Kuntilenna nafama an ka san kura kɔnɔna na min bɛ daminɛ Sɛtanburukalo la
1. I bɛ se ka mun kɛ i kuntilenna ye san kura kɔnɔ min bɛ daminɛ Sɛtanburukalo la?
1 Ni an b’a fɛ ka taa ɲɛ alako ta fan fɛ, an ka kan ka kuntilenna sigi. I y’a latigɛ ka mun ni mun kɛ an ka san kura kɔnɔna na min bɛ daminɛ Sɛtanburukalo la? Kuntilenna ɲuman dɔ ye ka kɛ tutigɛbaga farankan ye kalo kelen walima kalo caman kɔnɔ. Ikomi o baara ɲuman b’a wajibiya tuma caman na ka kɔn ka labɛn dɔw kɛ, sisan de y’a waati ɲuman ye ka labɛnw daminɛ. Munna i tɛna tutigɛbagaya farankan kɛ i kuntilenna ye?
2. Kun jumɛnw na an ka kan ka tutigɛbagaya farankan kɛ an kuntilenna ye?
2 Kun minnu na an bɛ kɛ tutigɛbaga ye: N’an ye tutigɛbaga farankan ye, o b’a to an ko bɛ diya an sankolola Fa ye, bawo an bɛ dɔ fara an ka waati kɛta kan cidenyabaara la. (1 Tes. 4:1) Jehowa ye ko minnu kɛ an ye, ni an bɛ miiri olu bɛɛ la, an dusukun b’an bila ka kuma Jehowa kan mɔgɔ wɛrɛw ye. (Zab. 34:1, 2) An bɛ sɔn ka bɔnɛ fɛn minnu dɔw la walisa ka se ka caman kɛ cidenyabaara la, Jehowa ɲɛ bɛ olu la, wa, o ka di a ye. (Heb. 6:10) Ni an b’a dɔn ko an ko ka di Jehowa ye, k’a sababu kɛ an ka baara gɛlɛn ye, o bɛ nisɔndiyaba de lase an ma.—1 Til. 29:9.
3, 4. An bɛ se ka kodumanw sɔrɔ tutigɛbagaya farankan baara la cogo jumɛn na?
3 Tuma caman na, ni an bɛ ko dɔ kɛ ka taa a fɛ, o ko kɛli bɛ nɔgɔya an ma ka taa a fɛ, wa, o ko bɛ diya an ye fana ka taa a fɛ. Ni an bɛ dɔ fara an ka waati kɛta kan cidenyabaara la, o b’a to a bɛ nɔgɔya an ma ka kuma mɔgɔw ka so da la. I bɛna baro daminɛ nɔgɔya la, ani i bɛna se fana ka baara kɛ koɲuman ni Bibulu ye. I dalen bɛ min na, n’i bɛ kuma kosɛbɛ o kan, i ka dannaya bɛna bonya o ko la. Mɔgɔ minnu tun tɛ Bibulukalanw ɲɛminɛ, olu caman sera k’o kɛ tuma min na u kɛra tutigɛbaga farankan ye.
4 Ni an ka bato bɛ kɛ k’a sɔrɔ an ma miiri, k’a sɔrɔ an dusukun tɛ o la, ko an b’o kɛ delinako dɔrɔn de la, tutigɛbagaya farankan bɛ se ka kɛ fɛn ye min b’an dɛmɛ ka o yɛlɛma. An balimakɛ dɔ min tun kɛra tutigɛbaga basigilen ye ka tɛmɛ, a nana ye ko a ye waati caman tɛmɛ kojugu a ka baara la. O la sa, a y’a latigɛ ka kɛ tutigɛbaga farankan ye kalo kelen kɔnɔ. A ko: “Ne ma se ka da a la ne ye fanga min sɔrɔ alako ta fan fɛ kalo kelen kɔnɔ! Ne y’a latigɛ ka kɛ tutigɛbaga farankan ye tuma bɛɛ, n’o y’a to ne labanna ka kɛ tutigɛbaga basigilen ye kokura.
