Denbaya ka ko bolodalen​—Jɛkulu ka lajɛw

¹ Ni i ye Kerecɛn ye, ni denw b’i bolo, i b’a fɛ i denw ka kɔrɔbaya ka kɛ mɔgɔw ye minnu bɛ Jehowa kanu, minnu bɛ baara kɛ a ye, a laban na, minnu bɛna ɲɛnamaya banbali sɔrɔ diɲɛ kura kɔnɔ min layidu taara Ala fɛ. I bɛ se ka u dɛmɛ cogo di walisa u ka Jehowa ka bato bila jɔyɔrɔ fɔlɔ la u ka ɲɛnamaya kɔnɔ? A cogo bɛɛ la fɔlɔ ye e yɛrɛ ka misali ye. (Nt. 20:7) An balimamuso dɔ hakili bɛ a ba ka misali la. A ba ye seere ye. An balimamuso ko: ‘Cogo bɛɛ la, an tun bɛ taa lajɛw la mɛnɛ. Siga si tun tɛ o la.’ O ye nɔ bila ne la waatijan kɔnɔ.

² Jɛkulu ka lajɛw kun ye min ye, yala i ka denbaya ye o faamu wa? An bɛ dɔnniya min sɔrɔ o lajɛw la, siga t’a la ko o bɛ fanga di an ma walisa an ka Ala sago kɛ ka taga a fɛ. An bɛ jɛɲɔgɔnya min diyabɔ ni an balimaw ye lajɛw la, o fana ye fɛn nafamaba ye min bɛ dusu don an kɔnɔ. (Esa. 54:13; Rom. 1:11, 12) Nka, lajɛw bɛ kɛ kun belebele min kosɔn, o ye ka Jehowa tanu “jama cɛma.” (Zab. 26:12) Kerecɛn lajɛw b’a to an b’a jira ko an bɛ Jehowa kanu, ko an bɛ a bato.

³ “Aw ka aw yɛrɛ kɔlɔsi”: Kun senuma min bɛ an ka lajɛw la, ni an ye o faamu, o bɛna an bila an ka an yɛrɛ “kɔlɔsi” walisa an kana delinako ta dɔɔnin-dɔɔnin lajɛw ka fɔ an kɔ, k’a da kow kan minnu nafa ma bon ka lajɛw bɔ. (Efɛ. 5:15, 16; Heb. 10:24, 25) Ni i bɛ ka i ka denbaya ka ko bolodalen labɛn, i bɛ se ka fɔlɔ ka lajɛw kɛwaatiw sɛbɛn. O kɔ fɛ, i kɔlɔsi walisa fɛn wɛrɛw sen kana don lajɛ kɛwaatiw la. A ka kɛ ko jɛlen ye i bolo, ko ka taa lajɛw la, o de bɛ na fɛn bɛɛ ɲɛ i ka denbaya bolo.

⁴ Yala a tɛ fɛn dɔ kɛ an na, ni an b’a kalan ko an balimaw bɛ gɛlɛyabaw kunnasagon walisa ka taa lajɛw ni jamalajɛw la wa? Hali ni i tɛ o cɛsiriba ɲɔgɔnw kɛ walisa ka taa lajɛw la, o n’a ta o ta, i b’a sɔrɔ gɛlɛyaw fana bɛ i kan. Sitanɛ kosɔn, a bɛ ka gɛlɛya ka taga a fɛ Jehowa ka jamakulu ka a bato. Nka, e ni i ka sokɔnɔmɔgɔw jɔlen bɛ a kan ka cɛsiri minnu kɛ walisa ka taa jɛkulu ka lajɛw la, i ka da a la ko i denw bɛna o kɔlɔsi tigitigi. O cogo la, i bɛ se ka nilifɛn dɔ lase i denw ma alako ta fan fɛ, u tɛna ɲinɛ min kɔ abada.