Aw ka waajuli kɛ ani ka seereya kɛ ka dafa
1 Iko “u ka kuntigi ni u ka ci fɔbaa,” Yesu ye a ka kalandenw labɛn waajuli baaraba de kama min tun bɛ u ɲɛ. (Esa. 55:4; Luk. 10:1-12; Kɛw. 1:8) Yesu ye baara min don u bolo, ciden Piɛrɛ ye o ɲɛfɔ nin cogo la: “Yesu y’a fɔ an ye ko an ka mɔgɔw waaju k’a jira u la k’a jɛya ko Ala ye min sigi ka kɛ ɲɛnamanw ni suw kiritigɛla ye, o ye ale de ye.” (Kɛw.10:42) Ka seereya kɛ ka dafa, o bɛ kɛ cogo di?
2 An bɛ se ka fɛn caman kalan ni an ye ciden Pol ka misali jateminɛ. A ni Efese jɛkulu maakɔrɔw kɛlen ka ɲɔgɔn lajɛ, a y’u hakili jigin ko: ‘Fɛn o fɛn tun ye nafama fɛn ye, ne tun tɛ ne yɛrɛ bali ka o fɔ aw ye, i n’a fɔ ne ma ne yɛrɛ bali ka aw kalan kɛnɛ kan ani du ni du . Nka, ne ye seereya dafalen di Yahutuw ni Gɛrɛkiw fana ma, nimisa ko la, ka na Ala ma ani ka limaniya da an Matigi Yesu kan.’ Hali ni a yɛrɛ tun bɛ ka gɛlɛyaw kun, Pol tun bɛ baaraba kɛ ka kibaru duman lase mɔgɔ caman ma. A tun t’i wasa ni tiɲɛ bakurunba fɔli dɔrɔn ye a lamɛnbagaw ye, nka a tun bɛ baaraba kɛ ka “Ala ka laadilikan bɛɛ” fɔ u ye. Walisa ka o matarafa, a tun labɛnnen don ka a cɛsiri ani ka a yɛrɛdi. A sera yɛrɛ k’a fɔ ko: ‘O bɛɛ n’a ta, ne tɛ ne ni jate fɛn ye, a bɛ i n’a fɔ fosi tɛ, janko ne ka se ka ɲɔgɔndan boli ban, ani ne ye cidenyabaara min sɔrɔ ka bɔ Matigi Yesu yɔrɔ, ka Ala ka nɛɛma kibaru duman seereya kɛ ka dafa.’—Kɛw. 20:20, 21, 24, 27.
3 An bɛ se ka Pol ka misali ladege cogoya jumɛn na bi? (1 Kɔr. 11:1) Ni an bɛ to ka mɔgɔ kelen-kelen bɛɛ ɲini, ani denbayaw, minnu ni dɛmɛ ka kan, hali ni degunw ɲɛsinnen bɛ an yɛrɛw ma, k’an seko bɛɛ kɛ ka kibaru duman lase siya suguya bɛɛ mɔgɔw ma, ani kan sifa bɛɛ fɔbagaw ma ani n’an b’an timinandiya ka an ka mɔgɔ sɔrɔlenw dɛmɛ u ka ɲɛtaa sɔrɔ. (Mat. 10:12, 13) O tɛ ɲɛ fo an ka waati ta o kama, k’an jija, ani ka kanuya ta ka ɲɛsin an mɔgɔɲɔgɔn ma.
4 Yali i bɛ se ka kɛ tutigɛbaga farankan ye wa? Marisikalo ani Awirilikalo tun na se ka kɛ waati bɛnnen ye walisa ka seereya kɛ ka dafa, ni i kɛra tutigɛbaga farankan ye. Salon, balima caman minnu sera k’u cɛsiri kɛrɛnkɛrɛnneya la ka kɛ tutigɛbaga farankanw ye, o kɛra dusudon ko ye haali!
