Yala i bɛ Ala ka Kuma lafasa wa?

¹ Bi, mɔgɔ caman b’a fɔ ko Bibulu bɛ min fɔ o tɛ tiɲɛ ye. Nka, Kretiɛn lakikaw bɛ Ala ka kuma lafasa ni timinandiyaba ye. Ikomi an dalen b’a la ko “kitabu kuma bɛɛ kɛra . . . Ala dafiɲɛ fɛ,” Yesu Krista ye min fɔ a ka delili kɔnɔ Jehowa ma, an sɔnna o la. A ko: “I ka kuma ye tiɲɛ ye.” (2 Tim. 3:16; Yuh. 17:17) An bɛ se ka Ala ka Kuma lafasa ka ɲɛ cogo di?

² I jija ka Bibulu tɛmɛsira damadɔw dɔn: Siga t’a la ko Yesu ye Ala ka kuma kalan koɲuman k’o faamu. O de y’a to Yesu sera ka mɔgɔw kalan Ala ka Kuma la a ka cidenyabaara bɛɛ kɔnɔna na. (Luka 4:16-21; 24:44-46) An bɛ se ka mun kɛ walisa Bibulu tɛmɛsira caman ka to an hakili la? An ka Bibulu kalan don o don, ani Bibulu tɛmɛsira min bɛ dusu don mɔgɔ kɔnɔ kɛrɛnkɛrɛnnenya la, walima min nafa ka bon cidenyabaara la, an ka taasi o la. Ni an bɛ ka lajɛw labɛn, an ka kan ka Bibulu tɛmɛsira kofɔlenw ɲini, ka tila k’u kalan Bibulu kɔnɔ, i bɛ se fana ka ɲɛfɔli dɔ labɛn olu kan. Lajɛw la fana, an ka kan ka Bibulu tɛmɛsiraw lajɛ tuma min na jɛmukɛla bɛ ka u kalan. Ka Bibulu tɛmɛsiraw fana durusi, o bɛna an labɛn ka tiɲɛ kuma fɔ cogo la min ye tiɲɛ ye.—2 Tim. 2:15.

³ Bibulu to a ka kuma: Ni an bɛ ka cidenyabaara kɛ, an ka kan ka Bibulu to a ka kuma. Misali la, an ka kan k’a ɲini ka Bibulu tɛmɛsira dɔ jira an barokɛɲɔgɔn na, ni o bɛ se ka kɛ. Ni a ye ɲininkali dɔ kɛ walima a b’an sɔsɔ, a ka fisa an ka Bibulu ta k’a jaabi. Ni an barokɛɲɔgɔn bolodegunnen don, an bɛ se ka miiriya dɔ ta Bibulu kɔnɔ k’o jira a la, k’a fɔ ko: “Sani ne ka taa, a to ne ka nin Bibulu tɛmɛsira jira i la.” Ni a bɛ se ka kɛ, i ka sin ka Bibulu tɛmɛsira kalan i ka Bibulu kɔnɔ, wa, i bɛ ka min kalan i barokɛɲɔgɔn ye, i k’a to a k’o lajɛ i fɛ.

⁴ Don dɔ la, tɛmɛsiraw jiralen kɔ cɛ dɔ la minnu b’a jira ko Ala ka Sabaya tɛ tiɲɛ ye, cɛ dɔ kabakoyara k’a fɔ ko: “Ne ye ne ka diɲɛlatigɛ bɛɛ kɛ ne bɛ taa egilisi la, nka ne tun t’a dɔn fewu ko Bibulu bɛ nin de fɔ!” A sɔnna Bibulu-kalan na. Yesu y’a fɔ ko a ka sagaw, n’o ye mɔgɔw ye minnu jogo bɛ i ko saga, olu bɛna ale kan mɛn. (Yuh. 10:16, 27) I bɛ se ka fɛn min kɛ min ka fisa kosɛbɛ walisa ka mɔgɔ kɔnɔjɛlenw dɛmɛ walisa u ka tiɲɛ dɔn, o ye ka tiɲɛ jira u la Ala ka kuma kɔnɔ. O la sa, an ka kɛ Ala ka Tiɲɛkuma lafasabagaw ye.