigin waati la, mɔgɔ caman bɛ dɔ fara u ka kɛta kan tuma min na. Yala Bibulu kalanden b’i bolo min bɛ ka taa ɲɛ, ni a y’a ka ɲɛnamaya kɛcogo bɛn Jehowa ka namu tilennenw ma wa? Yala denw b’i bolo minnu taamacogo ka ɲi, n’u bɛ ka taa ɲɛ, nka n’u ma kɛ weleweledalaw ye fɔlɔ wa? Ni o mɔgɔw y’a jira ko u b’a fɛ ka kɛ weleweledalaw ye minnu ma batise ani ni e yɛrɛ b’a dɔn ko u bɛ mankutuw dafa ka se k’o kɛ, i ka maakɔrɔw dɔ la kelen ladɔnniya o la. Lakɔlɔsibaga ɲɛmɔgɔ bɛna fɛɛrɛ tigɛ walisa maakɔrɔ fila ni e yɛrɛ ka baro kɛ i den walima i ka kalanden fɛ o ko kan.

10. Mɔgɔ minnu ye waajuli jɔ, maakɔrɔw bɛ se ka mun kɛ walisa k’u dɛmɛ?

¹⁰ Kalo nataw fana bɛna kɛ waati ɲuman ye mɔgɔw bolo minnu ye waajuli baara jɔ, u ka o daminɛ kokura jɛkulu fɛ. Jɛkulu ka gafe kalan ɲɛminɛbagaw ani maakɔrɔ wɛrɛw ka kan k’u timinandiya ka taa bɔ o mɔgɔw ye walisa k’a ɲini u fɛ ni kanuya ye k’olu ni o balimaw ka baara kɛ ɲɔgɔn fɛ cidenyabaara la. Ni o balimaw ye waajuli baara jɔ a mɛnna, maakɔrɔ fila ka kan ka baro kɛ u fɛ fɔlɔ, walisa k’a lajɛ ni u bɛ mankutuw dafa halisa ka se ka waajuli kɛ kokura.—km 11/00 ɲ. 3nan.

11. “Ala ka nɛɛma” jirala cogo bɛɛ la belebele jumɛn fɛ?

¹¹ Aw k’aw labɛn Hakilijigin kama: “Ala ka nɛɛma” jirala cogo bɛɛ la belebele min fɛ, o kɛra kunmabɔsara ye. (Kɛw. 20:24) Diɲɛ yɔrɔ bɛɛ la, mɔgɔ miliyɔn caman minnu bɛ Jehowa waleɲumandɔn, olu bɛna u lajɛ Sibiridon na, Marisikalo tile 22 tile binnen kɔfɛ, walisa ka Krisita ka saya Hakilijigin kɛ. An b’a fɛ ka mɔgɔ kɔnɔnajɛlenw bɛɛ wele ka na o la, k’u dɛmɛ fana u ka se ka na o koba la min bɛ Jehowa ka nɛɛma jira hadamadenw fan fɛ.

12. An ka kan ka jɔni wele ka na Hakilijigin na?

¹² I b’a fɛ ka mɔgɔ minnu wele ka na Hakilijigin na, i ka olu tɔgɔ sɛbɛn. Siga t’a la ko nin mɔgɔw sen bɛ i ka mɔgɔ weletaw la: I somɔgɔw, i sigiɲɔgɔnw, i dɔnbaga minnu bɛ i ka baarakɛyɔrɔ la walima i ka lakɔli la, i bɛ ka Bibulukalan kɛ mɔgɔ minnu kun ani i y’a kɛ minnu kun ka tɛmɛ, ani mɔgɔ tɔw bɛɛ, i bɛ to ka taa bɔ minnu ye. I ye mɔgɔ minnu wele ka na Hakilijigin na, ni ɲininkaliw bɛ u dɔw fɛ Hakilijigin ko la, i bɛ se ka nafa sɔrɔ a la ka baara kɛ ni Qu’enseigne la Bible ɲɛw 206-208 ye, minnu bɛ kuma Matigi ka surɔfana ko kan, n’o yɔrɔ bɛ wele tubabukan na ko appendice. O bɛ se ka to i ka Bibulukalan daminɛ, bawo o bɛna cogo di i ma ka baara kɛ ni gafe ye min bɛ kɛ ka Bibulukalanw ɲɛminɛ.

13. Weleweledala fila y’a latigɛ minkɛ k’u cɛsiri mɔgɔw weleli la ka na Hakilijigin na, Jehowa dubara olu ka cɛsiriw ye cogo jumɛn na?

¹³ An balimamuso dɔ ye denbaya 48 tɔgɔw sɛbɛn walisa ka olu wele ka na Hakilijigin na. Ni a ye denbaya dɔ wele ka na, a tun bɛ taamasiyɛn kɛ o denbaya tɔgɔ kɔrɔ, k’a sɛbɛn don min na a ye o denbaya wele. An balimamuso nisɔndiyara kosɛbɛ ko a ka mɔgɔ welelenw na, mɔgɔ 26 nana Hakilijigin na. An balimakɛ dɔ wɛrɛ fana min ye butikitigi ye, a y’a ka baarakɛla dɔ wele ka na o la min tun ye mɔnpɛrɛ kɔrɔ ye. Cɛ nana Hakilijigin na, wa, o kɔfɛ a nisɔndiyalen y’a fɔ ko: “Ne ye min kalan Bibulu kɔnɔ lɛrɛ kelen kɔnɔ, o cayara ka tɛmɛ ne ye min kalan san 30 kɔnɔ Katoliki diinɛ na.” Hakilijigin kɔfɛ, a ma mɛn cɛ sɔnna Bibulukalan ka kɛ a kun Qu’enseigne la Bible gafe kan.