5 An balimamuso dɔ si tun ye san 80 ye, wa a ka banaw tun ka ca fana. Jehowa ka jɛkuluba bɛ dusu min don an kɔnɔ, o ye a bila a ka wale kɛ. A y’a sɛbɛn ko: “A nege min tun bɛ ne na kabini tuma jan, o ye o nege bonya ne na ka ne bila ka miiri ko ne ka kan ka kɛ tutigɛgaba farankan ye kokura, hali ni a kɛra siɲɛ kelen ye.” A y’a latigɛ ka kɛ tutigɛbaga farankan ye Marisikalo la. A ko: “Ne ye fɛn fɔlɔ min kɛ, o kɛra ka sigi ka kow jateminɛ. Ne ye o fɔ ne denmuso ye katuguni ne mago tun bɛna kɛ a ka dɛmɛ na. A ye ne kabakoya a kɛtɔ ka tutigɛbaga farankan baara ɲinisɛbɛnfura dɔ fana sɔrɔ.” An balimamuso kɔrɔnin ye lɛrɛ 52 kɛ cidenyabaara la o kalo la. “Ni ne y’a ye tuma o tuma ko ne tun sɛgɛnna, ne bɛ Jehowa deli siɲɛ caman o waatiw la walisa a ka dɔ fara ne barika kan. Kalo sara tuma min na, ne tun nisɔndiyara kosɛbɛ, ka wasa kosɛbɛ fana. Ne ye barika da Jehowa ye siɲɛ caman bawo a ye ne dɛmɛ. Ne b’a fɛ ka kɛ tutigɛbaga farankan ye kokura.” A ka cɛsiri ye hɛrɛ min lase a ma, o bɛna dusu don mɔgɔ wɛrɛw kɔnɔ minnu b’a fɛ tiɲɛ na ka kɛ tutigɛbaga ye, nka ni bana sɛbɛ bɛ u la.
6 An balimakɛ dɔ bilala ka bɔ baara la. A tun sigilen tɛ n’o ye. Nka, a ye o kɛ sababu ye walisa ka kɛ tutigɛbaga farankan ye. Ikomi donw tun bɛ ka tɛmɛn, a ka cɛsiri fana tun bɛ ka bonya waajuli baara la. Kalo ban tuma na, a ye Bibulu kalan kura dɔ daminɛ. A tɛmɛnna o ko min fɛ, a miirila o la, k’a fɔ ko: “A kɛra baraji kalo ye!” A nisɔndiyara kosɛbɛ ka Jehowa ka ɲɛminɛ ni a ka dɛmɛ sɔrɔ. Ɔwɔ, Jehowa ye hɛrɛ caman lase a ma bawo a y’a cɛsiri kosɛbɛ cidenyabaara la. Siga t’a la, a bɛna o ɲɔgɔn kɛ e fana ye. —Mal. 3:10.
7 Ka kɛ tutigɛbaga farankan ye, o tɛ ko nɔgɔn ye mɔgɔ caman bolo. O bɛɛ n’a ta, hali k’a sɔrɔ u bɛ u jɔyɔrɔ fa baarakɛyɔrɔ la, ani denbaya kɔnɔ, ka fara u yɛrɛw kunkow kan, balimakɛw ni balimamuso caman sera ka kɛ tutigɛbaga ye. Ka seereya kɛ k’a dafa, tuma caman na, o tɛ kɛ ni an m’an ka waati ani an fanga di ka kɛ saraka ye, nka an bɛ baraji minnu sɔrɔ o la, olu ni fɛn fosi tɛ se ka suma ɲɔgɔn ma. Nta. 10:22.
