“A bɛ se di mɔgɔ barika bannen ma”
1 An bɛɛ bɛ sɛgɛn waati ni waati. O sɛgɛn bɛ se ka bɔ baara walima farikolo ka baara dɔ la, nka o bɛ se ka bɔ fana kunkow la minnu bɛ an da la nin “waati gɛlɛnw” na. (2 Tim. 3:1) An minnu ye Jehowa ka baarakɛlaw ye, an mago bɛ barika min na alako ta fan fɛ walisa an kana dɔ bɔ an ka cɛsiriw la an ka waajuli baara la, an bɛ se k’o sɔrɔ cogo jumɛn na? An bɛ o barika sɔrɔ n’an b’an sinsin Jehowa kan, ‘sebaayaba’ ni fanga bɛ ale min na kosɛbɛ. (Esa. 40:26) A b’an magow dɔn, wa a b’a fɛ tiɲɛ na k’an dɛmɛ.—1 Pi. 5:7.
2 Jehowa bɛ min kɛ ka an dɛmɛ: Jehowa bɛ barika di an ma a ka hakili senu sababu fɛ. A ye baara kɛ ni o barika kelen de ye, fɛn fosi tɛ se o min na, walisa ka dunuya da. Ala ka hakili senu b’an dɛmɛ ka “barika kura sɔrɔ” ni an sɛgɛnna. (Esa. 40:31) I k’i yɛrɛ ɲininka nin na: ‘Tuma jumɛn de kɛra a siɲɛ laban ye ko ne ye delili kɛ tigitigi ka hakili senu sɔrɔ walisa a ka barika don ne na ka se ka ne ka Kretiɛn wajibiw dafa?’—Luka 11:11-13.
3 Ni don o don an bɛ Ala ka Kuma fiyɛlen kalan ani ka taasi o la, ni an bɛ Kretiɛn sɛbɛnw kalan tuma bɛɛ fana walisa k’an balo alako ta fan fɛ, an bɛna kɛ i ko jiri barikama “min turulen bɛ jiwoyo da la,” min bɛ den a den tuma la, n’a jirifura tɛ fɔsɔnfɔsɔn.—Zab. 1:2, 3.
4 Jehowa bɛ an seere ɲɔgɔnw fana kɛ dɛmɛ ye min bɛ an “dusu saalo” walima min bɛ an barika bonya. (Kol. 4:10, 11) Jɛkulu ka lajɛw la, u bɛ an barika bonya u ka barow, u ka ɲɛfɔliw ni u ka jɛmuw fɛ minnu bɛ dusu don an kɔnɔ an ka bato la. (Kɛw. 15:32) Kɛrɛnkɛrɛnnenya la, Kretiɛn maakɔrɔw b’an dɛmɛ alako ta fan fɛ, ani u bɛ dusu don an kɔnɔ.—Esa. 32:1, 2.
5 Waajuli baara: N’i y’a ye k’i sɛgɛnnen don, i kana waajuli dabila. Waajuli tɛ i ko baara tɔw, bawo n’i bɛ cidenyabaara kɛ tuma bɛɛ, o b’i barika de bonya tiɲɛ na. (Mat. 11:28-30) N’an bɛ kibaru duman fɔ mɔgɔw ye, o b’an dɛmɛ Ala ka Masaya bɛ kɛ an kuntilenna ye. Ɲɛnamaya banbali ni a ka dugawu banbaliw bɛ to an hakili la fana.
6 Sani nin diɲɛjugu ka halaki, baara camanba de bɛ yen ka kɛ. Kunw bɛɛ de b’an bolo ka to kologɛlɛya la an ka baara la “Ala ka barika dilen” sababu fɛ. (1 Pi. 4:11) Jehowa ka dɛmɛ fɛ, an bɛna an ka baara kɛ ka ban, bawo a “bɛ se di mɔgɔ barika bannen ma.”—Esa. 40:29.