Yesu ye misali min jira an na, an ka tugu o la
1. Yesu ye misali jumɛn jira ?
1 N’an bɛ ka kalanden-kɛli baara kɛ, an ka kan k’a to an hakili la ko mɔgɔ minnu bɛ an jateminɛ, an ka misali bɛ se ka nɔ ɲɛnamaba bila olu la. Yesu ye mɔgɔw kalan kuma ani kɛwalew fɛ. Mɔgɔ minnu tun ye Yesu jateminɛ, olu sera k’a ka cɛsiri ye, k’a bɛ mɔgɔw kanu, k’a Fa tɔgɔ saniyali tun bɛ a ni kan, ani k’a jɔlen tun b’a kan ka a Fa sago kɛ.—1 Pi. 2:21.
2. An ni minnu bɛ baara kɛ ɲɔgɔn fɛ cidenyabaara la, an ka misali bɛ se ka nɔ bila olu la cogo jumɛnw na?
2 N’an bɛ ka cidenyabaara kɛ so ni so: I ko Yesu ka misali ye nɔ bila mɔgɔw la cogo min na, o cogo kelen na an ka misali fana bɛ nɔ bila mɔgɔw la, anw ni minnu bɛ baara kɛ ɲɔgɔn fɛ. Weleweledala kuraw ani weleweledala minnu tɛ waajuli baara ɲɛdɔn kosɛbɛ, ni olu ɲɛ b’a la ko an cɛsirilen don cidenyabaara la, u bɛna miiri olu yɛrɛ ka waajuli baara ko la walisa k’o kɛcogo ɲɛ. N’u ɲɛ b’a la ko an nisɔn ka di, ko an b’a jira tiɲɛ na k’an bɛ mɔgɔw fɛ, u hakili bɛna jigin a la ko a nafa ka bon ka o ɲɔgɔn kɛ u ka cidenyabaara la. Ni u y’a ye ko an b’an jija ka Bibulu tɛmɛsiraw ta, ko an bɛ segin ka na bɔ mɔgɔw ye, ani ko an bɛ Bibulukalanw ɲɛminɛ, o bɛna dusu don u kɔnɔ k’o ɲɔgɔn kɛ.
3. An ka misali bɛ se ka Bibulu kalandenw kalan cogo di, wa, u bɛ se ka mun dege?
3 N’an bɛ ka Bibulu-kalan ɲɛminɛ: An ka Bibulu kalandenw bɛna an taamacogo kɔlɔsi kɛrɛnkɛrɛnnenya la. Misali la, hali n’an bɛ se k’a ɲɛfɔ u ye nafa min b’a la ka kalan labɛn, ka Bibulu tɛmɛsiraw lajɛ, ani ka tiiriw ci yɔrɔ kolomaw kɔrɔ, u bɛna a lajɛ n’an yɛrɛ y’an labɛn. (Rom. 2:21) An bɛnna lɛrɛ min kan walisa ka kalan kɛ u kun, n’an bɛ na o lɛrɛ la, u man teli ka to fɛn wɛrɛw k’u bali k’u ka Bibulukalan kɛ. An kaariyalen don cogo min na cidenyabaara kama, ani dannayaba min b’an na, siga t’a la ko u bɛna o fɛnw kɔlɔsi fana. Mɔgɔ minnu bɛ tugu Yesu ka misali kɔ, balannako tɛ tuma caman na u ka Bibulu kalandenw bɛ kɛ kibaru duman fɔbaga timinandiw ye ani minnu ka baara bɛ nɔ bɔ.
4. N’an bɛ jɛkulu ka lajɛw la tuma min na, an ka misali bɛ mɔgɔw kalan mun de la?
4 Ni an bɛ jɛkuluw ka lajɛw la: Mɔgɔ minnu ye Kretiɛn jɛkulu kɔnɔmɔgɔw ye, olu bɛɛ bɛ se ka mɔgɔw kalan u ka misali fɛ jɛkulu ka lajɛw la. Kibaru duman ka di mɔgɔ minnu ye, ni olu ye lajɛw nali daminɛ, u bɛ misali min ye jɛkulu kɔnɔ, o bɛ u nafa kosɛbɛ. U bɛna a kɔlɔsi ko kelenya ni nisɔndiya b’an ka balimaya kɔnɔ. U bɛn’a ye fana ko an b’an ka finiw don ani k’an kun dilan cogo bɛrɛ bɛnnen na. (Zab. 133:1) An bɛ kantigiya misali min jira jɛkulu ka lajɛw matarafali fɛ, ani an bɛ dannaya min jira an ka ɲɛfɔliw fɛ lajɛw kɛtuma na, u bɛna o fana kɔlɔsi. Mɔgɔ dɔ tun nana an ka lajɛ dɔ la. A ye dennin dɔ kɔlɔsi min bɛ Bibulu tɛmɛsira fɔlenw ye joona a yɛrɛ ka Bibulu kɔnɔ, wa, a b’a ɲɛmajɔ kosɛbɛ k’olu lajɛ a ka Bibulu kɔnɔ olu bɛ ka kalan tuma min na. Dennin ka misali y’a bila a k’a ɲini Bibulu kalan ka kɛ a kun.
5. An bɛ misali min jira mɔgɔw la, munna o man kan ka kɛ ko fitinin ye an bolo abada?
5 Sɛbɛnniw bɛ dusu don an kɔnɔ ka ɲɔgɔn ka misali ladege. (Fil. 317; Heb. 13:7) O la sa, an ka kan k’an hakili to a la ko Yesu ye misali min jira, n’an bɛ tugu o kɔ tigitigi, mɔgɔ wɛrɛw bɛna o kɔlɔsi, wa, a bɛ se ka nɔ ɲuman bila u la. Ikomi an b’o dɔn, nin kuma minnu bɛ 1 Timote 4:16 la, an ka olu ta an sɛbɛ la: “I janto i yɛrɛ la ani mɔgɔw kalanni la.”