Furakɛlicogo bɛɛ la fisama ye mun de ye?

Dɔgɔtɔrɔkɛ Michael Rose ye dɔgɔtɔrɔso kuntigi ni mɔgɔ ye min bɛ mɔgɔ operetaw lasunɔgɔ ni kirinnan ye. A ko: “Banabagatɔ o banabagatɔ fura kɛra k’a sɔrɔ o ma kɛ ni joli ye, o banbagatɔ yɛrɛ de ye opereli cogo bɛɛ la fisama sɔrɔ.” Furakɛli fɛɛrɛ jumɛnw sen bɛ “furakɛlicogo la joli tɛ min na”? I ka kan ka o fɛnw dɔn walisa ka se k’i sinsin u kan ka i ka kow latigɛ furakɛlicogo ni opereli ko la. Wideyo min tɔgɔ ye ko Pas de sang : la médecine relève le défi lajɛ. O kɔfɛ, i ka fɛn faamuyalenw sɛgɛsɛgɛ ni nin ɲininkaliw ye.—Kɔlɔsili: Opereli kunkunrunninw jaw jiralen bɛ nin wideyo kasɛti la. O kosɔn, bangebagaw ka kan k’a jateminɛ n’a y’a sɔrɔ u ni denmisɛnninw bɛ se ka jaw lajɛ ɲɔgɔn fɛ.

(1) Kun jɔnjɔn jumɛn de kosɔn Jehowa seerew bɛ ban joli ka don u la? (2) Furakɛli ko la, Jehowa Seerew bɛ mun de ɲini? (3) Sariya bɛ jo jumɛnw di banabagatɔ bɛɛ ma? (4) Ni an ye furakɛli fɛɛrɛw sugandi jolidon tɛ min na, mun na o ye hakiliko de ye, ani mun na o b’a jira ko an bɛ se ka jɔ an ka kow kɔrɔ? (5) Ni joli caman bɛ ka bɔ mɔgɔ la, ko teliman fila jumɛn bɛ dɔgɔtɔrɔ bolo walisa ka jolibɔn lajɔ? (6) Ni dɔgɔtɔrɔw b’a fɛ ka banabagatɔ fura kɛ k’a sɔrɔ u ma joli don a la, u ka kan ka fɛn nafama naani jumɛnw de to u hakili la? (7) Dɔgɔtɔrɔw bɛ se cogo jumɛn na ka (a) jolibɔn dɔgɔya? (b) ka jolikisɛ bilenw to farikolo la? (c) ka joli dilanni teliya? (d) joli min bɔnna, o bɛ se ka sɔrɔ kokura cogo min na? (8) Fɛɛrɛw ɲɛfɔ minnu bɛ wele tubabukan na ko: (a) hémodilution, (b) récupération du sang épanché. (9) Aw mana furakɛli fɛɛrɛ fɛn o fɛn sugandi jolidon tɛ min na, aw ka kan k’a ɲini ka mun dɔn o ko la? (10) Yala operelibaw ani opereli gɛlɛnw bɛ se ka kɛ, k’a sɔrɔ joli ma don banabagatɔ la wa? (11) Dɔgɔtɔrɔw bɛ ka ɲɛtaa nafama jumɛnw kɛ?

Ka sɔn nin furakɛli fɛɛrɛ dɔw ma minnu jiralen bɛ nin wideyo kasɛti kɔnɔ, o ko bɛ an kelen-kelen bɛɛ de kan, ka kɛnyɛ ni dɔnniya ye an kelen-kelen bɛɛ kɔnɔnamiiri ye min sɔrɔ Bibulu kalan fɛ. Furakɛli fɛɛrɛ minnu na, joli tɛ don mɔgɔw la, yala i ye olu latigɛ i yɛrɛ ye, ani i ka denbaya ye wa? I ye o fɛɛrɛ minnu latigɛ ani kun minnu na i ye o kɛ, i ka denbaya kɔnɔmɔgɔ minnu tɛ Jehowa Seerew ye, olu fana ka kan ka kunnafoni dafalenw sɔrɔ o kow kan.—“Questions des lecteurs” min bɛ Zuwɛnkalo tile 15 san 2004 La Tour de Garde ni Ɔkutɔburukalo tile 15 san 2000 La Tour de Garde kɔnɔ, olu lajɛ.