Ɲininkali Jaabi

◼ Ka kow labɛn walisa ka wari dalajɛ jɛkulu dɛmɛni kama, yala o bɛ bɛn wa?

Tuma caman na, diinɛ jɛkuluw bɛ ko dɔw labɛn walisa ka wari sɔrɔ, i n’a fɔ dumunibaw, walima fɛn feerew, walima ɲɛnajɛw. K’a sɔrɔ a bɛ dɔw kɔnɔ, k’o kow bɛ kɛ kun ɲuman de kama, o kow ye warideli siraw de ye. Jehowa Seerew tɛ u ka wari sɔrɔ o cogo la ka u yɛrɛ dɛmɛ.

Kun min na an tɛ sɔn ka egilisiw ladege ani ka wari ɲini mɔgɔw fɛ, san 1879 Utikalo La Tour de Garde bɔko filanan ye o ɲɛfɔ. A ko: “Anw fɛ, JEHOWA de ye ‘La Tour de Garde de Sion’ kɔkɔrɔdonbaga ye. Wa, ikomi a bɛ o cogo la, La Tour de Garde de Sion tɛna hadamadenw ka dɛmɛ ɲini abada walima ka hadamadenw deli abada u ka ale kɔkɔrɔdon. Min b’a fɔ ko: ‘Kulu sanu ni a warijɛ bɛɛ lajɛlen ye ne ta ye,’ ni o dɛsɛra tuma min na ka sɛbɛn kɔkɔrɔdon-wari di, an bɛna a faamu ko waati sera ka sɛbɛn labɔli jɔ.”

An bɛ tugu Bibulu ka nin sariyakolo kɔ ka taa a fɛ, ko: “Mɔgɔw bɛɛ kelen-kelen ye min latigɛ u yɛrɛw kɔnɔ, u ka nili kɛ ka kɛɲɛ n’o ye. O kɛli kana gɛlɛya u ma, a kana kɛ ni diyagoya ye, k’a masɔrɔ min bɛ nili kɛ ni diyaɲe ye, o tigi de ko ka di Ala ye.” (2 Kɔr. 9:7) Bolomafaraw bɛ bila buwati minnu kɔnɔ, olu maralen bɛ Masaya So kɔnɔ walisa ni mɔgɔw b’a fɛ ka bolomafaraw di, olu ka se ka o kɛ. (2 Mas. 12:9) Bolomafaraw tɛ ɲini mɔgɔw fɛ, wa, u tɛ di fana ni hakilila ye ka fɛn dɔ sɔrɔ o kɔfɛ.