5. Ni a b’an kɔnɔ ko an tɛ se tiɲɛ na ka kɛ tutigɛbaga farankan ye, an bɛ se ka mun kɛ walisa an kana miiri o cogo la tun?
5 Fɛn minnu bɛ se k’i bali, olu kɛlɛ: Mɔgɔ dɔw bɛ siga-siga ka kɛ tutigɛbaga farankan ye, bawo olu fɛ, u tɛ se kosɛbɛ waajuli kɛcogo ɲuman na. Ni e ɲɛ na, i tɛ se ka kɛ tutigɛbaga farankan ye k’a da o kan, Jehowa bɛ se k’i dɛmɛ k’o kɛ i n’a fɔ a ye Jeremi dɛmɛ cogo min na. (Jer. 1:6-10) Musa tun ‘tɛ se kuma la. A nɛnkun fana tun ka girin,’ nka o bɛɛ n’a ta, Jehowa y’a kɛ baarakɛminɛn ye walisa ka a sago tiimɛ. (Ek. 4:10-12) Ni a b’i kɔnɔ ko i tɛ se tiɲɛ na, Jehowa deli walisa a ka dusu don i kɔnɔ ka se k’o kɛ.
6. Hali ni a y’a sɔrɔ an man kɛnɛ, walima ko an bolodegunnen don kosɛbɛ, an bɛ se ka kɛ tutigɛbaga farankan ye cogo jumɛn na?
6 Yala i bɛ siga-siga ka kɛ tutigɛbaga ye bawo i tɛ kɛnɛbagatɔ ye walima ko fɛn caman de b’i bolo ka kɛ wa? Ni i ye lujuratɔ ye, n’i bɛ waajuli kɛ ka kɛɲɛ ni barika hakɛ ye, o bɛ se ka to i bɛ kɛ tutigɛbaga farankan ye. Ni i bolodegunnen don kosɛbɛ, i ka baara minnu nafa man bon kosɛbɛ, i bɛ se ka olu kɛ kalo wɛrɛ la. Mɔgɔ minnu bɛ baara kɛ baarakɛwaati bɛɛ la, olu fana bɛ se ka waati kunmabɔ ka kɛ tutigɛbaga farankan ye, ni u bɛ don kelen walima don fila kɔnze ta.—Kol. 4:5.
7. Ka Jehowa deli kosɛbɛ tutigɛbagaya farankanko la, munna o bɛ se k’an dɛmɛ?
7 I bɛna se k’o kɛ cogo min na: I ŋaniya fɔ Jehowa ye i ka deliliw kɔnɔ. I bɛ cɛsiri minnu kɛ walisa ka dɔ fara i ka cidenyabaara kan, a ɲini Jehowa fɛ a ka duba olu ye. (Rom. 12:11, 12) A bɛ se k’i dɛmɛ ka kow latigɛ ni hakilitigiya ye walisa i ka se ka i ka waati boloda cogoya wɛrɛ la. (Yak. 1:5) Ni a nege de t’i la ka kɛ tutigɛbaga ye, a ɲini Jehowa fɛ a k’i dɛmɛ ka nisɔndiya sɔrɔ waajuli baara la.—Luka 10:1, 17
8. N’i b’a kɛ i ko Ntalenw 15:22 b’a fɔ cogo min na, o bɛ se k’i dɛmɛ ka kɛ tutigɛbaga farankan ye cogo di?
8 E ni i ka denbaya ka kuma tutigɛbagaya farankan ko kan. (Nt. 15:22) Laala, denbaya kɔnɔmɔgɔ dɔ bɛna se ka kɛ tutigɛbaga ye ni tɔw y’a dɛmɛ. I ka o fɔ mɔgɔ wɛrɛw ye jɛkulu kɔnɔ, kɛrɛnkɛrɛnnenya la mɔgɔw ye minnu ka kow ni i taw ye kelen ye. O bɛ se ka tutigɛbagaya farankan nege don kosɛbɛ balimaw la.
