Jehowa Seerew ka san 2007 Kafoba ka jamalajɛ min tɔgɔ ye ko “Aw ye tugu Krisita kɔ!”
1, 2. (a) Musa ye dusu don Israɛl denw kɔnɔ cogo jumɛn na walisa u ka nafa sɔrɔ lajɛw la? (b) An ka kan ka labɛn jumɛnw daminɛ kabini sisan?
1 Musa ye ci di Israɛl denw bɛɛ ma ani mɔgɔw fana ma minnu nana sigi Israɛl denw fɛ, ko u ka ɲɔgɔn lajɛ san wolonwula o san wolonwula, walisa Sariya ka kalan u ye. Kun jumɛn na? “Walisa u ka i lamɛn, walisa u ka dege.” (Dut. 31:10-12) Jehowa y’a ye ko a nafa ka bon jamakulubaw k’u lajɛ. Yanni dɔɔnin cɛ, Jehowa ka jamakulu bɛna ɲɔgɔn lajɛ kokura Kafoba ka jamalajɛ la min tɔgɔ ye ko “Aw ye tugu Krisita kɔ!”
2 Yala i ye labɛnw daminɛ wa? I mago b’a la ka donw ɲini i ka patɔrɔn fɛ wa? Yala i ye warimara daminɛ walisa ka se k’i ka taransipɔri wari sɔrɔ ani k’i ka dumuni sɔngɔ ani fɛn nafama wɛrɛw wari sɔrɔ i mago bɛna kɛ minnu na wa? I bɛ se k’i ka Bibulu kalandenw walima i ka sokɔnɔmɔgɔw dɛmɛ u ka se ka na i fɛ jamalajɛ la wa? Yala jɛkulu kɔnɔmɔgɔ dɔw bɛ yen minnu mago bɛ dɛmɛ na walisa u ka na jamalajɛ la wa? I y’a boloda ka taa jamalajɛ wɛrɛ la min tɛ jamalajɛ ye i ka jɛkulu bilara ka taa min na wa? I mago bɛ jiginyɔrɔ la, walima soden na lotɛli la, walima o fɛn sugu wɛrɛ la wa? Kunnafoni nata bɛna i dɛmɛ i ka se k’i labɛn.
3. (a) Esayi 25:6 bɛ ka tiimɛ cogo jumɛn na bi? (b) Mun de kɔlɔsira ka ɲɛsin kafoba ka jamalajɛ don fɔlɔ mɔgɔ nataw ma, wa, an kelen-kelen bɛɛ ka kan ka mun kɛ?
3 I ka na jamalajɛ don kelen-kelen bɛɛ la: Jehowa bɛ dumuni camanba de di a ka jamakulu ma. (Esa. 25:6) An ka san o san jamalajɛw sen bɛ o dumuni camanba la. A kɔlɔsira ko mɔgɔ minnu bɛ na kafoba ka jamalajɛ don fɔlɔ la, olu hakɛ jiginna kosɛbɛ ka tɛmɛ jamalajɛ don tɔw kan. Jehowa ka jɛkuluba ye jamalajɛ min labɛn an ye, a kɛ i kuntilenna ye ka na a don kelen-kelen bɛɛ la minnu bɛna i barika bonya. Ni i ka kan ka donw ɲini i ka baarakɛyɔrɔ la walisa ka se ka na jamalajɛ la, i ka Jehowa deli o ko la. O kɔfɛ, ni kafoba ka jamalajɛ donw fɔra dɔrɔn, ‘i ja gɛlɛya’ ka donw ɲini i ka kuntigi fɛ. (1 Tes. 2:2; Neh. 2:4, 5) Nafa bɛ se ka kɛ a la i k’a ɲɛfɔ a ye ko i ka jamalajɛ min bɛ kɛ san o san, o ye i ka bato kɔnɔko dɔ ye. Ka kɔn k’o kɛ, o bɛ se ka nɔgɔya a bolo a ka yɛlɛmaw kɛ walisa a ka se ka i ka don ɲininen di i ma.
4. An ka Bibulu kalandenw, ani an ka sokɔnɔmɔgɔ minnu tɛ Jehowa Seerew ye, an bɛ se ka olu labɛn kafoba ka jamalajɛ kama cogo di?
