An ka baara ɲuman kɛ ni Ala ka Kuma ye
1 K’a to wajuli la kuntigiba dɔ ye, “Filipe ye kuma ta ka Kibaru Duman fɔ Yesu ko la ka bɔ kitabu o yɔrɔ yɛrɛ la.” (Kɛw. 8:35) Filipe tun bɛ ‘baara ɲuman kɛ ni Ala ka Kuma ye.’ (2 Tim. 2:15, NW) Nka, an ka waati la, lakɔlɔsibaga taamakɛlaw y’a kɔlɔsi ko tuma caman na, weleweledala caman tɛ baara kɛ ni Bibulu ye wajuli la. Yali i bɛ baara kɛ ni Bibulu ye i ka cidenyabaara la wa?
2 An ka dannayakow n’an ka kalansiraw, olu bɛɛ bɛ bɔ Ala ka Kuma la. (2 Tim. 3:16, 17) Ala ka Kuma ye fɛn ye min bɛ mɔgɔw sama ka na Jehowa ma, min b’u kalan ɲɛnamayako kama. O de y’a to, sɛbɛko don an ka baara kɛ ni Bibulu ye an ka cidenyabaara la sanni k’a kɛ kuma dɔrɔn ye an diyanye fɛn kan. (Heb. 4:12) Mɔgɔ fanba tɛ Bibulu dɔn kosɛbɛ. O de kosɔn, an ka kan k’a kɔnɔkumaw kalan walasa k’a jira mɔgɔw la ko bilasirali nafama b’a la, ani k’a bɛ kuma siniko kan hadamadenw ye.
3 I ka Bibulu kɔnɔkuma yɛrɛw kalan: A dɔ rɔ, i bɛ se ka taa da-ni-da la k’a sɔrɔ bɔrɛ t’i bolo la. I b’a fɛ ka sɛbɛn minnu jira mɔgɔw la, i bɛ se k’u bila bɔrɛ fitinin kɔnɔ, ka i ka Bibulu minɛ i bolola. O la, n’i bɛ kuma mɔgɔ dɔ fɛ, i bɛna se ka Bibulu bɔ k’a sɔrɔ o tigi t’a miiri k’i bɛna diinɛko fɔ a ye. I k’i bila yɔrɔ la min b’a to o tigi ka se ka Bibulu kalan i fɛ. A dɔ rɔ, i bɛ se k’a ɲini a fɛ a ka Bibulu tɛmɛsira dɔ kalan a kan kɔrɔtalen. Bibulu ka kuma bɛ min fɔ, n’a bɛ se k’o ye, o bɛna a dusukun minɛ ka tɛmɛ i ka Bibulu ɲɛfɔlikuma dɔrɔn kan. A jɛyalen don ko n’i bɛn’a dɛmɛ ka Bibulu tɛmɛsira faamuya, i ka kan ka sinsin daɲɛw kan, daɲɛ minnu bɛ yɔrɔ kolomaw jira.
4 I bɛ Bibulu tɛmɛsira kelen kalan kumadaminɛ cogo min na: N’i tilara i tɔgɔ fɔli la waati min na, i bɛ se ka nin kuma in fɔ, ko: “Mɔgɔw bɛ bilasirali ɲini u ka diɲɛnatigɛ la yɔrɔ caman na. I ka miiri la, bilasirali fisaman bɛ se ka sɔrɔ min? [I ka jaabi makɔnɔ.] I ka miiri ye mun ye nin kuma in na? [I ka Ntalenw 2:6, 7 kalan ka tila ka jaabi makɔnɔ.] Hadamaden ka hakilitigiya dɛsɛra sira bɛɛ la; o ye mɔgɔw jigitiɲɛ. Nka, Ala ka hakilitigiya ye fɛn ye an bɛ se ka da min na tuma bɛɛ, wa, o b’an nafa.” I ka tila ka sɛbɛn jirata jira o tigi la. Fɛn min bɛ Ala ka hakilitigiya nafa jira o sɛbɛn kɔnɔ, i ka o jira.
5 Yesu ye baara kɛ ni Sɛbɛnniw ye walasa ka mɔgɔ kɔnɔnajɛlenw dɛmɛ. (Luka 24:32) Pol ye mɔgɔ kalan min na, a y’o sɛmɛntiya ni Bibulu ye. (Kɛw. 17:2, 3) N’an bɛ se ka baara ɲuman kɛ ni Ala ka kuma ye, ka dɔ fara o baara dɔnniya kan yɛrɛ, n’an bɛ cidenyabaara la, an hakilisigilen na da an yɛrɛ la ka t’a fɛ cidenyabaara la ani an ka nisɔndiya na bonya.