Ni a ka di an ye ka mɔgɔw dɛmɛ, o bɛ na ni dugawu caman ye
1 Goliyati ye kɛlɛ tigɛ tuma min na Israɛl denw ma, sɔrɔdasi fɛn o fɛn tun bɛ yen, o tun bɛ se k’a bɔ a yɛrɛ la ka kɛlɛ kɛ a fɛ. Nka, u si ma o kɛ. Sagagɛnna denmisɛn min tun ma kɛlɛkɛ cogo dege, o de y’a bɔ a yɛrɛ la ka Goliyati kɛlɛ. (1 Sam. 17:32) Yahutu minnu bɔra jɔnya la ka na Jerusalɛm, olu dɛsɛra ka Jerusalɛm kogow jɔ, nka Perse masakɛ ka minnifɛnw dibaga de y’a bɔ a yɛrɛ la, ka a ka jɔyɔrɔba to palɛ la, ka taa Jerusalɛm, walisa ka kogojɔ baara ɲɛnabɔ. (Neh. 2:5) Ikomi a diyara Dawuda ni Nehemi ye ka mɔgɔw dɛmɛ, Jehowa dubara u ye.—1 Sam. 17:45, 50; Neh. 6:15, 16.
2 Tuma caman na a man di mɔgɔw ye bi ka u mɔgɔɲɔgɔnw dɛmɛ. Nin “laban donw na,” mɔgɔw bolo degunnen don tuma bɛɛ, wa, u caman bɛ “u yɛrɛw fɛ.” (2 Tim. 3:1, 2) A ka nɔgɔn mɔgɔ bolo a yɛrɛ ka kow ka a ka waati bɛɛ ta, fo ka taa kɛ ni dɛmɛ ka kan ka kɛ, a t’a ye ko ale bɛ se ka dɛmɛ don. O bɛɛ n’a ta, ikomi an ye Kretiɛnw ye, an b’a fɛ ka Yesu ladege, ale min y’a bɔ a yɛrɛ la ka mɔgɔw dɛmɛ. (Yuh. 5:5-9; 13:12-15; 1 Pi. 2:21) An bɛ se k’a jira cogo jumɛn na ko a ka di an ye ka mɔgɔw dɛmɛ? An bɛ dugawu jumɛnw sɔrɔ o la?
3 An balimaw kosɔn: Ni a ɲinina mɔgɔw fɛ tuma min na u ka kuma lajɛw la, an bɛ se ka nilifɛn dɔ lase tɔw ma alako ta fan fɛ, ni an b’a bɔ an yɛrɛ la ka kuma. (Rom. 1:11) Ka kuma lajɛw la, o bɛ bonya da Jehowa kan, o bɛ tiɲɛ sinsin kosɛbɛ an dusukun ni an hakili la, o bɛ dɔ fara an ka nisɔndiya fana kan, an bɛ nisɔndiya min sɔrɔ lajɛw la. (Zab. 26:12) Mɔgɔ min ka kan ka jɛmu di Ala-ka-Marako Cidenyabaara Kalanso la, ni o tigi ma se ka o jɛmu kɛ, an bɛ se fana k’a bɔ an yɛrɛ la ka o jɛmu kɛ o tigi nɔ na. O bɛna an dɛmɛ an ka se mɔgɔw kalancogo la kosɛbɛ.
4 Balimakɛw bɛ se k’a jira ko a ka di u ye ka mɔgɔw dɛmɛ, ni u b’a ɲini ka baara dɔw kɛ jɛkulu kɔnɔ. (Esa. 32:2; 1 Tim 3:1) An bɛɛ bɛ se ka dɛmɛ don walisa jamalajɛw ni kafoba ka jamalajɛw ka kɛ ka ɲɛ hɛrɛ la, ni an b’a bɔ an yɛrɛ la ka baara kɛ jamalajɛ ka baarada caman na. Ni an b’a bɔ an yɛrɛ la ka baara kɛ ni lakɔlɔsibaga taamakɛla ye cidenyabaara la, walima ka dumuni di a ma, an ni ale bɛ ɲɔgɔn ja ‘gɛlɛya.’ (Rom. 1:12) Falatɔw, muso cɛsalenw, banabagatɔw, lujuratɔw, den caman bɛ muso minnu bolo ani mɔgɔ wɛrɛ minnu bɛ jɛkulu kɔnɔ, ni an bɛ olu dɛmɛ cogo la min bɛ u nafa, an bɛ nisɔndiya sɔrɔ, wa, an bɛ Jehowa ka mandiya fana sɔrɔ.—Nt. 19:17; Kɛw. 20:35.
