An ka segin ka na bɔ mɔgɔ bɛɛ ye minnu y’a jira cogo dɔ la ko kibaru duman ka di u ye
1 An caman bɛ tiɲɛ kɔnɔ bi bawo mɔgɔ dɔ y’a kɔlɔsi ko an y’a jira ko Masaya cikan ka di an ye, wa, o tigi seginna ka na bɔ an ye ni timinandiya ye—laala siɲɛ caman, walisa k’an dɛmɛ Masaya cikan ka diya an ye ka taa a fɛ. O cogo kelen na, an fana ka kan ka segin ka na bɔ mɔgɔw bɛɛ ye minnu y’a jira cogo dɔ la ko kibaru duman ka di u ye. Tiɲɛ na, ka segin ka na bɔ mɔgɔw ye, o sen bɛ an ka ci la, n’o ye ka mɔgɔw kɛ “kalandenw ye.”—Mat. 28:19, 20.
2 An ka jateminɛ kɛ k’a dɔn ni kibaru duman ka di mɔgɔ dɔ ye: Hali ni mɔgɔ dɔ ma sɔn an ka sɛbɛn na, o tigi ɲɛda cogoya, a kumacogo, walima a bɛ daɲɛ minnu sugandi ka kuma an fɛ, o b’a jira cogo dɔ la ko kibaru duman ka di a ye. N‘a b’o cogo la, an bɛ se ka segin ka na bɔ o tigi ye. Dɔgɔkun duuru ka tugu ɲɔgɔn kɔ, an balimakɛ dɔ seginna ka na bɔ cɛ dɔ ye, k’a sɔrɔ a ma se ka sɛbɛn to a bolo. A nako wɔɔrɔnan na, cɛ sɔnna sɛbɛn na, o kɛra Bibulu-kalan dɔ daminɛ ye.
3 N’i y’a ye ko kibaru duman ka di mɔgɔ dɔ ye, i teliya ka segin ka na bɔ o tigi ye, laala tile damadɔ tɛmɛnnen kɔ. I kana cogo di “Sitanɛ” ma walisa fɛn min serila a dusukun na, Sitanɛ ka o ta ka bɔ yen. (Mat. 13:19) N’aw bɛnna a kan ko i bɛ segin ka na waati latigɛlen dɔ la, i ka na o waati la tigitigi.—Mat. 5:37.
4 An ka seereya nbɛda la: Ka i to seereya la nbɛda la ani senfɛ seereya la, i ye mɔgɔ minnu sɔrɔ ni u y’a jira ko kibaru duman ka di u ye, yala i bɛ i jija ka o mɔgɔw dɛmɛ walisa kibaru duman ka diya u ye ka taa a fɛ wa? Aw ka baro kuncɛ tuma na, i bɛ se k’a fɔ ko: “Nin baro diyara ne ye. Ne bɛ se ka i sɔrɔ min walisa an ka se ka baro kɛ kokura?” Ni a bɛnnen don, weleweledala dɔw bɛ u ka telefɔni nimɔrɔ di u barokɛɲɔgɔn ma, walima u ni u barokɛɲɔgɔn bɛ u ka telefɔni nimɔrɔ di ɲɔgɔn ma. Ni tuma bɛɛ mɔgɔw bɛ i ye seereya la nbɛda la yɔrɔ kelen na, u tɛna siga ka u ka telefɔni nimɔrɔ walima u ka ladɛrɛsi di i ma. Hali ni u banna k’a fɔ i ye i bɛ se ka u sɔrɔ yɔrɔ min na, o bɛɛ n’a ta, n’i y’u ye siɲɛ wɛrɛ nbɛda la, i bɛ se ka u dɛmɛ kibaru duman ka diya u ye ka taa a fɛ.
5 An bɛ fɛn minnu sɛnɛ, k’u sɔn, ni an ɲɛ bɛ olu falentɔ la, o bɛ an nisɔndiya. O cogo kelen na, an bɛ se ka nisɔndiyaba sɔrɔ, ni an bɛ segin ka na bɔ mɔgɔw ye, walisa k’u dɛmɛ u ka taa ɲɛ alako ta fan fɛ. (1 Kɔr. 3:6) A kɛ i kuntilenna ye ka segin ka na bɔ mɔgɔw bɛɛ ye minnu y’a jira cogo dɔ la ko kibaru duman ka di u ye.