4 I ka Bibulu kalandenw ni i ka denbaya labɛn: N’i ka Bibulu kalandenw bɛ i kɛrɛfɛ jamalajɛ la, wa, ni “jamaba cɛma,” olu yɛrɛ ɲɛ b’a la Kretiɛnw bɛ ɲɔgɔn kanu cogo min na u ka balimaya kɔnɔna na, o bɛna nisɔndiyaba lase i ma dɛ! (Zab. 22:26) I ka jamalajɛ kuma fɔ u ye joona walisa u ka donw boloda o kama. Kun minnu na a ka di e yɛrɛ ye ka na kafoba ka jamalajɛw la, i ka o kunw fɔ u ye. I bɛ se ka Bibulu kalandenw labɛn u k’a dɔn u bɛ se ka sigi ni min ye jamalajɛ ko la. Cogo di? N’i bɛ wideyow jira u la, Kafoba ka jamalajɛ tɛmɛnenw jaw bɛ minnu na, kɛrɛnkɛrɛnnenya la, wideyo min tɔgɔ ye ko L’enseignement divin (Kalan min bɛ bɔ Ala yɔrɔ). I ye min boloda kafoba ka jamalajɛ ko la, o fɔ i ka sokɔnɔmɔgɔw fana ye minnu tɛ Jehowa Seerew ye. Laala, olu yɛrɛ bɛ se ka fɛɛrɛ tigɛ walisa ka na daramu lajɛ, walima ka na i fɛ kafoba ka jamalajɛ don kelen ɲɔgɔn na.
5. An bɛ se ka tɛgɛ labila jira cogo di i ko a fɔlen bɛ cogo min na 1 Timote 6:17, 18 la?
5 I balimakɛw n’i balimamusow dɛmɛ: Ciden Paul ye laadilikan di Kretiɛnw ma minnu tun ye nafolotigiw ye ka se ka mɔgɔw wɛrɛw dɛmɛ, ko ‘u ka ko ɲuman kɛ, u ka nafolotigiya ka kɛ kɛwale ɲumanw kɛli ye. U ka nili kɛ teliya la, ka u tɛgɛw labila.’ (1 Tim. 6:17, 18) Ciden Paul ye tɛgɛ labila min jira, an bɛ se ka o ɲɔgɔn jira ni an bɛ jɛkulu kɔnɔmɔgɔw ka cogo lajɛ, i n’a fɔ sijɛw, lujuratɔw, minnu bɛ cidenyabaara kɛ waati dafalen na, minnu kelen bɛ u ka denbaya ladon, laala fana jɛkulu kɔnɔmɔgɔ wɛrɛ minnu mago bɛ se ka kɛ dɛmɛ na walisa ka na jamalajɛ la. O mɔgɔ minnu kofɔlen bɛ nin ye, olu somɔgɔ minnu ye Jehowa Seerew ye, olu de ka kan ka kɛ mɔgɔ fɔlɔw ye k’u dɛmɛ. Nka, maakɔrɔw ni mɔgɔ wɛrɛw bɛ se ka o mɔgɔw ka kow lajɛ walisa k’a dɔn ni u ni dɛmɛ ka kan, wa, o kɔfɛ ka dɛmɛ don ka kɛɲɛ ni u magow ye.—Gal. 6:10; 1 Tim. 5:4.
6. Fɛɛrɛ jumɛnw de tigɛra mɔgɔ dɔw dɛmɛni kama minnu mago bɛ se ka kɛ jatigila la?
6 Mɔgɔ caman bɛ se ka fɛɛrɛw kɛ ka jatigila sɔrɔ u yɛrɛw ye Kafoba ka jamalajɛw la. O bɛɛ n’a ta, jɛkulu kɔnɔmɔgɔ dɔw bɛ yen minnu mago bɛ dɛmɛ na walisa ka jiginyɔrɔ sɔrɔ. Jɛkulu-ka-baara komite ka kan k’a lajɛ ni o mɔgɔw bɛ se ka Demande de chambre pour cas particuliers sɛbɛnfura lafa. Kunnafoni minnu bɛ o sɛbɛnfura kɔnɔ, ani minnu bɛ san 2007 Utikalo lɛtɛrɛ kɔnɔ min cira maakɔrɔkuluw ma, o ka kan ka lajɛ fɔlɔ sani ka o sɛbɛnfura ci jamalajɛ komite ma min b’a mago don jiginyɔrɔko la Kafoba ka jamalajɛw la. O sɛbɛnw man kan ka ci tɔn bolofara ma, nka o bɛ ci lakɔlɔsibaga ma min bɛ a mago don jiginyɔrɔko la.