5 Sira wɛrɛ min fɛ an bɛ se k’a bɔ an yɛrɛ la ka mɔgɔw dɛmɛ, o ye ni an bɛ an ka waati ta ani ni an bɛ an fanga kɛ ka dɛmɛ don Masaya So saniyali ni a minɛcogo ɲuman la. Ka fara o kan, Jamalajɛ So walima jamalajɛw ni kafo ka jamalajɛw bɛ kɛ Masaya So minnu kɔnɔ, ni a ɲinina jɛkuluw fɛ u ka u sen don olu saniyali ni u minɛcogo ɲuman na, o ye cogo ɲuman ye walisa k’a jira ko a ka di an ye ka mɔgɔw dɛmɛ. Mɔgɔ caman minnu ye o kɛ, olu y’a ye ko ka jɛ ka baara kɛ ɲɔgɔn fɛ, o bɛ na ni teriyasira sɛbɛ ye an ni ɲɔgɔn cɛ. U kɛlen ka u yɛrɛ di o cogo la, hali ni u sɛgɛnna u kɛlen ka tile bɛɛ kɛ baara la, dɔ farala u barika kan alako ta fan fɛ.
6 Waajuli fɛ: An bɛ se k’a bɔ an yɛrɛ la ka baara bɛɛ la belebele min kɛ bi, o ye ka Masaya waajuli kɛ. Ni an bɛ mɔgɔw dɛmɛ u ka Bibulu ka laadilikan faamu, ka tugu o kɔ, u bɛ kuntilenna sɔrɔ u ka ɲɛnamaya kɔnɔ, u bɛ fanga sɔrɔ fana ka delinako juguw bila. Bibulu bɛ jigiya min di siniko kan, u bɛ o dɔn, wa, u bɛ nisɔndiya sɔrɔ o la. Ni an bɛ mɔgɔw kalan Bibulu la, o ye baara ye an b’a bɔ an yɛrɛ la ka min kɛ, wa, o bɛ nisɔndiya lase an ma, ka kodumanw lase mɔgɔw ma, minnu bɛ mɛn. (Yuh.17:3; 1 Tim. 4:16) Laala, an ka cogoyaw b’a to an bɛ se ka an sen don kosɛbɛ o baara la, ka kɛ tutigɛbaga farankan ye, walima ka kɛ tutigɛbaga basigilen ye, walima ka yɛlɛma yɔrɔ la min magoba bɛ weleweledalaw la, walima yɛrɛ ka kan wɛrɛ dege.
7 Masakɛ Dawuda tun y’a fɔ ko waati min na Masiya bɛna a ka kuntigiya daminɛ, Ala ka jamakulu bɛna sɔn ka a yɛrɛ di. (Zab. 110:3) Ikomi Jehowa de bɛ sumantigɛ laban ko teliya alako ta fan fɛ, baara camanba de bɛ yen an bɛ se k’a bɔ an yɛrɛ la ka minnu kɛ. (Esa. 60:22) Yala i y’a fɔ wa: “Ne [filɛ], i ka ne ci”? (Esa. 6:8) Tiɲɛ na, ni an b’a jira ko a ka di an ye ka mɔgɔw dɛmɛ, an ko bɛ diya Jehowa ye, wa, an bɛ dugawu caman sɔrɔ o kɛli la.
[Study Questions]
1. Ikomi a diyara Dawuda ni Nehemi ye ka mɔgɔw dɛmɛ, Jehowa dubara u ye cogo jumɛn na?
2. Mun na Kretiɛnw ka kan k’a jira ko a ka di u ye ka mɔgɔw dɛmɛ?
3. K’a jira ko a ka di an ye ka mɔgɔw dɛmɛ, o bɛ nafa jumɛn lase jɛkuluw ma lajɛw tuma la?
4. Sira jumɛn wɛrɛw fɛ an bɛ se k’a jira ko a ka di an ye ka mɔgɔw dɛmɛ?
5. Ko jumɛnw ɲɛsinnen bɛ Masaya So ani jamalajɛ So ma minnu bɛ a wajibiya an k’a jira ko a ka di an ye ka mɔgɔw dɛmɛ?
6. Mun na cidenyabaara de ye baara bɛɛ la belebele ye, an b’a bɔ an yɛrɛ la ka min kɛ?
7. Mun na ka bɔ i yɛrɛ la ka mɔgɔw dɛmɛ, o nafa ka bon kɛrɛnkɛrɛnnenya la bi?