8 Marisikalo ni Awirilikalo ye waati ɲuman ye walisa ka kɛ tutigɛbaga farankan ye. Sibiri don ani kari don 5 de bɛ Marisikalo la. Ka waajuli kɛ o donw na, ani wuladaninw fɛ, o bɛ se k’a to minnu bɛ baara kɛ baarakɛwaati bɛɛ la, olu dɔw ka se ka kɛ tutigɛbaga farankan ye. Ka fara o kan, baara tɛ kɛ don minnu na Awirilikalo la, i bɛ se ka waajuli kɛ o donw fana na. Kalanbilawaati ni kɔnze kɔnɔna bɛ se ka dɔw dɛmɛ u ka lɛrɛ wajibiyalen 50 dafa. Walisa ka lɛrɛ 50 kɛ foro baara la Marisikalo walima awirilkalo la, a mafilɛ n’i bɛ se ka baara kɛ ni tutigɛbaga farankan ka baara waatibolodacogo dɔ la kelen ye min jiralen bɛ nin barokun kɔnɔ. E ni mɔgɔ wɛrɛw ka kuma i ka waatibolodacogo kan. Siga t’a la, o bɛna dusu don dɔw kɔnɔ u ka fara i kan cidenyabaara la. Ni i tɛ se ka kɛ tutigɛbaga farankan ye, kuntilenna kɛrɛnkɛrɛnnen sigi o kalow kama, wa, minnu bɛ se ka kɛ tutigɛbaga ye, e ni olu ka baara kɛ ɲɔgɔn fɛ. I k’i ka kow labɛn kabini sisan walisa ka se ka waajuli kɛ kosɛbɛ Marisikalo ni Awirilikalo la.
9 I ka waleɲumandɔn jira Hakilijigin ko la: San o san, Hakilijigin waati la, waleɲumandɔn ka ɲɛsin kunmabɔli ma, o bɛ mɔgɔ ba caman bila u ka ‘waati kunmabɔ’ walisa ka kɛ tutigɛbaga farankan ye. (Efɛ. 5:15, 16) Salon, Senegali ni Mali la, mɔgɔ 230 kɛra tutigɛbaga farankanw ye Marisikalo la, ani mɔgɔ 75 kɛra a ye Awirilikalo la. O makɛɲɛ ye 153 ye. O hakɛ ka ca kosɛbɛ ka tɛmɛn 25 kan, o min ye mɔgɔw hakɛ mankan ye minnu kɛra tutigɛbaga farankan ye, kalow kɔnɔ minnu tɛmɛnna yanni kalo fila kofɔlen ka se. Nin Hakilijigin waati bɛ cogo ɲuman di an ma walisa k’a jira waleɲumandɔn lakika min b’an na ka ɲɛsin Kirisita ka kunmabɔ saraka ma. An b’o jira an kɛtɔ ka dɔ fara an niyɔrɔ kan foro cidenyabaara la.
10 Ikomi Awirilikalo tile16 surunyara, Hakilijigin kɔrɔ ye min ye i bolo, i miiri o la. Taasi ni fɛnw kan: ko minnu nana ni Kirisita ka saya ye, ani fɛn minnu bɛɛ tun bɛ a dusukun ni a hakili la, ni olu tun ye haminankoba ye a bolo, ani nisɔndiya min tun bɛ a ɲɛ, ani o nisɔndiya y’a dɛmɛ cogo min na a ka minɛkojuguya kun. I ka miiri fana a jɔyɔrɔ la sisan. Ale de ye jɛkulu Kuntigi ye. Ka mɔgɔw kɛ kalanden ye, ani ka waajuli kɛ, a bɛ ka o baaraw kɔlɔsi. (1 Kɔr. 11:3; Heb. 12:2; Jir. 14:14-16) An ka waleɲumandɔn jira ka ɲɛsin o fɛnw bɛɛ ma, Kirisita ye o minnu kɛ. An ka an seko kɛ waajuli baara la, ka dafa.
11 Dusu don tɔw kɔnɔ u ka seereya kɛ k’a dafa: Ni maakɔrɔw ni cidenyabaara magannaw bɛ tutigɛbagaya farankan baara kɛ, u bɛ cogo ɲuman sɔrɔ ka dusu don jɛkulu kɔnɔmɔgɔ tɔw kɔnɔ. Ni u ni weleweledalaw bɛ baara kɛ ɲɔgɔn fɛ foro cidenyabaara la, ni u bɛ taa bɔ fana weleweledalaw ye u ka lakɔlɔsili baara kɔnɔna na, olu yɛrɛw bɛ cogo ɲumanw sɔrɔ ka weleweledala tɔw dɛmɛ u ka u niyɔrɔ baara kɛ ka dafa nin waati kɛrɛnkɛrɛnnen na. An kelen-kelen bɛɛ k’a lajɛ delili kɔnɔ, ni an bɛ se ka kɛ tutigɛbaga farankan ye. O cogo la, dɔ na fara cɛsiri bɛɛ lajɛlen barika kan minnu bɛ kɛ walisa ka seereya kɛ ka dafa.