7. Kunnafoni jumɛnw de dilen bɛ i ka kan ka tugu minnu na, n’i ka kan ka taa jamalajɛ wɛrɛ la min tɛ jamalajɛ ye i ka jɛkulu bilara ka taa min na?
7 N’i bɛ taa jamalajɛ wɛrɛ la: Kafoba ka jamalajɛ minnu bɛna kɛ tubabukan na, o jamalajɛw bɛɛ sɛbɛnnen bɛ san 2007 Marisikalo tile fɔlɔ La Tour de Garde kɔnɔ. A ɲininen bɛ aw fɛ aw ka taa jamalajɛ la a ka jɛkulu bilara min na, walisa sigiyɔrɔw ka sɔrɔ minnu bɛ bɔli kɛ ani gafew ani jiginyɔrɔw ani o ɲɔgɔnna wɛrɛw. O n’a ta o ta, ko dɔw bɛ se ka wajibiya i ka taa kafoba ka jamalajɛ wɛrɛ la, i n’a fɔ, sɛgɛnlafiyɛn bolodalen dɔ, walima ko wɛrɛw. N’i b’a fɛ i ka jiginyɔrɔko ka ɲɛnabɔ i ye, walima n’i mago bɛ kunnafoni wɛrɛw la jamalajɛ wɛrɛ ko la min tɛ jamalajɛ ye, i ka jɛkulu bilala ka taa min na, i bɛ se ka lɛtɛrɛ ci o yɔrɔ kafoba ka jamalajɛ komite ma. Walisa ka o yɔrɔ ladɛrɛsi sɔrɔ, i ka jɛkulu bilara ka taa jamalajɛ min na, i ka jɛkulu sɛbɛnnikɛla bɛ se ka o jamalajɛ komite mɔgɔ dɔ ɲininka. Walisa kafoba ka jamalajɛ komite ka se k’i ka lɛtɛrɛ jaabi, a sɛgɛsɛgɛ ko i ka lɛtɛrɛ foroko kɔnɔ, i ye lɛtɛrɛ foroko dɔ wɛrɛ bila o kɔnɔ, i ka ladɛrɛsi sɛbɛnnen bɛ min kan, ani tɛnburu nɔrɔlen bɛ min kan fana.
8, 9. (a) Baara jumɛnw de kɛra an ye sani an ka se jamalajɛ kɛyɔrɔ la? (b) Ka ɲɛsin o baaraw ma minnu kɛra an kosɔn, an bɛ se k’a jira ko an bɛ nafa don o baaraw la, ani ko waleɲumandɔn bɛ an na o ko la, cogo di? (Heburuw 13:17 kalan.)
8 I ka kɛ i n’a fɔ fɛɛrɛw tigɛra cogo min na: Ni an sera jamalajɛ kɛyɔrɔ la, a jɛlen don ko baara camanba de kɛra walisa ka an nali labɛn. An balimakɛ minnu bɛ mɔgɔw kunbɛn, kanuya bɛ u la, wa u b’an fo ni nisɔndiya ye, ka porogaramu di an ma, ka tila k’an dɛmɛ ka sigiyɔrɔ sɔrɔ. An balimakɛw ni an balimamuso dɔw de ye jamalajɛ kɛyɔrɔ saniya. Mɔgɔw bɛ jɔ yɔrɔ min na ka kuma, u ye o yɔrɔ fana labɛn k’o cɛɲɛ kosɛbɛ. Baaraw de kɛra fana, jamalajɛ tɛ taa min kɔ, ani sutura la, walisa ka porogaramu yɔrɔw labɛn, ka lotɛliko ɲɛnabɔ, ani ko caman wɛrɛw.
