Sɔn-ni-sɔn gafeninw jiracogo bɛ labɛn cogo min na

¹ Aw bɛ se k’aw yɛrɛ ɲininka ko: ‘Ikomi sɔn-ni-sɔn gafeninw jiracogo ɲɛfɔlen bɛ kaban An ka Masaya Cidenyabaara kelen-kelen bɛɛ kɔnɔ, mun na an ka kan ka u jiracogow labɛn tuguni?’ Sɔn-ni-sɔn gafeninw jiracogo minnu dilen bɛ An ka Masaya Cidenyabaara kɔnɔ, olu nafa ka bon kosɛbɛ mɔgɔ caman bolo, nka o bɛɛ n’a ta, fo an yɛrɛ ka an labɛn. Nafa bɛ se ka kɛ o sɔn-ni-sɔn gafeninw jiracogo la waajulikɛyɔrɔ dɔ la, nka, i b’a sɔrɔ nafa tɛ o jiracogo la waajulikɛyɔrɔ wɛrɛ la. O la sa, an man kan k’a miiri ko an diyagoyalen don ka sɔn-ni-sɔn gafeninw jira iko a fɔlen bɛ tigitigi cogo min na sɔn-ni-sɔn gafeninw jiracogo dilenw kɔnɔ. Hali n’an b’a fɛ ka baara kɛ ni o jiracogo dilen dɔ la kelen ye, a ka fisa an ka o fɔ an yɛrɛ ka fɔcogo la.

² Barokun dɔ sugandi: N’i ye sɔn-ni-sɔn gafenin kalan kaban tuma min na, i ka barokun dɔ sugandi a kɔnɔ min bɛnnen don i ka waajulikɛyɔrɔ la, ani min diyara e yɛrɛ ye. I bɛna o barokun jira ni nisɔndiya ani ni kɔnɔnajɛya min ye, o bɛ se ka a kalanni nege don i barokɛɲɔgɔn na. Hali n’i bɛna barokun jira min ka di i ka waajulikɛyɔrɔ mɔgɔ caman ye, barokun tɔ minnu bɛ sɔn-ni-sɔn gafenin kɔnɔ, i jija ka olu fana kɔnɔko dɔn koɲuman. O bɛna a to i ka se ka sɔn-ni-sɔn gafenin jiracogo yɛlɛma ni i ni mɔgɔ bɛnna min bɛ nafa don barokun wɛrɛ la min bɛ a kɔnɔ.

³ Ɲininkali dɔ kɛ: O kɔfɛ i ka kuma daminɛcogo labɛn koɲuman. I bɛna i ka kuma daminɛ cogo min na, o nafa ka bon kosɛbɛ. Walisa k’i barokɛɲɔgɔn bila a ka nafa don i ka barokun sugandilen na, ni i ye ɲininkali dɔ kɛ min b’a bila a k’a miiri, o bɛ se ka a tigi dɛmɛ. Ɲininkali minnu bɛ mɔgɔ bila k’i hakilinata di, olu de bɛ nɔ bɔ kosɛbɛ. I kana i barokɛɲɔgɔn ɲininka fɛn na min bɛna kɛ a bolo baasi ye, walima min bɛna a bila k’ a hakilila lafasa.

⁴ Bibulu tɛmɛsira dɔ kalan: O bɛɛ kɔfɛ sa, i ka Bibulu tɛmɛsira dɔ sugandi, i bɛna se ka min kalan, ni i barokɛɲɔgɔn ka cogoyaw b’a to o ka se ka kɛ. Laala a bɛ se ka kɛ tɛmɛsira dɔ ye min bɛ sɔrɔ i ka barokun jirata kɔnɔ. Bibulu tɛmɛsira kalanni b’a to an barokɛɲɔgɔn k’a ye ko an ka cikan bɛ bɔ Ala ka Kuma de kɔnɔ. O Bibulu tɛmɛsira fana bɛ se ka kɛ seereya ye hali ni an barokɛɲɔgɔn banna sɔn-ni-sɔn gafeninw na. (1 Tes. 2:​13) Dɔw ye sɔn-ni-sɔn gafenin kalanni nege don u barokɛɲɔgɔn na, u kɛlen ka Bibulu tɛmɛsira dɔ kalan sanni u ka ɲininkali kɛrɛnkɛrɛnnen dɔ kɛ. I bɛ se ka Bibulu tɛmɛsira dɔ sen don i ka kuma na nin cogo la: “Ne tun b’a fɛ ka i hakilila dɔn nin Bibulu tɛmɛsira kan.” O kɔfɛ, sɔn-ni-sɔn gafenin yɔrɔ min ɲɛsinnen bɛ i ka tɛmɛsira kalannen ma, i bɛ se k’o jira i barokɛɲɔgɔn na, ka tila ka ɲɛfɔli surun kɛ walisa ka barokun kalanni nege don i barokɛɲɔgɔn na sanni i ka gafenin to a bolo.

⁵ Sariya jɔnjɔn si sigilen tɛ yen an ka kuma fɔta ko la, ni an bɛna sɔn-ni-sɔn gafeninw jira tuma min na. A ka fisa tuma caman na, ka an ka gafeninw jiracogo nɔgɔya ani k’a surunya. Baara kɛ ni gafenin jiracogow ye minnu ka nɔgɔn i ma, ani minnu bɛ nɔ bɔ kosɛbɛ. Nafa ɲɛnamaba min bɛ sɔn-ni-sɔn gafeninw na, i sinsin o kan, wa, i ka kɛ mɔgɔ ye min nisɔn ka di. N’i ye i labɛn ka ɲɛ, i bɛna se ka baara ɲuman kɛ La Tour de garde ni Réveillez-vous ! bilali la mɔgɔw bolo, mɔgɔ minnu labɛnnen bɛ ɲɛnamaya banbali kama.​—Kɛw. 13:48.

[Study Questions]

1. Sɔn-ni-sɔn gafenin jiracogo minnu bɛ An ka Masaya Cidenyabaara kɔnɔ, sanni an k’a ɲini dɔrɔn ka olu to an kɔnɔ, mun na a ka fisa an yɛrɛ ka an ka sɔn-ni-sɔn gafenin jiracogo labɛn?

2. Ni an bɛna an ka barokun jirata sugandi tuma min na, an bɛna mun jateminɛ?

3. E bɛ baara kɛ ni kuma daminɛcogo sugu jumɛn de ye min bɛ nɔ ɲumanba bɔ?

4. Nafa jumɛnw b’a la ka Bibulu tɛmɛsira dɔ kalan i barokɛɲɔgɔn ye, ni a ka cogoyaw b’a to o ka se ka kɛ?

5. An ka kan ka kunnafoni ɲɛnama jumɛnw to an hakili la, ni an bɛ ka sɔn-ni-sɔn gafenin jiracogo dɔ labɛn?