14. Baara jumɛn bɛna daminɛ dugukolo yɔrɔ bɛɛ la Marisikalo tile fɔlɔ?

¹⁴ Mɔgɔ ladɔnniyali baara: K’a daminɛ Sibiridon na, Marisikalo tile fɔlɔ fo ka na se Marisikalo tile 22 ma, Hakilijigin welesɛbɛn kɛrɛnkɛrɛnnen bɛna jɛnsɛn dugukolo yɔrɔ bɛɛ la. An bɛɛ ŋaniya bɛna kɛ ka an seko damajira kɛ nin baara nafama na. A ka fisa an ka welesɛbɛn di an barokɛɲɔgɔn ma, an bolo a bolo, sani ka o bila a ka da la. Nka, n’aw ka waajulikɛyɔrɔ ka bon, maakɔrɔw bɛ se k’a latigɛ ko mɔgɔw minnu tɛ u ka so, welesɛbɛnw bɛ se ka bila olu ka da la cogo la min b’a to mɔgɔ wɛrɛw tɛ welesɛbɛnw ye. An bɛna sɔn-ni-sɔn gafeninw fana jira sibiridonw ni karidonw na.

15. An bɛ se ka Hakilijigin welesɛbɛn di mɔgɔw ma cogo jumɛn de la?

¹⁵ Ikomi waati min b’an bolo ka welesɛbɛnw jɛnsɛn, dan bɛ o la, a ka fisa i ka ɲɛfɔli ka surunyara. I k’i ɲɛkɔrɔdiya mɔgɔw kɔrɔ, wa, i k’u minɛ i ko i teriw. I bɛ se k’a fɔ ko: “An b’a fɛ ka da a la tigitigi ko e n’i ka denbaya kɔnɔmɔgɔw ani i teriw, ko aw welela ka na koba la min bɛna kɛ Marisikalo tile 22. Nin ye i ka welesɛbɛn ye. Kunnafoni tɔw dilen bɛ a kɔnɔ.” A bɛ se ka kɛ ko ɲininkaliw bɛ i barokɛɲɔgɔn fɛ, walima a bɛ se k’a sɔn welesɛbɛn na, k’a jira yɛrɛ ko a bɛna na Hakilijigin na. O mɔgɔw tɔgɔ sɛbɛn, wa, fɛɛrɛ tigɛ ka segin ka na bɔ u ye.

16. Ko kɛlen jumɛn b’a jira ko nafa bɛ mɔgɔ weleli baara la walisa u ka na Hakilijigin na?

¹⁶ Salon, sɔrɔdasi dɔ ye Hakilijigin welesɛbɛn sɔrɔ a ka da la. A y’a latigɛ ka taa Hakilijigin na, nka fo a tun ka yamaruya sɔrɔ a ka sarisan fɛ. A ye welesɛbɛn jira a ka sarisan na tuma min na, sarisan sinna ka sumaya. A tilara k’a fɔ sɔrɔdasicɛ ye ko a bangebagaw ye Jehowa Seerew ye, wa, ko ale ni u tun bɛ deli ka taa lajɛw la ɲɔgɔn fɛ. Sɔrɔdasicɛ ma yamaruya dɔrɔn sɔrɔ ka taa dɛ, nka, sarisan fana y’a bilasira ka taa Hakilijigin na.

17. An b’a jira cogo jumɛn na ko Ala ka nɛɛma ma kɛ fu ye an fan fɛ?

¹⁷ Waleɲumandɔn jira: Ikomi san 2008 Hakilijigin bɛ ka surunya, Jehowa ye nɛɛma min jira an fan fɛ, an kelen-kelen bɛɛ ka miiri kosɛbɛ o la. Ciden Paul y’a sɛbɛn ko: “An bɛ aw deli ko aw ye Ala ka nɛɛma min sɔrɔ, aw kana sɔn o ka kɛ fu ye.” (2 Kɔr. 6:1) An b’a jira cogo jumɛn na ko Ala ka nɛɛma ma kɛ fu ye an fan fɛ? Paul y’a sɛbɛn ko: “Nka, an b’an yɛrɛw jira ko an ye Ala ka baarakɛla ɲumanw ye fɛn bɛɛ la.” (2 Kɔr. 6:4) O la sa, an b’an ka waleɲumandɔn jira Jehowa ka nilifɛn ko la an taamacogo ɲuman fɛ ani an ka timinandiya fɛ kibaru duman waajuli la. Nin Hakilijigin waati bɛna cogo di an ma ka dɔ fara an ka baara kan, ka kibaru duman fɔ.

[Caption on page 3]

Jɔni bɛ se ka kɛ tutigɛbaga farankan ye?

◼ Denbayaw

◼ Mɔgɔ minnu bɛ baara kɛ baarakɛwaati kuuru bɛɛ la

◼ Mɔgɔ minnu kɔrɔla ani minnu ye dɛsɛbagatɔw ye farikolo ta fan fɛ

◼ Mɔgɔ minnu bɛ taa lakɔli la

[Caption on page 4]

Ni an bɛ ka Hakilijigin welesɛbɛnw jɛnsɛn:

◼ An k’an ka ɲɛfɔli surunya, k’an ɲɛkɔrɔdiya mɔgɔw kɔrɔ.

◼ Mɔgɔ minnu y’a jira ko u bɛ nafa don o la, an ka olu tɔgɔw sɛbɛn, ka segin ka na bɔ u ye

◼ An ka sɔn-ni-sɔn gafeninw jira sibiridonw ni karidonw na.