12 Fɛɛrɛ minnu tigɛra walisa ka dɔ fara baara kan Marisikalo ni Awirilikalo la, maakɔrɔ bɛɛ ani cidenyabaara maganna bɛɛ lajɛlen bɛna baara kɛ ka kɛɲɛ ni o fɛɛrɛw ye. Nka, baara lakɔlɔsibaga ka kan kɛrɛnkɛrɛnnenya la, ka fɛɛrɛ bɛnnen tigɛ kibaru duman waajuli baara kama. Forobaara lajɛw bɛ kɛ yɔrɔ minnu na, ani don minnu na, a ka kan ka olu latigɛ. Lɛrɛ minnu na u bɛna kɛ, ni o lɛrɛw bɛ bɛn weleweledala fanbaw ma, a bɛna olu fana sigi sen kan. A bɛna fɛɛrɛ tigɛ walisa o lɛrɛw ka fɔ baara ka lajɛw caman na. Labɛnw bɛ se ka kɛ walisa weleweledalaw ka se ka ɲɔgɔn sɔrɔ siɲɛ caman, tile kɔnɔna na walisa jɛkulu mɔgɔw bɛɛ ka se k’u niyɔrɔ kɛ seereya kɛcogo caman na, i n’a fɔ jagokɛyɔrɔ la, nbɛdaw la, du ni du, telefɔni fɛ, ani ka segin-ka-bɔnyew kɛ. Ka fara o kan, a bɛna fɛɛrɛ tigɛ fana walisa sɛbɛnw, sɔn-ni-sɔn gafeninw ni waajulikɛyɔrɔ caman ka sɔrɔ o kalo fila kɔnɔna na.
13 Marisikalo la, gafe jirata bɛna kɛ Dɔnniya gafe ye, k’an kuntilenna kɛ Bibulu kalanw daminɛni ye. Hakilila ɲuman minnu bɛ a jiracogo kan, olu ɲɛfɔlen bɛ Zanwuyekalo An ka Masaya Cidenyabaara san 2002 farankan kɔnɔ. Awirilikalo sɛbɛn jirataw ye La Tour de Garde ni Réveillez-vous! ye. I k’i jija ka baara kɛ ni hakilila dilenw ye sɔn-ni-sɔn gafeninw jiracogo kan. An bɛɛ ka kan ka waati ta ka an labɛn koɲuman walisa ka seereya kɛ ka dafa.
14 Dugawu don an bɛɛ bolo ka baara kɛ jɛkulu kuntigi, Kirisita Yesu ka ɲɛminɛ jukɔrɔ, ka bonya sɔrɔ ka kibaru duman fɔ tɔw ye. Ikomi Marisikalo ni Awirilikalo bɛ ka surunya, an ka an cɛsiri kokura ka ni kalo filaw kɛ kalow ye minnu ɲɔgɔn tɛ, min ye ka tugu Kirisita ka ci fɔlen kɔ, n’o ye ka waajuli kɛ, ani ka seereya kɛ ka dafa.
[Box on page 4]
Waatibolodacogo caman walisa ka tutigɛbagaya farankan baara kɛ Marisikalo ni Awirilikalo la san 2003
Don Lɛrɛw
Ntɛnɛn 1 2 — — 2 —
Tarata 1 — 3 — — —
Araba 1 2 — 5 — —
Alamisa 1 — 3 — — —
Juma 1 2 — — — —
Sibiri 5 4 3 5 6 7
Kari 2 2 3 2 2 3
Marisikalo 56 56 54 55 50 50
Awirilikal o 50 50 51 53 — —
Yali nin waatibolodacogow dɔ la kelen bɛ bɛn i ma wa?