9 Kafoba ka jamalajɛ kelen-kelen bɛɛ la, mɔgɔ caman de ye baara kɛ kalo caman kɔnɔ walisa ka labɛnw kɛ minnu ka kan. U ka denbaya fana ye u ta kɛ u kɛlen k’a waati to o mɔgɔw bolo walisa u ka u mago don nin ko nafamaw la. O mɔgɔw ye o sɛgɛn ni o degun minnu kun an kelen–kelen bɛɛ ka nafa kama, yala o nafa man bon an bolo wa? An bɛ se ka an ka waleɲumandɔn jira cogo jumɛn na? N’an b’a kɛ i ko a fɔra an ye cogo min na nin barokun kɔnɔ, ani n’an bɛ tugu kunnafoni wɛrɛw fana kɔ minnu bɛ se ka di an ma sani jamalajɛ ka kɛ. (Heb. 13:17) N’an kelen-kelen bɛɛ b’a kɛ i ko a fɔra cogo min na, o b’a to fɛn bɛɛ bɛ “kɛ cogo bɛnnen na, a ko ɲɛnabɔlen koɲuman.”—1 Kɔr. 14:40.
10. An bɛ se ka dɔ fara kafoba ka jamalajɛ nata nisɔndiya kan sira jumɛn fɛ?
10 An mago bɛ dɛmɛbagaw la: Yesu ye misali dafalen jira an na min ye k’a kɔlɔsi mɔgɔ wɛrɛw mago bɛ min na, ka tila ka o mɔgɔw mago ɲɛ ni majiginnenya ye. (Luka 9:12-17; Yuhana 13:5, 14-16) Mɔgɔ minnu nana u yɛrɛ ma walisa ka baara kɛ kafoba ka jamalajɛw la, olu fana ye o hakili ɲuman sugu jira. Kafoba ka jamalajɛ min bɛ kɛ an ka yɔrɔ la, olu komitew bɛna balima wɛrɛw wele sɔɔni walisa u ka baara kɛ ɲɔgɔn fɛ. O kun ye ka jamalajɛ baaradaw mago ɲɛ. Kɛrɛnkɛrɛnnenya la, u mago bɛ maakɔrɔw la minnu b’a fɛ ka dɛmɛ don u yɛrɛ ma, n’u bɛ sɔn fana ka baaraw kɛ minnu bɛna di u ma. Ikomi maakɔrɔw bɛ sɔn u yɛrɛ ma, ani ni nisɔndiya ye ka o baaraw kɛ, u bɛ hakili ɲuman misali de jira bɛɛ la jɛkulu kɔnɔ.—1 Pi. 5:2, 3.
11. An bɛ se ka kɛ seereya ɲuman ye an ka kafoba ka jamalajɛ la cogo di?
11 Mɔgɔ wɛrɛw bɛ min ye: Kibaru duman diyara mɔgɔ dɔ ye min y’a fɔ don dɔ ko: “A san caman de filɛ ko ne bɛ na aw ka jamalajɛw la, wa ne y’a ye ko danfara jɛlen de bɛ aw ni mɔgɔ tɔw cɛ minnu sen tɛ aw ka jɛkuluba la. Jamalajɛ tɔgɔ fɛ, ne y’a faamu koɲuman bi, kun min na aw taamacogo ni tɔw ta tɛ kelen ye hali dɔɔnin. O y’a to aw ko diyara ne ye, wa, o ye dusu don ne kɔnɔ walisa ne ka n jija ka kɛ aw ka jɛkuluba kɔnɔmɔgɔ dɔ ye.” Laala i taamacogo ɲuman de y’a to nin kuma fɔra. E ka miiri a bɛ min kɛ Jehowa la ka an ye ka o tanuli sugu lase a ma! —1 Pi. 2:12.
12.(a) Munna Jehowa ka jamakulu ka jamalajɛw nafa ka bon kosɛbɛ an ka waati la? (b) An kelen-kelen bɛɛ bɛ se ka mun kɛ kabini sisan?
12 Ni don bɛ ka ‘surunya’ ka taa a fɛ, jamalajɛw nafa fana bɛ bonya ka taa a fɛ. (Heb. 10:25) Jɔnkɛ dannamɔgɔ hakiliman bɛ kunnafoniw di an ma an ka Kretiɛn jamalajɛw la walisa k’an dɛmɛ ka “kumaw bɛɛ mara ka u kɛ,” Jehowa b’a fɛ an ka tugu kuma minnu kɔ. (Dut. 31:12) Labɛnw daminɛ kabini sisan walisa ka na Kafoba ka jamalajɛ don kelen-kelen bɛɛ la, min tɔgɔ ye ko “Aw ye tugu Krisita kɔ.” O cogo la, kalan min bɛna kɛ alako ta fan fɛ, i bɛna nafa sɔrɔ o kuuru bɛɛ la, i bɛna jɛɲɔgɔnya fana diyabɔ min ka di kosɛbɛ.