9. I ye kalo jumɛnw sugandi walisa ka kɛ tutigɛbaga farankan ye?
9 I ye i ka cidenyabaara kow boloda cogo min na walisa k’olu kɛ san kura kɔnɔna na min bɛ daminɛ Sɛtanburukalo la, n’i bɛ ka olu lajɛ, tuma jumɛn de la i bɛna se ka kɛ tutigɛbaga farankan ye? Baara bɛ kɛ lɛrɛ minnu kɔnɔna na, ni i bɛ baara kɛ o lɛrɛ bɛɛ kɔnɔna na, walima ni i bɛ taa lakɔli la, i bɛ se ka miiri kalow la minnu kɔnɔna na donw bɛ yen minnu tɛ baara, walima ka miiri kalow la Sibiri duuru ni Kari duuru bɛ minnu na. Misali la, sibiri ni kari duuru bɛ Sɛtanburukalo, Desanburukalo, Marisikalo ani Utikalo la. Sibiri duuru bɛ Mɛkalo la ani kari duuru bɛ Zuwɛnkalo la. N’i tɛ kɛnɛbagatɔ ye, tuma caman na, waati ka ɲi kalo minnu na, i ka miiri o kalow ma. I bɛ se fana ka miiri ka kɛ tutigɛbaga farankan ye, kalo min na kafo lakɔlɔsibaga bɛna bɔ i ka jɛkulu ye. A bɛ i ka jɛkulu kɔnɔ waati min na, a bɛ lajɛ min kɛ ni tutigɛbaga basigilenw ye, i bɛna nisɔndiya sɔrɔ fana ka se ka na o lajɛ lɛrɛ tilancɛ fɔlɔ kɔnɔ. Ikomi Hakilijigin bɛ bɛn san wɛrɛ Marisikalo tile 22 ma, Marisikalo, Awirikalo ani Mɛkalo ye kalo ɲumanw ye walisa ka kɛ tutigɛbaga farankanw ye. I b’a fɛ ka kɛ tutigɛbaga ye kalo min na walima kalo minnu kɔnɔna na, n’i ye o kalow sugandi ka ban, i ka porogaramu dɔ sɛbɛn min b’a to i bɛna se ka lɛrɛ ɲininen kɛ.
10. Ni i tɛ se ka kɛ tutigɛbaga farankan ye, an bɛ se ka mun kɛ?
10 Hali ni a bɛ i kɔnɔ k’i tɛ se ka kɛ tutigɛbaga farankan ye san kɔnɔna na min bɛ daminɛ Sɛtanburukalo la, o bɛɛ n’a ta i bɛ se ka to timinandiya la foro cidenyabaara la. I k’i seko damajira kɛ ka taa a fɛ. I ka da a la tigitigi ko i bɛ ka i seko damajira min kɛ Jehowa ka baara la, o ka di Jehowa ye kosɛbɛ. (Gal. 6:4) Mɔgɔ minnu bɛ se ka kɛ tutigɛbaga farankan ye, olu kɔkɔrɔdon ani dusu don u kɔnɔ. Laala, i bɛna se ka yɛlɛma don i ka kow bolodalen na walisa ka se ka cidenyabaara kɛ mɔgɔw fɛ minnu kɛra tutigɛbaga farankan ye, dɔgɔkun don wɛrɛ la, ka fara i bɛ deli ka waajuli kɛ don minnu na.
11. Munna an ka kan ka a to an hakili la ko waati min tora ka baara kɛ, o tɛ bɛrɛ ye?
11 Jehowa ka jamakulu b’a faamu ko an bɛ waati min na sisan, an ka kan k’an teliya an ka baara la. Baara b’an bolo ka kɛ, n’o ye kibaru duman waajuli ye. Mɔgɔw niw b’a da fɛ, wa, waati min tora ka o kɛ, o surunyara. (1 Kɔr. 7:29-31) Ala kanuya ani an mɔgɔɲɔgɔn kanuya bɛna an bila ka an seko bɛɛ kɛ cidenyabaara la. Ni an b’an cɛsiri kosɛbɛ, ani ni an bɛ an ka kow boloda koɲuman, an bɛ se ka kɛ tutigɛbaga farankan ye, kalo kelen walima kalo caman kɔnɔ san kura nata kɔnɔna na, min bɛ daminɛ Sɛtanburukalo la. O ye kuntilenna nafama ye tiɲɛ na.